Хынған киреенең айғасча
07.02.2024
Хабарлар
Валерий Федотов тоғыс тузында
Социальнай чӧптезіг. Амғы туста айда чуртап парыбызар синнең асхынах парыстығ сӧбірелерге хазна чахсы хабазығлар пирче. Оларның пірсі – социальнай чӧптезіг
Мындағ оңдайнаң республиканың кӧп чуртағҷызы тузаланарға кӱстенче. Оларның пірсі Асхыс аал чуртағҷызы Валерий Федотов полча. Социальнай чӧптезіг полызиин ол пос киреен азарына алып алған.
Валерий Александрович Федотов ағастаң аймах ниме-нооны, школада ӱгренчеткендӧк, идіп пастаан. Улуғ ӧс парғанда, ол кӧп кирекнең айғасхан, че сыбыра парыс ағылчатхан тоғыс таппин турған. Олох туста туған-чағыннарына ағастаң ниме-ноо чайап пирҷең. Іди ирен узын таптаан. Социальнай чӧптезіг идер алнында ағаа ол полызығнаң хайди даа тузалан халарға чӧп пиргеннер.
– Социальнай чӧптезіг идер оңдайларны чарыт пиргеннерiнде, мин пічіктер тимнирге чаратхам. Хайди мағаа тееннер, ӧӧні тоғыс орнын тимнеп салары полча паза парыстардаң албан тӧлирге киректелер. Андада мин полызығнаң тузаланып аларға чаратхам, – чоохтапча Валерий Федотов. – Национальнай гимназияда ӱгренчеткенiмде, технология уроктарында ағаснаң тоғынып пастаам, ағас киртерінҷе кружокка чӧргем. Че ӱр айғаспаам, пір чылҷа занятиелерде ле. Саарбах тузында сағыстарым удаа алыс турған.
Школаны тоозып, Валерий Федотов Хакас хазна университедінің технология паза пос кирее институдынзар технология ӱгретчізі специальнозын аларға кіріп алған. Че анда ол ӱс ле чыл ӱгренген, пічіктерін алып алған. Аның соонаң ағаснаң айғаспиныбысхан, аймах-пасха чирде істенген. Халғанҷызын ол хадағ организациязында тоғынған, тимір чол объекттерін хадарған. Че кӧңніне кірбеен. Тоғыстаң саназар алнында, Валерий Федотов аннаң андар нименең айғазарбын тіп сағыныбысхан. Хайди ол таныхтапча, Хакасияда ағаснаң узанары иң килістіре тоғыс полар тіп чарадыбысхан. Пістің чирлерібіс ағасха пай нооза. Ол туста ағас паазы даа пӧзік полбаан.
Іди Валерий Федотов ағас тимнепчеткен предприятиелердең материал садызып пастаан. Аны ол, пурунғыларыбыс чіли, тура хырынзар сығарып, кӱнге хурғатчаң. Че хайди таныхтапча Валерий Александрович, андағ оңдайнаң материалны толдыразынаң хурғадып аларға сидік. Мебельге тимнелген ағаста сых асхынах поларға кирек. Кӱн алтында аны ол синге теере хурғат полбас. Ағаа ӧнетін камера киректелче. Че ол оборудованиені алып алза, мебель паазын ӧскірібізерге килізер. Андағ даа полза, Валерий Федотов одырчыхтар паза пасха даа ниме-ноо чайап турған. 2017 чылда ол таныстарына пастағы одырчығын хоости тимнебіскен. Соонаң узынаңар чонда пiлiп алғаннар. Че ол кирекнең сыбыра айғазар ӱчӱн, производствоны ӧскірерге киректелген.
Тоғызын оңдайлабысханда, Валерий Федотов чахсы качестволығ ниме-ноо ит сыххан. Кізілер чахығлар кӧп ит сыхханнар. Валерий Александрович социальнай чӧптезіг идібізерге чаратхан.
– Социальнай чӧптезіг пічіктерін тимнирге сидік полбаан. Ӧӧнінде бизнес-план пас саларға кирек. Мында пірее сидіксіністерге урунғам, анда пірее сурығлар пар, хайзына тың хайығ салбинчазың, – чооғын узаратча Валерий Федотов. – Мин чонға социальнай полызығ пирҷең устаныссар килгем, мағаа анда хайдағ пічіктер тимнеп саларға киректелчеткеннеңер чарыт пиргеннер. Бизнес-планым хоостыра устаныс специалисттері мағаа чахсы хабасханнар. Алынҷа алғызымны социальнай тоғысча специалист Олеся Васильевна Бурнаковаа читірерге сағынчам. Ол мағаа тузалығ чӧптернең полыс пирген.
Ӧӧн кирексіністернің пірсі – оборудование аларына садығ туразынаң чӧптезіг идібізері. Аны хоостыра полызығ пирілче, че оборудование паазы хайди даа пирілчеткен полызығ синінең аспазын. Валерий Федотов ол кирексініске тудынарға кӱстенген. Ағаа 349 муң салковай пирілген. Аны пір айдаң асхынах сахтирға киліскен. Іди ирткен чылда хандых айында аның банк счедына ахча кірген. Оборудование аларына паза сан пиріс идеріне пір ай пирілген. Ол тус ирт парғанда, Валерий Федотовсар социальнай полызығ пирҷең устаныстың пастыхтары сыныхтағнаң килгеннер.
– Пирілген ахчаа мин циркулярнай пилалығ паза чарытхынаң тоғынчатхан рубаноктығ станок, фрейзер паза материаллар алыбысхам. Ачырғасха, токарнай станокка ахча читпеен. Аннаң пасха оох-теек тиріглер садызып алғам, – теен узанҷых ирен.
Хайди таныхтапча Валерий Федотов, прай алылған оборудование ағаа пӧзік качестволығ мебель идерге оңдай пирген. Тоғызы даа аның табырах пар сыххан. Оборудование алар алнында даа кӧп чахығ полған, че оларны тузында толдырар оңдай чох полған. Амды социальнай чӧптезігнің кирексіністері толдырылча. Пос киреен пастаан кізі чіли Валерий Федотов парыстарының 4 %-ін албан тӧлепче. Тоғызының синін кӧдірер пӧгіннең ағаа хоза ахча киректелче.
– Тоғыс апарар тӧстег пар даа полза, хоза оборудование аларға хайди даа киректелче. Материалларны хурғатчаң тиріг пар паза ӧнетін мастерской тимнеп алғам. Че тиріг уйан тоғынчатханнаңар, мин кӧп чахығ ал полбинчам, ағасты читкіҷе хурғат полбинчам, – таныхтапча Валерий Александрович.
Амғы туста ағасты Валерий Федотов Пилтір аалдағы ағас тимнепчеткен предприятиедең садызып алча. Пӱӱнгі кӱнде ол харағайнаң паза хузух ағазынаң тоғынча. Пасха ағастарны аларына ӧнетін чӧптезіг идерге киректелче.
Валерий Федотовтың ӧӧн сидіксіністері – тоғысчылар чидiспинчеткенi паза істенерге килістіре орын чох полчатханы. Ағаа ӧнетін цех пӱдір саларға киректелче. Аның ӱчӱн Валерий Александрович парыстарының хайдағ-да чардығын киреенің тилізіне позытча.
Хайди таныхтапча Валерий Александрович, хада хонғанының полызии чох аның киректері дее киліспесчiк, неке. Елена Аркадьевна ағаа полған на пастағны чуртасха кирерге, сын арғыс чіли чӧптернең полысхан. Ирепчi ӱс палазын азахха турғысча. Тун оолғы Артёмға 14 час, София хызы 10 частығ паза очы оолғы Егор 7 частығ. Палалары пабазының тоғынчатханын хынып кӧрчелер, аны хоостыра ағаснаң тоғынарға ӱгренчелер. Пабазы ізенче, ооллары, ӧс парзалар, ағаа полыс турарлар. Пӱӱнгі кӱнде Валерий Федотовха арғызы хабасча. Сағам олар ікі хадыллығ тураларда пасхыстар итчелер. Ус холлығ кізінің сӧстерінең, Хакасияда узанҷаң тоғыснаң асхынах кізі айғасча, че ағастаң иділген мебельнi кӧп кізі аларға сағынча. Аннаңар Валерий Федотов пу киреенде улуғ чидіглерге чидіп аларына ізенче.
Таныхтирға кирек, ирткен чылда социальнай чӧптезіг хоостыра 1724 кізі полызығ алған. Ағбанда 434 кізі чӧптезіг иткен, Асхыс аймаанда – 193 кізі, Ағбан пилтірі паза Алтай аймахтарында – 143-ер чуртағҷы.
Сом авторни
Автор :
Антон Чертыков
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде