Хакасия чидiглерiнеңер – Москвада
22.11.2023
Хабарлар
Кӧзiдiг. Хакас Республика ВДНХ-да иртчеткен хазнаның иң улуғ паза кӧп отрасльлығ «Россия» кӧзiдиинде «Хакасия – то, что вдохновляет» хыйғылығ тоғынча
Киҷее чоннар аразындағы кӧзiдiг-форумда Хакасия кӱнi ирткен. Аалҷылар пiстiң хайхастығ республикабыснаң танызып алғаннар: тархынынаң, культуразынаң, кибiрлерiнең, чуртас оңдайларынаң. Кӱн тооза деловой, культура паза ӱгредiглiг программа тоғынған.
Деловой программаның ӧӧн сурығларының пiрсi – «Историко-культурное наследие как фактор регионального развития: лучшие практики» стратегия сессиязы. Аны Хакасия пазы Валентин Коновалов асхан. Сессияда пiстiң регионның тархын-культура ис-пайын хайраллирынаңар, аны сабға сығарарынаңар паза экономика тилiзiнеңер чоохтап, опытнаң ӱлескеннер. Ӧӧн спикерлернiң аразында полғаннар наука паза культура тоғынҷылары, учёнайлар, археологтар, iстезiгҷiлер, эксперттер паза пасха даа специалисттер.
Республика пазы Хакасияның ӧӧн ис-пайынаң таныстырған. Ол регионның халғанҷы чыллардағы танығлығ чидiглерiнеңер чарыда чоохтаан. Iдӧк Хакасияда нацпроекттер хайди толдырылчатханнаңар искiрген. Анаң ол, стендтiң экспозицияларынаң таныстырып, экскурсия иртiрген.
Кӧзiдiг аалҷылары «Хакасияның тадиин» амзап кӧргеннер. Ас-тамах кӧзiдии Россия кухнязы туразында ирткен. Хакас чонның ас-тамаан кӧзiткеннер паза амзирға пиргеннер. Пасха тiллiг аалҷылар постары даа хакас чиизiн тимнееннер. Оларға регионның иң ус поварлары мастер-класстар иртiргеннер. Ас-тамах кӧзiдии парчатхан туста саблығ кӧгҷiлерiбiс хайхастығ сарыннарынаң прайзын аптааннар.
Аалҷылар iдӧк хакас кинематогравынаң танысханнар. Кино музейiнде пiстiң режиссёрларның документальнай, хоос фильмнерiн паза альманахтар кӧзiткеннер.
Ӱгредiглiг программада «Особенности производства национальных брендов одежды как развитие креативных индустрий» хайхастығ кӧзiдiг полған. Анда хакас чонның национальнай кип-азаан кӧзiткеннер, мода киреенде креатив пастағларын тилiдерiн ӱзӱргеннер.
Аннаң пасха, «Судьба инородца. Наследие всемирно известного учёного тюрколога Николая Катанова» темаҷа лекция хығырылған.
Чайаачы программада Хакасияның артисттерi паза кӧгҷiлерi ыр-сарыннар, теелбектер толдырғаннар.
«Россия» чоннар аразындағы кӧзiдiг-форум 4 ноябрьда азылған. Аның стендтерiнде 89 регионның улуғ компанияларының, госкорпорацияларының паза халых пiрiгiстерiнiң иң чахсы ниме-ноозы кӧзiдiге сығарылған.
Улуғ кӧзiдiг чарым чыл парар – 2024 чылның 12 апрельiне теере. Аны тикке кӧрiп аларға чарир.
Сомнар Хакасия пазы пресс-службазыни
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде