Чидіглернің пірcі – хой ӧскірері
04.10.2023
Хабарлар
Арған оңдайнаң тӧллендірген сылтаанда тӧреен хурағанны ӧскіреріне республика бюджедінең 500 салковай пирілче
Ӱн пиріс. Хакасияның чуртағҷыларын республиканың чидии ӱчӱн ӱн пирерге хығырчабыс. Ӱн пиріс «Достижения.рф» федеральнай сайтта иртче
«Достижения.РФ» проекттің пӧгіні – полған на кізее Чир-суубыстың наукадағы, технологиялардағы паза культурадағы чидіглерібіснең танызар оңдай пирерге.
Регионыбыстың пу порталға сығарылған чидіглері санында – Хакасияның хой ӧскірері, ол пасха мал ӧскірҷең кӧстеглер аразында пастағы орында турча. Хойларға оттаҷаң чирлер, тузаланылбинчатхан хыра чирлері пары, килістіре чир-чайаан паза климат анзына полысча.
Пу кӧстег 1986 – 1993 чылларда иң не чахсы тилеен. Ол туста республикада 1,5 миллион пас хой саналған. 1990 чылларда хой ӧскірері пілдірте тӱзе халған. Амды ӱлгӱ органнары кресен-фермер хоныхтарынаң хада-пірге пу киректі айныдарына прай кӱстерін салчалар.
Аал хониинаң айғасчатханнарға кӧрілген кӧстегліг хабазығны алғыдары улуғ туза ағылар. Ол саринаң Хакасия правительствозы пастағҷы полча. Хай пірее оңдайлар пастап республикада ла тузаланылған полза, анаң федеральнай синде тузаланылған. Іди 2020 чылда республика правительствозы аал хониинаң айғасчатханнарға хой идін ниме-ноо тимниріне сатхан ӱчӱн субсидия тӧлеп сыххан. Хакасияның маңнаныстығ кӧзідімінең пасха регионнарда тузалан сыхханнар. Піс пастаан программаны Россияның аал хонии министерствозы ідӧк махтаан. Салтарында 2021 чылдаң пасти субсидияа ахча федеральнай бюджеттең позыдыл сыххан.
Хакасия арған оңдайнаң хойларны тӧллендірерінҷе ідӧк пастағылар санында турча. Тӧлні паза аннаң алчатхан ниме-нооны чахсыландырар пӧгіннең нинҷе-де хазна хабазии кӧрілген, ол санда тӧлліг хойларның ӱренін садызары. Ол хорадығларның 98 %-і айландырылча, арған оңдайнаң тӧллендірҷең тиріглерге хорадығларның – 95 %. Хакасияның хой ӧскірчеткен хоныхтары эдильбай, романовскай, тағлығ алтай, куйбышев, австралиядағы меринос тӧллерінің ӱренін алчалар. Полызығларны «Красноярскагроплем» ООО паза пасха тӧлліг малларның ӱренін тимнепчеткен пірігістер читірче.
Ідӧк 2021 чылдаң пасти республика бюджедінең субсидия хурағаннарны ӧскіреріне хорадығларның чардығын айландырарына пирілче. Хураған арған оңдайнаң тӧллендірген сылтаанда тӧреен полза, пір пас ӱчӱн 500 салковай тӧлелче, хозылып, тӧреен хурағанға – 50 салковай.
Аннаң пасха Хакасияның бюджедінең субсидия тӧлелче: ніcке паза чарымы ніске тӱкті тузаланысха сатхан 1 кг ӱчӱн – 50 салковай, аал хонии малларын микроидентификацияның паза диагностиканың технология тиріглерін аларына, тӧлліг малларның генетиказын сыныхтирына.
Пу хабазығ салтар пирче. 2005 чылда Хакасияда тиксі 68 муң пас хой саналған полза, 2023 чылда – 350 муң.
Хакас Республика хазнада ящур ағырыға вакцинация даа чох сыдамах регионнарның пірcі полча. Аның сылтаанда республикада ӧскірілген малларны Россияның хайдағ даа регионынзар читірерге чарир.
2019 чылда республикада «Хакас хой иді» ООО хойны соғарынҷа паза идінең ниме-ноо тимнирінҷе завод пӱдірілген. Заводта амғы тусха килістіре пӧзік технологиялығ тиріг тузаланылча, ол хойны сохча, теерізін сойча паза істін арығлапча, анаң оохтапча. Тимде ит кизектері, ӱлестіріліп, вакуумнығ пакеттерге ораалчалар. Амғы тусха килістіре ораалааны иттің тадиин паза тузазын хайраллирға полысча. Предприятиеде тимге сығарылчатхан иттің тузазын паалаҷаң паза аннаң андар хайдар ызылчатханын сыныхтаҷаң пос оңдайы тузаланылча.
Пӱӱнгі кӱнде ӧӧн пӧгіннер санында: ине хойларның санын хайраллиры паза ӧскірері, 100 ине хойдаң 85 пас хураған сығар турары, ханны нааҷылир пӧгіннең арған оңдайнаң тӧллендірерін ӧткін тузаланары, хой идін паза тӱгін чахсыландырары.
«Достижения.рф» сайтта (https://достижения.рф/achievements/region) ӱн пирер ӱчӱн пу хаалағларны толдырыңар:
1. Порталның ӧӧн страницазында, «Регионнарның чидіглері» пӧліксер иртіп, «Ӱн пирерге» кнопканы таллап алыңар.
2. Регион позы турғызылар. Че іди полбаан полза, пирілген пічіктең пістің республиканы таллап алыңар.
3. Пос кӧңнінең регионның чидіглерінең иң турыстыраларны таллап алыңар. «Ӱн пирерге» кнопканы пазыбызыңар.
Сайтта нинҷе дее ӱн пирерге чарир.
Сом авторни
Автор :
Алексей Баинов
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде