Хакасиядағы сӧбіренің чиңізі
15.11.2023
Хабарлар
Хакасия пазы Валентин Коновалов «Чыл сӧбірезі-2023» марығ чиңісчілерінең
«Чыл сӧбірезі-2023». Ӱр ниместе Хакасияның ӱлгӱ туразында республика пазы Валентин Коновалов тиксі Россия синінде иртірілген «Чыл сӧбірезі-2023» марығда чиңіс тутхан Анастасия паза Максим Скоревтернең тоғасхан
Пӱӱл марығ сигізінҷі хати иртірілген. Анда Россияның 86 регионынаң пис номинацияҷа иң артыхтар полыбызарға 3 муң азыра сӧбіре марығласхан. Финалда 384 сӧбіре араласхан, оларның читізі Хакасиядаң полған. «Чиит сӧбіре» номинацияда аралазып, чиңісчілер Ағбан чуртағҷылары Анастасия паза Максим Скоревтер полыбысханнар.
Олар олған лагерьінде танызып алғаннар. Амды хоныхта сигіс чыл, пілізіп, ынағлазып чуртап парирлар. Ирепчі ӱс оол ӧскірче. Сӧбіре пазы Максим Скорев МЧС-та ӧрт ӱзірҷең полып служба апарча паза Хакасияҷа МЧС-тың ӧӧн устанызының ӧрт-арачыланыс спортынҷа піріктірілген командаа кірче. Хонғаны Анастасия Скорева – флорист, ол чахайахтар салонының ээзі полча. Чииттер, пір ӧменең тудынып, пілісчеткені кӧріндіре. Максим позы даа улуғ сӧбіреде ӧскен, аннаңар кӧп палалығ сӧбіреде олғаннар ынағлазып, удур-тӧдір хаҷан даа ачынызып, полызызып ӧсчелер тіп таныхтаан. Сӧбіре пазы тоғыс соонаң сала маңзыри ибзер парча, палаларнаң айғасча. Пілдістіг, оолағастарға пабаларының хайии киректелче. Скоревтер сӧбірезінде, тізең, ӱс оол. Тун пала Арсений пӱӱл 1-ғы классха парған. Ол стол теннизінҷе кружокка чӧрче. Ортыны Савелий школаа парғалах паза кӧңніне килістіре кружок ам даа тапхалах. Кічии Севастьян ам даа ікі час толдырғалах.
«Чыл сӧбірезі-2023» марығда аралазарға ирепчіні Максим Дмитриевичтің тоғызында чӧптебіскеннер.
– Хонғанымның тоғызынаң киліп, сӧбіребістеңер видео суурып алғаннар, ідӧк аймах сомнар идіп алғаннар. Пістің аймах грамоталарыбысты, Аарластығ пічіктерібісті, чыып, регион синіндегі марыға ызыбысханнар. Анда чиңіс тутханда, Россия синіндегі марығда аралазарға пирібіскеннер, – чоохтаан Анастасия Скорева.
Россия синіндегі марығда чиңіс тутханнаңар піліп алғанда, сӧбіре киртінминдір. Максим Скоревке марығның тӧстегҷілері сығдыратханда, ол кӱҷӱрлер полар тіп чоохтазарға даа хынминдыр. Сыннаң марығ тӧстегҷілері полчатханы ілезіне сығысханда, кӱлкістіг дее пілдіртір. Марығ чиңісчілері сыйыхтар аларға прай сӧбіренең Москвазар парғаннар. Сыйыхтас программазы ӱс кӱнге тимнелген.
– Марығ часхызынох пасталған, чиңісчілерні чеестирі 16 – 18 октябрьда ирткен. Ӱс кӱн Москвада олаңай ла иртпеен. 17 октябрьда ВДНХ-да кӧзідіг кӧрері пӧгінде полған, че піс палаларнаң пар полбин салғабыс. Піс пос алынҷа чӧр килгебіс. 18 октябрьда пайрамнығ концерт полған паза сыйыхтар читіргеннер. Уғаа чапсых пілдірген, телевизорҷа ла кӧрген саблығ кізілерні тіріге истіп алғаны, – чоохтаан Анастасия Скорева.
Тоғазығ тоозылчатханда, Хакасия пазы Валентин Коновалов Анастасия паза Максим Скоревтерге оой нимес іҷе-паба тоғызын турыстығ толдырчатхан ӱчӱн алғызын читірген. Олар пасха чииттерге турыстығ кӧзідім полчалар. Валентин Олегович чииттерге пик хазых, ынағлазып, узах час чазирға алғаан. Алғыстас сӧстері соонаң Скорев ирепчінің оолахтарына танығлығ сыйыхтар читірген. Оларға палалар ӧрінгеннер, иң кічии Севастьян, тыстан полбин, ойнаҷахты андох сығарып, ойнап сыххан.
Сом Дмитрий Сунчугашевти
Автор :
Наталья Тюкпеева
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде