Аның ады чонда халар
15.11.2023
Хабарлар
Cаблығ хайҷы Семён Кадышевке хумартхы тас турғызарына республика бюджедінең 3 миллион салковай позыдылған, ідӧк чон хоза ахча чыған
Танығлығ кирек. Пу кӱннерде Шира аалда аймахтағы библиотека алнындағы ачыхта пістің саблығ хайҷыбыс Семён Кадышевке хумартхы тас азылған
Пу пайрамға хости ааллардаң паза Ағбан городтаң аалҷылар чыылысханнар. Сӧрӧн кӱн дее полза, тигір айас полған паза кӱн кӧгліг чарыпчатхан.
Кізілер тасхар ах иснең чаап салған хумартхы тас хыринда турғаннар. Иң пастап Хакасияның чон артизі Герман Танбаев Хакасияның гимнін кӧдірілістіг ырлаан. Ағаа хозылғаннар Ағбан городтағы улуғлар чӧбі президиумының кізілері (кнес полча Виктор Чепчигашев). Чоохтирға кирек, Герман Танбаев ідӧк Ағбандағы улуғлар чӧбінің президиумына кірче.
Аның соонаң чоох тутханнар Хакасияның Ӧӧркі Чӧп кнезінің пастағы орынҷызы паза хакас родтарының Улуғлар чӧбінің кнезі Пётр Воронин, республиканың культура министрі Светлана Окольникова, Шира аймааның пазы Андрей Диринг, Шира аймаандағы улуғлар чӧбінің кнезі Николай Абдин паза даа пасхазы. Олар саблығ хайҷы Семён Кадышевтің чуртазынаңар паза чайаачы чолынаңар сағыстарынаң ӱлескеннер.
Семён Прокопьевич Кадышев хакас чонның иң саблығ хайҷыларының пірсі полча. Аның алыптығ нымахтарын «Албынҷы», «Алтын Арығ», «Хан Кичегей» паза даа пасхазын полған на хакас кізі пілче полар. Оларны піс школада ӱгренчеткендӧк хығырҷаң полғабыс. Ідӧк чонда аның хыйға тахпахтары амға теере халғаннар. Аны искен кізілер чооғынаң, Семён Прокопьевичтің хайы уғаа сіліг паза чӱрекке кееркестіг полған.
Ол кічігдеңӧк нымах ызып пастаан. Пабазы Прона Кадышев аңҷы полтыр. Оолағын тайғазар хада ал чӧрҷең одыр. Соонаң ол саблығ хайҷылар Хара Матпыйдаң, Егор Кондеевтең, Сло ағазынаң алыптығ нымахтар искен. Іди ол 30 азыра алыптығ нымах пілҷең.
Тиктең нимес аны 1954 чылда Совет Союзының Писательлер пірігізіне алып алғаннар. 1958 чылда ол Ташкент городта ирткен Азия паза Африка писательлерінің чыылиинда араласхан.
Саблығ хайҷыны хумартхы таста чайап салар чӧптерні 1990 чыллардох пиріп пастааннар. Андада хазнада алызығлар тузы парчатхан. Ахча киреенең cидік полҷаң. Че 2002 чылда Шира аймаандағы Чоохчыл аалда, хайда Семён Прокопьевич чуртаан, туразында музей азыбысханнар.
Соонаң пістің республика хакас культуразына улуғ хайығ сал сыхханда, 2021 чылда Хакасия пазы Валентин Коноваловтың чарадиинаң регионда Алыптығ нымах чылы чарлалған. Ӱр ниместең сығара республикада «Хакасияның чон хайҷызы» паза «Хакасияның чон нымахчызы» наа аарластығ аттар чарлал парғаннар. Театрларда алыптығ нымахтар хоостыра ойыннар турғызылчалар.
Пу хумартхы тасты чайирға республика бюджедінең 3 миллион салковай позыдылған. Хакасиядағы культура учреждениелерінің тоғынҷылары, спонсорлар, С.П.Кадышевтің чир-суғҷылары хоза ахча чығаннар.
Хумартхы таста хайҷы Семён Кадышевтің хола омазын чайап салған Хакасияның чон артизі, скульптор паза «Ӱлгер» фольклор ӧмезінің хоос устағҷызы Кучен Ай Чарых Сайын. Ол, ідӧк мында полып, алыптығ нымахтың ӱзігін чатхан хоостыра хайлап пирген.
Анаң хумартхы тасты чаапчатхан ах исті хыйа алыбысханда, кізілер ӧрчіліг таңнап турғаннар. Уғаа тӧӧй паза морсымнығ кӧрінген хумартхы таста саблығ хайҷы!
Шира аалда ол кӱн Аал хонии тоғынҷыларының кӱнін таныхтааннар. Аймах кініндегі Культура туразында иң артых комбайнёрларны, механизаторларны, інек сағҷаңнарны Аарластығ пічіктернең паза ахчалығ сыйыхтарнаң чеестееннер.
Сом «Ширинский вестник» газетани
Автор :
Илья Топоев
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде