Алныбыста – улуғ пӧгіннер
25.01.2024
Хабарлар
Оксана Макович балашовскай хоос салылған истi кӧртiсче. Кистiнде сублимация оңдайынаң хоосты иске салчатхан тирiг турча
Тиліс чолынҷа. Хакасияның ниик промышленнозының иң килкім предприятиезі Харатастағы кип-азах тікчең фабрика полча. Піс аның ээзі паза устағҷызы Оксана Маковичнең тоғазып алғабыс
– Оксана Анатольевна, сірер 2002 чылда пу фабриканы садызып алғазар. Нимедең тоғынып пастаазар?
– Сынында мында хуруғ стенелер ле полған. Совет тузындағы кип-азах тікчең фабрика пір дее тоғыс апарбинчатхан. Фабрика туразын садызып, піс тӧзек-частых тігіп пастаабыс. Пӱӱнгі кӱнге, тізең, піс пос истерін тимниріне сығып алғабыс.
– Позыңар пу фабриканаң хайди-да палғалыстығ полғазар ба?
– Чох. Че ол туста прайзы тігіп пілҷең. Іғrda журнал хоостыра тікчеңміс. Школада даа мин позым тіккен формалығ чӧргем. Минің пастағы ӱгредиим «Ас-тамах товароведi» полча, анаң инженер-экономистке ӱгреніп алғам.
– 22 чыл аразына пос киреен тилідерге иң сидік хаҷан полған?
– Пу чыллар ниик иртпееннер. Полған на чылда хайдағ-да сидік сурығлар сығысчаң. Олох туста сидіксіністерде посха чахсы оңдайларны кӧр табарға кирек. Олар кізіні тыытчалар, син мыннаң мындар хайдағ саринзар хаалирын кӧрчезің.
– Оксана Анатольевна, пӱӱнгі кӱнде «Харатастағы кип-азах тікчең фабрика» хайдағ синде тоғынча?
– Пӱӱнгі кӱнде фабрика аймах кӧстеглерҷе тоғынча. Піс аймах ӧмелерге тоғыс кип-азаан сығарчабыс: имҷілерге, полызығлар читірчеткеннерге, ас-тамах сығарчатхан компанияларға, спортсменнерге, теелбек ӧмелеріне. Тӧзек-частых тігерін узаратчабыс. Пістің тӧзек-частыхты тӧреміл алчатхан чуртағҷылар пар. Аның пасхалалчатхан сари – ілбіктелчеткені.
Ідӧк піс прай пу ниме-нооны амғы тусха килістіре тирiгнең сығарчабыс. Халғанҷы чылларда кізі тоғызын нииктир пӧгіннең фабрикада роботтар, компьютер программалары паза нап-наа тиріглер турғызылча. Пасха хазналарда сығарылған тирігде пастап позыбыс, мин паза хада хонғаным Сергей, тоғынарға ӱгренчебіс, анаң аны тоғынҷыларнаң таныстырчабыс.
– Хайди Сірер Россияда паза Хакасияда ниик промышленность киреен паалапчазар?
– Хомзыныстығ. Ирткен чылда азығ айында мин Хырғыс чирінде полғам. Оларның ниик промышленность предприятиелерінде тоғыс тиксі компьютерліг тиріглерде толдырылча. Ол саринаң піс пілдірте соона халчабыс. Ноға? Прай ол тиріглер аарлығ турчалар. Кічіг предприятиелернің аны садысчаң даа, тоғыс тузында тӧреміл хайығда тутчаң даа оңдайлары чоғыл. Кічіг городтарда, Харатас осхас, килістіре квалификациялығ специалисттер чоғыл. Пістің предприятиеде ол кирекнең хада хонғаным Сергей айғасча. Инженер ӱгредігліг кізі прай тирігнің пӱдізін паза хайди тоғынчатханын тӱптестірібісче. Пос инженері чох предприятиее ол уғаа сидік. Пӧзік технология тиріглері андағох пӧзік пілісті киректепче. Улуғ городтарда пӧзік квалификациялығ специалисттер цехтар ӱчӱн кӱресчелер. Сидіксініс чоғыл.
Таныхтирға кирек, пістің кип-азах тікчең машинкаларны тыхтаҷаң ус пар, че андағ устар аразында Хакасияда ол иң чиит, итсе, ағаа 56 час. Че пӧзік технология тиріглерінзер піс аны чағын кирбинчебіс. Ноға? Аның пілізі читкiҷе нимес.
Хакасияда ниик промышленность тилир ӱчӱн паза ӱгренҷілерні пос киреенең айғасчатханнарның кирексініcтерінҷе ӱгредер ӱчӱн, республиканың ӱгредіг министерствозына пос киреенең айғасчатханнарнаң пірге тоғынарға киректелче.
– Халғанҷы туста удаа истерге килісче, предприятиелернің ӧӧн сидіксінізі – пілістіг тоғынҷылар чидіспинчеткені...
– Сурығ турча квалификациялығ тоғынҷылар чидіспинчеткенінеңер. Ноға? Пӱӱнгі кӱнде республиканың ӱгредіг министерствозы пісті испинче. Пастағы сидіксініс чал ахчазынаң палғалыстығ. Оларның чал ахчазы, пістің чіли, тоғыс салтарларынаң палғалыстығ нимес. Предприятиеде хомай тік салғазың – сағаа ол нимені айландыр пирерлер. Син аны тӱзедерзің. Ӱгредігде олғаннар профессия алып алғаннар, че оларны ниме идерге ӱгрет салбааннар, андағ даа полза, ӱгретчілер чал ахчазын алып алғаннар. Палғалыс иптелгенҷе пу сурығ турар. Кізі, тізең, піске читче.
– Сірер олғаннарнаң хада профессияа кӧстирінҷе тоғыс апарчазар, студенттер чи сірерзер практикаа кил парчалар ба?
– Піс Харатастағы кӧп кӧстегліг техникумдағы, Хакас хазна университедіндегі паза Хызылчардағы дизайн колледжіндегі студенттерге практика иртер оңдай пирчебiс. Пу ӱгредіг учреждениелерінең чӧптезіг пар.Таныхтирға сағынчам, Хызылчардағы дизайн колледжінің студенттері уғаа пӧзік синде тимнелчелер. Оларның ікі кӱн теория, ікі кӱн практика килісче. Ирткен чылда ӱзінҷі курстағы хыс піске истерге хоостарны тимнеен. Уғаа чахсы тоғыс. Мин пістің ӱгредіг пірігістеріне пу чолҷа парарға алғапчам.
Аннаң пасха, піс Харатастағы хоос школазынаң тоғынчабыс. Пӱӱл аңда олғаннарны дизайнға ӱгретчелер. Піс оларға экскурсия иртіргебіс, мыннаң мындар олғаннарға практикум иртірер сағыс пар.
– Чоохтап пиріңер, хайдағ хазна хабазиинаң сірер тузаланғазар, кем хайди хабасча?
– Хакасияның экономика тилізі министерствозы піске хаҷан даа полызарға тимде, ол санда чӧптернең. Піс наа тиріг садысхан хорадығларның чардығын айландырарына субсидия алғабыс. Пастағызын на піске сығарған ниме-нообысты маркетплейссер читірерге хорадығларның чардығы айландырылған. Пу піске пілдірте хабазығ полған.
Ниик промышленностьты кӧдірерінҷе тоғыс апарылча: пу кирекнең айғасчатханнарға форумнар паза кӧзідіглер иртірілче. «Минің пос киреем» кін ӱгредіг иртірерінҷе паза сертификат аларынҷа улуғ тоғыс апарча. Ол кін піс тӧстелген туста тоғынған полза, піс хай-хай чапчаң тилирҷікпіс паза хай-хай асхынах алҷаастар идерҷікпіс. Ӱгренҷең оңдай пары уғаа чахсы.
– Оксана Анатольевна, Сірер позыңар ӱгренерге хынчатханыңар кӧрінче.
– (Хатхырча. – Авт.) Пістің тоғыста іди салыл парған: пастап позыбыс ӱгренчебіс, анаң тоғынҷыларны ӱгретчебіс. Тоғына-тоғына, олар тиріглерні піcтең артых пілчелер, че піс тее хайдағ-да чӧп пир полчабыс.
2022 чылда мин Россия президентінің устағҷы кадрларын тимнеҷең программазынҷа ӱгренгем. Ол мағаа уғаа тӱзімніг полған. Ырах ӱгренерге парбаам. Тоғыста тӧреміл поларға киректелген. Аннаңар Хызылчарда ӱгренгем. Идінҷектерге пу программаны иртерге чӧп пирчем.
– Оксана Анатольевна, сірер пос киреенең 22 чыл айғас парирзар. Чоохтап пиріңер, ниик промышленностьха хазна хабазии хайдағ туста иң кӧріндіре полған алай сірер ӧӧнінде пос кӱзінең кӧдірілгезер?
– Пілчезер бе, Валентин Олегович (Хакасия пазы. – Ред.) килгеннең сығара республика ӱлгӱлері пос киреенең айғасчатханнарзар «сырайларын айландырғаннар», хайығ пілдірте алыс парған. Хазнада даа, арса, хайығ алысхан, кічіг паза ортын пос кирее тиксі хазнабысты тилідеріне чахсы оңдайға саналча, че Хакасияны алза, кирек, Валентин Коновалов республика пазы полыбысханда, алыс парған.
– Хырғыс чирінзер Сірер пос алынҷа чӧргезер?
– Мин позым алынҷа чӧргем. Позыбыс чахығларны толдырарға маңнанминчабыс, аннаңар оларнаң тоғынарынҷа палғалыс тӧстирге парғам. Тоғын кӧргебіс. Прай ла тоғыс иптіг парбаан. Чахығлар прай кирексіністерге килістіре толдырылбааннар. Хомай толдырылған тоғыстарны нандыра айландырарға, хырығларны иртерге сидік полған. Че олар тӱзедерге тимделер. Тоғырланминчалар. Пазағы чахығ сала чахсы толдырылған.
Аннаң пасха, піске Москвадағы кічіг паза ортын пос киреене хабасчаң кін пасха хазналардаң – Пакистаннаң, Тайваньнаң, Малайзиядаң – тоғынҷыларны ағыларға чӧптепче. Оларны ағыларына квота аларға киректелче.
– Тоғыс орыннарын тӧстирге кирек?
– Я. Че, хайди кӧрчезер, пістің мында тарғынҷах. Піс «стенелерге урун пардыбыс». Аннаңар піске пір улуғ тура кирек, ағаа хоза ол город істінде орнығарға кирек. Фабрикада ӧӧнінде ипчілер тоғынчалар, кӧбізі палалығ, аннаңар оларның ибзер, олған садынзар алай школазар чапчаң чидіп алҷаң оңдай поларға кирек. Пірееде палалар, пірееде ус ипчі позы даа ағырыбысча, имнег туразынзар парарға киректелче. Аннаңар транспорт чахсы чӧрчеткен орын поларға кирек.
– Пасха хазнадаң тоғынҷыларны ағылары ідӧк кӧп сурығны пӧгерге киректепче.
– Иң пастағызын, чарадығ аларға киректелче, анаң – чурт тимнирге. Пілдістіг, тоғыс орны паза чал ахчазы полар.
– Ол сурығларны пӧкчезер?
– Піс прай оңдайларны кӧрчебіс. Ноға? Фабрика ниме-ноозына кирексініс пар. Хазнаа ниме-ноо тікчеткен предприятиелер чидіспинче, ол санда ӧнетін чаа операциязының кирексіністерін толдырарға.
– Ӧнетін чаа операциязына теелгенде, Оксана Анатольевна, сірернің предприятие полызығ киреенде араласча ба?
– Піс СВО-да ирі ӱреен ипчее, пістің тоғынҷаа, полысхабыс. Чобағ пол парғанда, ол нинҷе-де тус тоғынмаан. Че піс ағаа пенсия тӧлелгенҷе ахчанаң хабасхабыс.
– Ӱстӱнде адалған cурығларны пӧгерінең пасха хайдағ пӧгіннер турғысчазар?
– Мин ікі проект тимнепчем. Оларның пірсі «Авоська» адалча. Аның ӧӧн сағызы – чир-суубыстың тархын ис-пайын паза «Хакасияның Хызыл киндезіне» кирілген аң-хустаңар пілістерні тарадары. Сӱӱмекте хайадағы хоостар пирілер алай Хызыл киндедегі пірее аң-хустаңар хысха искіріг сомынаң хада турғызылар. Олох туста «Авоська» сӧбіре бюджедін ӱзӱрлирге паза экологияа ӱрег ағылбасха полызар. Хайди? «Авоська» – ол кізі тӧреміл хада ал чӧрчеткен сӱӱмек. Сумкада ағаа кӧп орын кирек чоғыл, аннаңар аны хада ал чӧрерге сидік нимес. Садығ туразында, тізең, ол полиэтилен пакеттері орнына туза полар. Іди кізі артых пакеттерні албас, оларны сӧп-сапсар тастабас, салтарында, чир-чайаанға ӱрег иділбес. Аныңох сылтаанда сӧбіре бюджеді ӱзӱрлелер. Сананыстар хоостыра, сӧбіре чылда 1000 – 1500 салковай пакеттерге хоратча. Пу проектнең мин Россия президентінің культура пастағларының грант мариина сығарға тимненчем.
Паза пір проект ӧсчеткен тӧлнің паза чуртағҷыларның профессиязынаң танызарынаң палғалыстығ. Сағам аннаңар чоох апарарға ирте. Ӧӧн сағыс пічікке салылча.
– Оксана Анатольевна, алғыс азых чоохтазығ ӱчӱн. Сағыстарыңны чуртасха кирерге алғапчабыс.
Сом Дмитрий Сунчугашевти
СӦС СОО: Оксана Макович «Хакас чирі» республика газетазының хабарҷыларына Харатастағы кип-азах тікчең фабриканың тоғызын тиксі кӧртіс пирген, полған на робот, компьютер паза тиріг хайди тоғынчатханын чарытхан. Орыс чонның ырлапчатхан чайаачы ӧмелеріне удаа чон кип-азаан тігерге киректелче. Ағаа, тізең, ӧнетін хоостығ истер кирек. Фабрикада оларны сублимация оңдайынаң исте сығарып пастабысханнар. Фабриканың ідӧк пысчатхан, чібекнең хоостапчатхан, тікчеткен робот-машиналар пар.
Неделяда ікі хати фабриказар городтың ӱс школазының ӱгренҷілері кил парчалар. Оксана Анатольевна оларнаң хада позы тоғынча. Ол тоғыс «Скроить мечту» проектче апарылча. Олғаннар фабриказар хынып кил парчалар.
Пірее формаларда хакас хоостары паза хайадағы хоостар тузаланылча. Тренерлер ол хоостарның кӱзін дее таныхтапчалар. Че сағам хакас хоостарынаң чазалған кип-азах алынҷа чахығларда ла тузаланылча. Алынҷа сығарар сағыс пар.
(Хакасия правительствозы, национальнай паза территориальнай политика министерствозы хабазиинаң сығарылған)
Автор :
Чоохтасхан Наталья Сюптерекова
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде