Пастағы класстағылар пілістерін кӧзідерлер
01.11.2023
Хабарлар
Тіл марии. Хакасияның национальнай паза территориальнай политика министерствозы хакас тілі мариинда аралазарға сағынчатхан пастағы класстағы ӱгренҷілернің паба-іҷелерінең пічіктер аларын тоосты
Пӱӱл марығда аралазардаңар іҷе-пабалардаң 94 cурыныс пічік кірген. Олар прайзы марығда араларзарлар. Асхыс аймаанаң марыға 62 сурыныс пічік кірген, Ағбаннаң – 18, Пии аймаанаң – 7, Таштып аймаанаң – 5, Орджоникидзе аймаанаң – 2.
Асхыс, Пии паза Таштып аймахтарының ӱгренҷілеріне марығ кічіг хырлас айының 2-ҷі кӱнінде 10.00 часта Калининдегі ортымах школада иртер. Ағбандағылар паза орджоникидзе аймаандағылар пілістерін килчеткен неделяда кӧзідерлер. Кӱні паза тузы хоза искірілер.
Марығда олғаннар эксперт комиссиязынаң чоох алызарлар. Комиссиядағылар аның пос тілін піл полчатханын, чоохтасчатханын, пос сағызын искір полчатханын паалирлар.
Марығның салтары кічік хырлас айының 15-ҷі кӱніне теере искірілер. Иң кӧп балл чыып алған 60 олған чиңісчі полыбызар. 1-ғы орын ӱчӱн 25 муң салковай пирілер, 2-ҷі – 23 муң салковай, 3-ҷі – 21 муң салковай. «Иң артых чоохтазығ» номинацияның чиңісчізіне хоза 10 алып аларға оңдай пар.
Хакас тілі марии Хакасия пазы Валентин Коновалов пастаа хоостыра «Хакас тілін хайраллиры паза тилідері» хазна программазынҷа 2020 чылдаң иртірілче. Аның ӧӧн пӧгіні – республиканың ікінҷі хазна тілін хайраллиры, тилідері паза аны сӧбіреде сабландырары.
Сом «Хакас чирі» газета архивінең
Автор :
Светлана Астанаева
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде