Теестегі нимес сессия иртер
29.09.2023
Хабарлар
Ӧӧркі Чӧп президиумы чыылиинда
Ӧӧркі Чӧп. Сергей Сокол Хакасияның сигізінҷі хығыртии Ӧӧркі Чӧбі президиумының пастағы чыылиин иртірген
Хакасияның наа Ӧӧркі Чӧп кнезі Сергей Сокол президиумның пастағы чыылиин иртірген. Чыылығның кӱн суриинда нинҷе-де ле сурығ полған, оларның аразында ӧӧні – Ӧӧркі Чӧптің ікінҷі (теестегі нимес) сессиязын иртірері. Президиумдағылар аны чарыс айының 11-ҷі кӱнінде иртірерге чаратханнар.
Сессиядағы хайығлығ сурығларның пірсі – Россия Федерациязы сенаторын – Хакас Республиканың Ӧӧркі Чӧбінең сығара кізізін турғызардаңар. Кем сенаторға табылары сағам чазытта, че ол «Единая Россиядаң» полары пілдістіг.
Килер сессияда депутаттар ідӧк нинҷе-де закон проектін ӱзӱрібізерлер. Оларның пірсі – республиканың алынҷа законодательнай акттарынзар алызығлар кирчеткен закон проекті. Ол закон проектінҷе республиканың 4 законынзар тӱзедіглер кирілер.
Хайди чарытхан Ӧӧркі Чӧп кнезінің пастағы орынҷызы Пётр Воронин президиум чыылиинда, закон проекті республика парламентінің тоғызын чахсыландырар кӧстегліг. Закон проекті хоостыра парламент устағҷызына Ӧӧркі Чӧп президиумынзар хайдағ комитет-комиссияларның кнестерін кирердеңер чӧпнең сығар право пирілче. Андағ оңдайнаң, хайзы комитет-комиссияларның устағҷылары президиумзар кірбин сығарлар тіп сағынарға халча. Амғы законодательствоҷа Ӧӧркі Чӧп президиумынзар Ӧӧркі Чӧп кнезі, аның пастағы орынҷызы паза орынҷылары, комитеттернің паза комиссияларның кнестері кірчелер.
Паза Ӧӧркі Чӧп теестегі нимес сессияда ӧнетін чаа операциязының араласчыларына паза оларның сӧбірелеріне хабасчаң закон проектін ӱзӱрібізер. Закон проектінҷе пістің чир-суғҷыларға – СВО араласчыларына – чир участоктарын тикке пирері кӧрілче.
Сом Альбина Чистогашевани
Автор :
Альберт Толмашов
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде