Пу тоғысха хынзаң на, тоғын поларзың
27.10.2023
Хабарлар
«Авто-стандарт» водительлер тимнеҷең школаның устағҷызы Сергей Миягашев
29 октябрьда – Автомобиль паза городтағы пассажир транспорты тоғынҷызының кӱні. Пу ӱлӱкӱн чарыс айының халғанҷы позырах кӱнінде таныхталча. Ол, водитель удостоверениезін алып, руль кистінде чӧрчеткен полған на кізее теелче
Удостоверение алып, автомобильліг чӧрчеткен полған на кізі автошколада ӱгренген. Анда опыттығ инструкторларның холында машиналығ чӧрерге ӱгреніп, водитель удостоверениезін аларға сыныхтағлар ирткен. Машинаны тоғындырып ойладарында сидік ниме чоғыл, че правилолар сайбабин, пасха чол араласчыларынаң пілізіп, саайларға кірбин чӧрері оой нимес. Аннаңар кізілер хайдағ инструктор ӱгредеріне улуғ хайығ салчалар. Пӱӱнгі матырыбыс «Авто-стандарт» хазнани нимес тиксі ӱгредігліг школаның директоры Сергей Миягашев полча.
– Сергей Васильевич, постарыңнаңар чоохтап пиріңер.
– Автомобилист – ол минің профессиям. Хызылчардағы политехническай институтта «Автомобиль транспортының инженер-механигі» специальностьха ӱгреніп алғам. Автотранспорт предприятиелерінде тоғынғам, анаң Хакас техническай институттың автомобиль паза автомобиль хонии кафедразында ӧӧн преподаватель полып істенгем. Институттаң парыбызып, автошкола тӧстеем.
– Ноғадаңар автошкола азар сағыс тӧреен?
– Чуртаста хайдағ-да тиліс паза ӧзіс киректелген. Ағаа хоза, пӧзік ӱгредіг системазында алызығлар полыбысхан, магистратура паза бакалавриат кирілген. Ол тустаң сығара пӧзік ӱгредіг аларға кірчеткен студенттернің саны хызырыл сыххан, пістің специальнозыбыс кирексіністе полбиныбысхан. Мин тоғынған корпус чабыл парған, аны ӧӧн корпуссар кӧзірібіскеннер. Аннаңар, кӱс салып, пос киреен тилідерге киліскен. Пір саринаң, тоғызымның кӧстеглері алыспаан тиирге чарир.
Пос киреен азарға оой полбаан. Анда илееде тоғыс паза піліс киректелче. Мин преподаватель полып істенгенде, хоза пасха орыннарда тоғынарға килісчең. Автошколаларда инструктор полып тоғынғамох. Аннаңар мағаа аның тоғызы таныс полған, туза ағылған.
– Сағысха кир поларзар ба, хаҷан пастағызын на машиналығ чӧргезер?
– Мин автомобильліг институтта ӱгренчеткенде пастағызын на чӧргем. Андада ікінҷі курста полғам, піске хоза водительлер курстары иртірілген, мин оларға пазын салғам. Мағаа ол туста 20 час полған. Студент тузындох ікі категорияа водитель удостоверениезін алғам. Ол В паза С категориялар. Олар ниикке чӧрҷең машиналығ паза таарлағ транспорттығ чӧрерге чарадылчатханын таныхтапчалар.
Ол чылларда студенттернің отрядтары тӧстелҷеңнер, пістің кӧстегҷе отряд «Сирена» адалған. Анда водитель тоғызын толдырҷаңмыс, чайғы тынағ кӱннерінде предприятиелерде, машиналығ чӧріп, опыт алынҷаңмыс.
– Пастағызын на руль кистінде чӧрерге сидік пілдірген ме?
– Йа, пастағызын сидік паза хорғыстығ полған.(Кӱлімзірепче. – Авт.) Мин чахсы оңнапчам, позымның пастағы ниикке чӧрҷең машинама хайди одырғанымны. Писче минута автомобиль ибіре пас чӧргем, одырыбызарға тідінмин. Хайди-да пасхаҷыл пілдірген, киртінминчеткем, позым садызып алған транспортымнаң парарбын тіп. Анаң, позымны холға алып, руль кистіне одырғам, пӱӱнгі кӱнге теере мин кӱннің сай машиналығ чӧрчем. Мин водитель удостоверениезін 1983 чылда алғам, амды cтажым 40 чыл пол парча.
– Ӱгредіг тузында курсанттарға даа, инструкторға даа ӧӧні ниме полча?
– Минің кӧрізімнең, ол инструкторның паза ӱгренҷінің пілісчеткені. Чарыт таа полбаспын – хайди поларға кирек. Анзы пастағы тоғазығдох, машиназар одырыбысса, хада чӧр кӧрзе, пілдістіг пол парча. Оларның, хада-пірге тудынып, тоғыс парар ба. Аны арғыс табарынаң тиңнестірерге чарир, неке. Мында инструкторның опыды паза стажы ӧӧні полбинча. Пірееде полча, курсант пирген инструкторда ӱгренерге хынминча, сурынча пасхазынзар. Мин пирілген инструкторның стажы улуғ, ол опыттығ тіп чӧптепчем, анзы, тізең, ынабинча. Піліс полбинчалар олар. Кӧбізін іди ипчілер тудынчалар, иреннер ӧӧнінде хайдағ инструктор киліс парар, анда ӱгренчелер.
– Сірернің инструктор полып тоғынған опыдыңар пар, чоохтап пиріңер, машиналығ чӧрерге иреннерні алай ипчілерні ӱгредерге оой?
– Ол сурыға нандырарға сидіксінчем. Ӧнетін сан пиріс апарбинчам. Пістің кӧбізін ипчілер ӱгренчелер, группаларның ікі ӱстіг чардығы. Минің кӧрізімнең, час хоостыра чарарға кирек. Чииттерні ӱгредерге оой. Чиит кізее пілістер дее чахсы сиипче, олар прай нимее чапчаң ӱгренчелер, аннаңар оларнаң тоғынарға оой полча. Хомзынысха, кізі улуғлан сыхса, ӱгреніс сидік пирілче, аннаңар андағ ӱгренҷілернең ӱр тоғынарға паза кӧп тус иртірерге килісче. 60 час толдыр салғаннарға ӱгредіг сидік пирілче. Піс ӱгренерге килгеннерні прайзын алчабыс, че улуғ частығ курсанттарға чоохтапчабыс:«Сірер иң пастап автомобильліг чӧр кӧріңер, анаң сизініңер, чӧр поларзар ба алай ӱгренерге пастирға даа кирек чоғыл ба?» Пір саринаң, хайдағ даа кізіні автомобильліг чӧрерге ӱгредіп аларға чарир. Че пасха саринаң, ағаа кӧп автомобиль чӧрчеткен туста чӧрерге кирек. Аннаңар водитель кізі чолда, суғдағы палых чіли, ізестіг тудынарға кирек. Пӱӱнгі кӱнде чолларда автомобильлер саны хозылча, анзын прайзы даа сизінче. Аннаңар водительлерге сидіксіністер хозылча паза нандырығлар хатығлалча.
Улуғ частығ водительлернің кӧбізі, чолда саай полза, чочып, хорылысха кір парча, чобаға даа кір парарға айабас. Піс курсанттарны иптіг чӧрерге ӱгретчебіс, че тоғасчалар хал чӧрчеткеннер. Анзы кізінің хылиинаң палғалыстығ тіп санапчам. Таныхтирға сағынчам, кізее 50 час азыра полза, ағаа ӱгренерге орай нимес полчатханын. Полған на кізінің позының оңдайы. Пістің автошколада 60 азыра частығ ипчі ӱгренген, аның чуртазы ам на пасталчатханға тӧӧй полған. Ол тағдаң саналығ чыларға ӱгреніп алған, кӱннің соох суғнаң чайынҷаң, ӧткін чуртаснаң чуртапчатхан. Ол теен: «Мин машиналығ чӧрерге ӱгрен полбаспын ма?» Андағ кізілер полча.
– Сірернің автошколада иң чиит паза иң улуғ ӱгренҷілерге нинҷелер час полғанын сағысха кир поларзар ба?
– Закон хоостыра автошколазар кічіг частығларны аларға чарадылбинча. Палаларны 17 частығда ӱгредерге алчабыс. Оларны ӱгредерге пістің правобыс пар, олар ідӧк ГИБДД сыныхтағларын иртер оңдайлығлар, че водитель удостоверениезі 18 час толдырған соонаң на пирілер. Мотоциклліг чӧрерге курсанттар 14 частығдаң ӱгреніп пастапчалар, сыныхтағларны 16 частығда иртчелер.
Иң улуғ частығ ӱгренҷілер 70 час ас парған ипчілер полғаннар. Оларның ӱзінҷі чардығы ла водитель удостоверениезін алып алған. Піреезі, нинҷе-де хати сыныхтағ иртіп, чарханыбысча, ӱгредиин тастабысча.
– Полча ба андағ курсант, хайзы машиналығ чӧрерге чайалбаан, аны нинҷе дее ӱгрет, ол чӧр полбинча?
– Йа, андағ кізілер полча. Оларның пу кирекнең айғазар кӧнігіс чоғыл. Олар автомобильліг чӧр полбинчалар. Анзы кізінің уйанын паза ӱрегліг полчатханын таныхтабинча, ол ағаа чайалбаан. Кізілер полған на профессияа алай тоғысха чайалбааннар нооза. Полған на кізінің хайдағ-да кирек чахсы килісче, хайдағ-да тоғысты ит полбинча. Аннаңар курсант орта сизіктіг кізее тӧӧй полза, піс аны ағаа чоохтапчабыс, ол аны оңарча. Андағ кізілер удаа тоғаспинчалар.
– Чол чӧрізі правилоларынзар паза сыныхтағ тудар системазар алызығлар удаа кирілче бе?
– Йа, алызығлар удаа полчалар. Оларға наа ла кӧнік парчазың, хатабох алызығлар киріл парча. Курсанттарға ӱгредіг тузында алызығлардаңар чоохтапчабыс, оларны хоостыра аннаң андар ӱгретчебіс. Ӱгретчең литератураны, сыныхтағ тутчаң билеттерні дее, правилоларны даа тың на садыспинчабыс. Піс ӧнетін кӧрілген сайттарда оларны сыныхтапчабыс, курсанттарға даа ол сайттарда кӧрерге чахыпчабыс.
Пӱӱнгі кӱнде автодромнарның кирексінізі чіт парған. Курсанттар городтағы чолларда прай нимее ӱгренчелер. Олар пастап амыр, кӧп транспорт чох чолларҷа чӧрчелер, анаң кӧп автомобильліг орамаларзар сыхчалар. Сыныхтағларны андағ чолларда тутчалар, ағаа хоза сыныхтағ 30 – 40 минута парча. Ол тус аразына пір дее алҷаас идерге чарабас. Мындағ алызығлар ікі чыл мының алнында кирілгеннер.
– Сірернің кӧрізіңернең, машиналығ чӧрерге ӱгренерге чылның хайдағ тузы иң килістіре полча?
– Таныхтирға сағынчам, автошколаларда курсанттарның саны хызырыл парча Наа чыл алнында паза соонда. Ідӧк чайғызын июнь, июль паза август айның чардығы. Анзы пілдістіг, кізілер чайғызын тынанчалар, кем талайда, кем суғ хазында. Наа чыл алнында ӱлӱкӱнге тимненіс парча, анаң пайрам соонаң «оңарынчалар».
Пілдістіг, анзы кізілер тынанып аларға сағынчатханынаң палғалыстығ. Таныхтирға кирек, водительге ӱгренҷең чылның иң килістіре тузы чоғыл, кізі автомобильліг чыл ибіре чӧрче нооза. Аннаңар хысхызын айғылығ чолларда алай наңмырлығ, харлығ паза тубаннығ кӱннерде чӧрерге ӱгренгені курсанттарға тузалығ ла полча. Хайди мин оларға чоохтапчам: «Ӱгредігде – сидік, чуртаста оой полар». Водитель удостоверениезін алзалар, оларға хайдағ даа кӱнде чорыхха парарға киліс пар турар. Аннаңар чылның ноо даа тузы килістіре.
Сом Альбина Чистогашевани
Автор :
Чоохтасхан Наталья Тюкпеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде