Ӱс пулуңнығ хоостар – тағлар, тоғылах – кӱн
26.01.2024
Хабарлар
Надежда Карамышева (сол саринаң iкiнҷiзi) шор ипчiлернең «Айланыс» фестиваль тузында
Хакасияның чоннары. Шорлар – ас саннығ чон, олар Хакасия паза Алтай республикаларда, Кемеров облазында, Хызылчар паза Алтай крайларында чуртапчалар. Пiстiң регионда пiр муң азыра шор саналча, ӧӧнiнде Асхыс паза Таштып аймахтарында чурттығлар
Таштып аймаанда пай тархыннығ чон Мадыр паза Аңчул аал чӧптерiнде чуртап парча. Таныхтабызарға кирек, Тлаҷах аалда (прай Хакасияҷа пiр ле андағ орын пар) шорлар культуразы кiнi тоғынча. Аның пӱдiрии 2015 чылда пасталыбысхан, Хакасия правительствозы национальнай киректерҷе федеральнай агентствонаң чӧптезiг идiбiскенде, федеральнай бюджеттең субсидия пирiлген. Прай пӱдiрiге паза мебель-тирiге 9 млн салковай парыбысхан (аймах паза республика бюджеттерiнең ахча тартылғанох). 2020 чылда пӱдiрiг тоозылғанда, кiннi пайрамни азыбысханнар, че 2022 чылға теере ол тоғынмаан. Пылтыр Таштып аймаа устағ-пастаа кiннi Хакасияның национальнай паза территориальнай политика министерствозына пирiбiскен, посха андағ пӱдірігні тударға ахча чидiспинче, неке.
Шорлар культуразы кiнi – ікі хадыллығ тура, анда пар: конференц-зал, аалҷылар чуртаҷаң, шор кип-азаан тiкчең, ағаснаң айғасчаң, кӧг тиріглерінең танысчаң пӧлiктер. Шорлар кiнiнең Надежда Карамышева устапча. Ол позы шор чонның хызы паза культуразынаң чахсы таныс, аннаңар аннаң шорлар чуртазынаңар чоохтасхабыс.
Надежда Ефимовна Мадыр аалдаң. Ол 2008 чылда иң пастағызын «Мустаг» орындағы хонҷых пiрiгiзін тӧстеен, анаң аны род пiрiгiзіне айландырыбысхан. Аның соонаң Мадыр аалдағы шорлар «Талай Суг» (2015 чыл, устағҷы Светлана Чебодаева), «Хызыл Суг» (2018 чыл, устағҷы Владимир Тоданов), «Чалтыс» (2020 чыл, устағҷы Наталья Шулбаева) пірігістер асханнар. Аңчулдағы шорлар, тiзең, «Тамыр» пiрiгiс тӧстееннер, амғы туста аннаң устапча Виталий Майтаков.
– Надежда Ефимовна, род пірігізі орындағы хонҷых общинадаң нименең пасхалалча?
– Род пірігізінзер хайдағ-да родтың на кiзiлерi кiрчелер, кӧзiдiмге алза, «Мустагда» минiң туған-чағыннарым на. Общинаа, тiзең, хонҷых аалларда чуртапчатхан шорлар пiрiкчелер.
– Сiрернiң кӧрiзiңернең, шор культуразы паза тiлi хайдағ синде хайраллалча?
– Хакас культуразын пiстинең тиңнестiрзе, пастағызы, пӧзiк синде хайраллалча, шорлар чоны хай-хай ас, аннаңар сидiксiнiстер кӧп ле. Тiлнi чииттер, палалар уғаа хомай пiлчелер, пiлбиндеечелер саңай, мин позым чоохтаспинчам даа, че кӧп ниме пiлiп алчам. Минiң iҷе-пабам паза аға-ууҷам матлама чоохтасчаңнар. Пiс, тiзең, шорлар ырын концертке таппин халчабыс, литература асхынах, ӧӧнiнде ӱгренҷең учебниктер ле пар. Сарын-кибелiстер табылбаза, пiс хабазығ соонҷа «Шория» пiрiгiссер айланчабыс. Пу халых пірігізі чӧбiнзер общиналарның устағҷылары паза ӧткiн шорлар кiрчелер, пiрiгiс 1990 чылларда тӧстелген, аның ӧӧн чахығлары – пiстiң кирексiнiстерiбіcке нандырарға, сидiксiнiстернi пӧгерiне хабазарға.
– Ахча саринаң шорлар пірігістеріне хайдағ-да полызығ пирiлче бе?
– Мының алнында Хакасияның национальнай паза территориальнай политика министерствозы пiрiгiстерге чыл сай 40-ар муң салковай пирҷең, ол материально-техническай база толдырарына парҷаң. Пiс «Мустаг» общинаны наа ла тӧстеенде, ол хабазығны пастағызын на алғанда, Новокузнецксер парып, шорлар кип-азаан тiктiргебiс, постарыбыс тік полбинчабыс, Хакасияда пасха чирлерде тiкпеҷеңнер дее. Ам, тiзең, пiске наа костюмнар кирек пол парза, Таштыптағы 16 № училищенiң тоғынҷылары удур парчалар, олар, шорлар кип-азаанаң чағын танызып, ам постары тікчелер. Училищенiң директоры Вера Сазанакова позы даа шорлар культуразы кiнiнең устаан, мағаа тоғызымда хабазарға молҷаан, аннаңар хада тоғынчабыс. Че халғанҷы чылларда, пiрiгiстер саны ӧзiбiскенде, 31-ер муң салковай ла пирiлче, анзы нимее чидер? Че ол син дее ахча кирек пол парча.
– Шор кип-азаа хакас кибiнең нименең пасхалалча?
– Пiстiң кип-азаабыста хоостар пасха, чахайах-ӧзiмнер нимес, геометрия оңдайлығ хоостар. Ӱс пулуңнығ хоостар – ол тағлар, тоғылах – кӱн. Мин сағынчам, шорлар кип-азаан, хакастарнинаң тиңнестiрзе, пісти кӧмес «хатығ» арах пiлдiрче, тайға чуртазына килiстiре полчадыр.
– Шорлар культуразы кiнiнiң тоғызынаңар чоохтап пирiңер.
– Пiстiң кiн iкiнҷi чылы тоғын парир, аның тоғызын мин устағҷы, методист, водитель, техничка, бухгалтер, тӧрт кочегар апарчабыс. Аймах-пасха мероприятиелер апарарға сiренчебiс, кӧзiдiмге, Иоанн Штыгашевке чарыдылған хығырығлар иртiргебiс. Анда Мадырдағы паза Чоғархы Таштыптағы школаларның 8-ҷі класс ӱгренҷiлерi араласханнар. Иоанн Матвеевич – Хакасияның пастағы шор писательi, ол литература тiлiнең кӧп ниме пас салған, ағаа чарыдылған iстезiглер апарары хаҷан даа тохтадылбас.
Ӱр ниместе пiс ӧнетін чаа операциязында араласчатхан чир-суғҷыларыбысха хабазығ ызыбысхабыс: олғаннарнаң талған тимнеебiс. Кӧченi, пуғдайны хаарып, пос холынаң теербенде тартып, чаҷын пакеттерге салғабыс. Пу чағында пазох андағ ас-тамах тимнебiзерге сағынчабыс.
Пiстiң кiнзер аалҷылар удаа килчелер, азынада чоохтазып алза, кiнде хонып таа аларға чарир...
– Пiр саңай нинҷе кiзiнi хондырып аларға чарир? Аның ӱчӱн ахча алылча ба?
– Устав хоостыра пiстiң кiн ахчалығ полызығлар пир полбинча, аннаңар ахча тӧлелбинче. Че пос кӧңнiнең хабазарға ноға чарабас? Пирерге чарир. Кiннiң ікінҷi хадылында 14 узуҷаң орын пар, кiзi кӧп полза, хада матрастар алып аларға чарир. Мында чайғызын той иртiргебiс, чир-чайаан аразындағы пайрам аалҷыларның кӧңнiне кiрген. Хакасияның национальнай паза территориальнай политика министерствозында пiске устав алыстырарға полыс пирзелер, пiс ахча тоғынҷаң оңдай табарбыс.
– Пасха шор пiрiгiстерiнең хайдағ тоғыс апарылча?
– Иң пастағызын, пiс «Шория» пiрiгiснең матлама тоғынчабыс, хабазығ соонҷа хаҷан даа андар айланчабыс, анда пiске наа сарыннар, кибелiстер таап пирерге полысчалар. «Шориянаң» Айра Николаевна Маргасова устапча, пiс, пiрiгiстiң чӧбiнзер кiрiп, ағаа аймах-пасха сурығлар пӧгерге полысчабыс. Аннаң хада фестиваль-марығларда тоғасчабыс. Хайдағ-да чылда, «Мустаг» общинаны тӧстеен соонаң, пiс Магаданзар чорыхнаң чӧр килгебiс. Анда, фестиваль осхас чыылығда, Севердегi паза Сибирьдегi ас саннығ чоннар танызарға, опытнаң ӱлезерге чыылысханнар. Андағ чорыхтар сағыста ӱрге халчалар.
Сом Надежда Карамышеваның архивiнең
Автор :
Чоохтасхан Тарина Бутонаева
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде