Удур сығар ир пар ба?
26.01.2024
Хабарлар
Хайдағ махалығ мике
Национальнай спорт кӧрiмнерi. Пiстiң чон хас-хаҷаннаң сығара пайрам-ӱлӱкӱннер тузында марығлар иртiрҷең. Анда кӧп кiзi араласчаң. Пӱӱнгi кӱнге читiре оларның пiреезi хайраллал халған
Тилекейде чӱзерлеп, муңарлап пасха-пасха ойыннар паза марығлар саналча, неке. Оларның саны кӧптелiп ле одырча, наа кӧрiмнер тудығ чох хозылча. Че оларның пiреезi, чыллар сыныхтаан ирт полбин, чiтчелер. Кiзiлер хайиин, тiзең, пурунғыдаң сығара хайраллал халған хынығ ойыннар, марығлар тартчалар. Олар чон спортының кӧрiмiне саналчалар.
Ойыннарда паза марығларда чонның чуртапчатхан оңдайын, аның кӧрiс-сағызын, iстенiс кибiрлерiн, кӧстег-хайызығларын сизiнерге чарир. Марығларда араласханы, чиңiс тударға харасханы кiзiнi кӱстiг ле поларға тимнебинче, iдӧк тоғыста ӧткiн тудынарға, ыырҷыдаң тоғыр харбазарға, сидiктернi сыдамах тобырарға маңат кӧстег пирче. Оларның чон хынчатхан кӧрiмнерi чыллар тобыра иртiп одырчалар паза тилiпчелер. Мында кӧзiдiмге якуттарның ағаснаң тартызар спорт кӧрiмiн ағыларға чарир. Амғы туста спорттың пу кӧрiмiнҷе чоннар аразындағы марығлар иртiрiлчелер. Кӧп хати чиңiс тутхан араласчыларға Россияның саблығ спорт узы аарластығ ат пирiлче.
Че мында хоза танығ идiлче: пу якут чонның национальнай спорт кӧрiмi полча. Нимедiр ол национальнай спорт кӧрiмi? Мында аймах-пасха танығларға орта поларға чарир. Россия Федерациязының физическай культуразынаңар паза спортынаңар федеральнай законда мындағ оңнағ пирiлче: «Национальнай спорт кӧрiмнерi – ол спорт кӧрiмнерi, хайзылары пурунғыдаң сығара Россия Федерациязының пiр ле субъектiнде чилегелiг чон аразында тилiпчелер», че Россия Федерациязының хырығлары озаринда ол «этническай спорт кӧрiмнерi» адалча.
Пӱӱнгi кӱнде Россияда национальнай спорт кӧрiмнерiне 8 спорт кӧрiмi кiрче: аңҷылар саназынаң чӱгӱрерi, керешу, мас-рестлинг, таврели, хапсагай, хуреш, шотсанлат, якуттарның санах азыра сегiрерi.
Хакасияның национальнай спорт кӧрiмнерiнiң федерациязы пiстiң чонның 5 спорт кӧрiмiнҷе республика синiнде марығлар иртiрер оңдайлар тимнеп салған: ат чарызы, охчаадаң атары, кӱрес, тобит паза хапчаң тас. Олох арада Асхыс аймаандағы физкультура ӱгретчiлерiнiң пiрiгiзi чонның тузаланысха кирiлген спорт кӧрiмнерiне хоза 8 спорт кӧрiмiн кир салған: ағаснаң тартызары, хурнаң тартызары, хол пазызары, тас тастиры, урух тастиры, сырғайлығ чарыс, хазых, пакпа. Таныхтирға кирек, спорттың пу кӧрiмнерi Асхыс аймаанда халғанҷы 27 чыл аразында иртiрiлчеткен марығларда сыбыра тузаланылчалар, кiзiлер оларда хынып араласчалар.
Мында сурығ турыбысча: ойыннарны паза марығларны хайди пӧлiп аларға? Оой нимес сурығ. Хайзын-да алнынзар сығарып, пасхазын соонда артысса, кирек саңай алыс парыбызарға айабас. Ағаа хоза, оларның хырығлары уғаа чуға. Пiлбинчезiң, хаҷан спорт марии ойынға айлан парыбызар, ойын, тiзең, спорт марии полыбызар.
Кӧзiдiмге ат чарызын ағыларға чарир. Пiстiң чон тузаланған аттар, чабыс таа ползалар, уғаа сыдамахтар, ырах чӱгӱрерге майыхпинчалар. Че олар амғы ӧнетiн марығда аралазарға тимнелчеткен, 1600 алай 3200 метрге чӱгӱрчеткен аттарнаң тиңнес полбастар. Пiстiң аттар 15 – 20 км ойлирға оой ла сыданчалар. Ол сылтағнаң орындағы аттарға алынҷа марығлар иртiрерге кирек. Тархын пiчiктерiн кӧрчетсе, анда ат чарызы ааллар аразында иртiрiлҷең полғаны таныхталча. Кiзiлер, арға-мӧрiй хайди парчатханын кӧрiп алар ӱчӱн, аалдаң аалға арланчатхан чол хастада турғлап салҷаңнар. Ырахха чӱгӱрчеткен аттарға пасхазы чох полҷаң хайдағ чолны тобырарға: кӧнi алай оймах-осхыллығ. Сыдасчаан на сыдасчалар.
Сибирьнiң iстезiгҷiзi Александр Васильевич Адрианов 1880 чылларда орындағы аттардаңар пiди пасхан: «...Аттар пӧзiк ниместер, кӧрiмi чохтар, че уғаа сыдамахтар паза табырах чӱгӱрчелер. Пiр часха 12 – 15 пирста ирте халчалар. Тынанмин, 6 час аразына 100 пирста ирт парыбысчалар». Аннаңар ат чарызы пiстiң республикада уламох хынығ иртерҷiк, кӧрiгҷiлер кӧп чыыл турарҷых.
Арға-мӧрiй тузында ат хайди чазалғанына, седок хайди тонанғанына хайығ айландырылҷаң. Итсе, ирткен чылларда оолахтар чабдах ойладарға хынҷаңнар. Амғы туста марыға iди сығарға пiрдеезi чаратпас. Ат чарызы хорғыс чох оңдайда иртерге кирек полча.
Ат чарызы тузында хайдағ изернең тузаланарға? Олар даа аймах-пасха кӧрiмнiглер нооза: казактарни, кавалеристтерни, спортсменнерни. Че пiстiң чон позының изерiн тимнеҷең, чазабысчаң. Амды аны пiрее ус нааҷыли тимнеп полар ба? Оолағас хайдағ кип-азах кизерге кирек? Че иң не ӧӧнi – пурунғы тустағы чоныбыстың сыдамах аттары халды ни? Олар тиксi сабланҷаңнар, махтаға сыхчаңнар. Иң чахсыларын хонҷых хазнаның хан-пиглерiне дее сыйлаҷаңнар. Iди Хыдат императоры пiстiң аттарнаң на чӧрерге хынҷаң осхас.
Пу даа сидiк сурығны пӧгiп алар оңдай пар. Шира аймаанда Пржевальскийнiң аттарын ӧскiрiп пастабысханнар. Оларны пiстiң орыннарға кӧнiктiрiп аларға кирек. Алай ба аал хонии сурығларынҷа НИИ-зар айланарға. Анда 2010 чылда пу сурығнаң айғасханнар. Мында маңат кӧзiдiм полча Чукоткада парчатхан сыныхтағлығ тоғыс. Анда орындағы адайларны нааҷыли ӧскiрiп аларға пӧгiн тутханнар. Кӧзiдiмнерi чахсы.
Пiстiң чонның национальнай спорт кӧрiмнерiн тӱзiмнiг тилiдер ӱчӱн, аның ӧӧн пӧгiнiн орта чарыт саларға кирек. Мында ағаа чахсы кӧзiдiм полча хакас кӱрезi. Чоныбыстың уғаа пай тархын. Киречi полча алыптығ нымахтар. Анда азымахчылардаң тоғыр алып ипчiлер, хыстар сыхчалар, тӧреен чирiн хазыр харбазығда арачылапчалар. Алтын Арығ, Пора Нинҷi паза даа пасхазы иреннернең тиңнең тиңе тудыс-хабыс апарчалар, чиңiс тутчалар. Анзы киртiндiрче нимес пе Хакасияда пурунғыдох ипчiлер кӱрезi полғанын? Хырғыс чирiнде «Алыш» (ипчiлер хурлығ харбасханы) марығ чоннар аразындағы синде иртiрiлче. Ипчiлер кибiрли тiгiлген кип-азахтығ харбасчалар. Улуғ хомзынысха, пiстiң андағ кип-азах ам даа тимге сыххалах.
Алыптығ нымахтарда ипчiлер паза хыстар иреннернең хабысчаң-тудысчаң кибiр пiстiң чирде 1960 чылларға читiре хайраллал халғаны чапсыстығ даа пiлдiрче. Iди ӱлӱкӱн-пайрамнар тузында чатчатхан иреннi азах узына турғыза хабар марығ полҷаң. Пии аймаандағы Хызыл хара суғ аал чуртағҷылары, тiзең, 1927 чылда тӧреен Арина Яковлевна Чебочакова паза 1933 чылда тӧреен Вера Афанасьевна Чебочакова (хыс фамилиязы Кызласова) иреннi iди хабар марығда сыбыра араласчаңнар, чиңiс тее тутчаң полтырлар. Iдӧк хол пазызар арға-мӧрiйде араласчаңнар. Ат чарызы тузында седок полчатхан хыстарны аймах-пасха марығлар тузында удаа кӧрерге килiсчең.
Амғы туста национальнай спорт кӧрiмнерiн мыннаң мындар орта чолҷа тилiдерiнде паза пiр сурығ cых килче. Анзы наука саринаң прай оңдайларны килiстiре чарыт турары паза орта кӧстеглер турғызары полча. Пӱӱнгi кӱнге Хакасияда андағ пiр ле iстезiглiг тоғыс пар. Ол Ю.Г.Кустованың «Хакастарның кибiрлiг культуразында олған паза аның кiчiг тузы» кандидат диссертациязы. Пу наука саринаң тимнелген iстезiглiг тоғыс прайзына азых, аны хығырып аларға чарир.
Олох арада Саха (Якутия) Республикада 7 кандидат паза 1 доктор диссертация тоғызы тимге сых парған. Ағаа хоза, пiр кандидат диссертациязы национальнай спорт кӧрiмнерiнiң пiр ле кӧрiмiне чарыдылча. Анзы ағаснаң тартызар спорт кӧрiмi. Хайди кӧрчебiс, пiстiң чонның национальнай спорт кӧрiмнерi хоостыра аймах iстезiглiг тоғыстарны апарарға чарир. Оларның пiрдеезi дее наука саринаң чарыдылбаан тирге кирек.
Мында сала даа iкiнҷiлес чох тобит ойынны кӧзiдiмге ағыларға чарир. Ол пiр дее чахсы iстезiлбеен ойын. Хайдаң сыхханын, хайда пасталғанын пiрдеезi орта пiлбинче. Аның чӧрiстерi дее кӧп талазығларға ағылча. Пастап хайда паза хайди ӧӧн марығлар иртiрiл турғаны санға алылбаан. Марығлар тузында кем кемнең ойнааны, хайди чӧр турғаны, кем чиңiс тутханы кӧзiдiлбеен. Че иң не ӧӧнi – марығларны хайдағ оңдайнаң иртiрерiн кӧзiтчеткен пiр дее полызығлығ пособие чоғыл.
Пiстiң чонның национальнай спорт кӧрiмнерiнҷе марығлар хайди иртчеткенiн толдыразынаң килiстiре чарытчаң сӧстер чидiспинче. Хакас-орыс алай орыс-хакас сӧстiктерде спорт сурығларына килiстiре сӧстер таппассың. Кӧзiдiмге алза, О.П.Анжиганова паза О.В.Субракова тимнеен чоохтасчаң орыс-хакас сӧстiктiң пастағы сығарызында спортха теелчеткен сӧстер чох таа полғаннар. Ол 2010 чылда хати сығарылғанда ла, алҷаас тӱзедiлген. Че аның кiрiзiнде хысхаҷах танығ идiлче: ол сӧстер чоохтазар ла синде пирiлчелер. Алай аны пирiлген сурыға хысхаҷахти нандырар оңдайнаң тимнелген тiп таныхтирға чарир. Пӱӱнгi кӱнге пiр дее ниме чарыдылбинча.
В.Я.Бутанаев паза А.А.Верник «Олғаннар ойыннары паза хакас чонның спорт марығлары» книга сығарыбысханнар. Анда тобит ойынны пiди чарытчалар: ол орыс шашкаа тӧӧй, аннаңар орындағы чуртағҷылар аразында тарап полбаан. Анзы пiстiң чонның тархынына килiспинче. Чон аразында тарабаан полза, тобит пӱӱнгi кӱнге читiре хайраллал халбасчых. Хайди пiлдiстiг, П.Н.Бодянский Россияда пастағы марығны 1894 чылда ла иртiрген. Анда 8 ле кiзi араласхан. Хакасияда, тiзең, орыс шашказы совет ӱлгӱзi тузында ла тарап пастаан. Аннаңар мындағ асхынах тусха орыс шашказы пiстiң чонның аразында iди табырах тарап парбасчых. Ағаа хоза, орыс шашказы паза тобит iкi пасха ойын. Анзын тобит марииның салтарлары даа маңат кӧзiтчелер: орыс шашказында даа, шахматта даа маңат кӧзiдiмнерге читчеткен кiзiлер тобитте утыр салчалар. Ол сылтағнаң сала даа iкiнҷiлес чох чарлирға чарир: тобит – хакас чонның пурунғыдаң сығара хайраллал халған ойыны. Анзы чиит тӧлiбiс чӱреенде поғдархас тӧрiдер, аалҷылар пу ойынны улуғлирлар.
Андағох оңдайнаң чоох апарарға чарир хакас кӱрезiнеңер. Орыс тiлiнде аны «борьба кӱрес» адирға харасчалар. Iди полза, «кӱрес кӱрес» пол парча. Аннаңар «хурлығ кӱрес» тiп адалза, килiстiре полғадағ чiли пiлдiрче. Анзы пiстiң чонның кӱрес мариина муңарлап чыл полчатханын кӧзiдер, чииттер чӱреенде iдӧк поғдархас тӧрiдер, пасха чонға маңат кӧзiдiм полар.
Прай пу кӧзiдiмнер пiстiң национальнай спорт кӧрiмнерiн мыннаң мындар тӱзiмнiг тилiдерiнде ам даа кӧп тоғыс идерiн маңат кӧзiтче. Хайди сизiнчебiс, мында аймах-пасха тимненiстiг кiзiлер аралазарға киректер. Сағамғы туста тiл сурығларынаң айғасчатхан устарның полызии артых полбасчых. Марығларны орта адир, спорт кӧрiмнерiн килiстiре чарыт салар, мике-сӱмелернiң оңдайларын искiр турар тоғыстар полза, чарирҷых. Ол танығлар хысхаҷах, че хайдағ даа марығның ӧӧнiн чарыт турзыннар.
Олох арада арға-мӧрiйде аралазарға килiстiре кип-азах киректелче. Олар пiстiң чонның кибiрли апарчатхан чуртас оңдайын кӧзiтсiннер. Марығда араласчатхан пасха кiзiлернине тӧӧй полбазын. Сағамғы туста ол тоғыс Хакасияда пiр дее апарылбинча.
Хазых паза пакпа ойнирға мал сӧӧктерi – хазыхтар – киректелчелер. Кем пiлер, аалҷыларның пiреезi андағ сӧӧктернi холға даа аларға хынмас. Аннаңар ол хазыхтарны пластиктең килiстiре тимнеп алар оңдай табылар тiп сағыс пар. Андада аны кӧп сығар турарға чарир. Чон аразында табырах тарирҷых, марығлар даа хынығ, хазыр ирт турарҷыхтар. Чоныбыс пу ойыннарға хынча. Iдӧк пластиктең тобит ойнаҷаң-чӧрҷең нимелер тимнирге чарир.
Охчаадаң таңма атчатса, топыр пастығ соғаннар тузаланылчалар. Пiстiң чон, тiзең, хаҷан даа устығ пастығ соғаннарнаң аңнаҷаң. Тӱрк тiллiг пасха чоннар охчаадаң таңма атар марығда сыбыра устығ пастығ соғаннарнаң тузаланчалар. Мының алнында хайдағ соғаннар полғанын музейде кӧрiп аларға чарир. Андох аймах-пасха охчааларнаң танызып алар оңдай пар.
Сынап пiстiң республикада национальнай спорт кӧрiмнерiн тилiдер пӧгiн пар полза, Хакасия правительствозына, спорт паза физкультура министерствозына, национальнай паза территориальнай политика министерствозына пу сурыға хайығ айландырарға киректелче. Оларның полызии чох кирек орнынаң тибiребес.
Сом «Хакас чирi» газетаның архивiнең
Автор :
Николай Сагалаков, Асхыс аймааның ӱгредiг устанызының специализi
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде