Мал ағырии тарабазын
14.02.2024
Хабарлар
Кӱн cурии. Асхыс аймааның устағ-пастаа туразында Хакасия пазының орынҷызы Юрий Курлаев, аал хонии министерствозының паза Асхыс аймааның устағҷылары чоннаң тоғасханнар
Тоғазығда Хакасияда тарапчатхан узелковай дерматит ағырығны тохтадар сурығлар ӱзӱрiлгеннер. Хайди таныхтаан Асхыс аймаа пазы Абрек Челтыгмашев, пӱӱнгі кӱнде Асхыста киректер сидік парча. Ағырығны тохтадар тоғыстар Калининде апарылғаннар, пастап чуғынҷах ікі орында сығысхан. Че ирткен неделяда узелковай дерматит Асхыс суғны «кис» парыбысхан. Аны хоостыра ағырығ сығысхан орыннарда малларны чох идердеңер чарадығ алылған. Асхыста федеральнай чол хыринда орныхчатхан туралардағы маллар сыныхталчалар. Ағырығ наа орында сығысса, андағы мал ідӧк чох иділер. Пӱӱнгі кӱнде Асхыста паза аннаң 30 км оортахта орныхчатхан ааллардағы малларға ағырығдаң тоғыр вакцина турғызыбысханнар, че, андағ даа полза, оларны сығарарға чарадылбинча. Аның ӱчӱн оларның ээлері тӧлеглер аларлар.
Хайди таныхтаан Юрий Курлаев, Боград паза Ағбан пилтірі аймахтарында ағырығ сығысхан аалларны чабысханда, вакцинация иртірібіскенде, маллар имге пір дее хайтпааннар, чуғынҷах наа орыннарда сығыспаан. Пӱӱнгі кӱнде пу кирекке полған на чуртағҷы нандырығлығ хайарға кирек. Ағырығны тохтатпаза, олаңай чуртағҷылар даа, кресен-фермер хоныхтары даа мал чох халарға айабастар. Чуғынҷах Асхысха читкенде, аалзар кірчеткен пірее чоллар чабыл парғаннар, пасхазында посттар турғызылғаннар, анҷа иртчеткен автомобильлерге дезинфекция иртірчелер. Аннаңар чуртағҷылар малларын орта тударға киректер, ағырығ тарабас ӱчӱн оларны пойли сығарбасха.
Республиканың аал хонии министрiнiң орынҷызы, ветеринария департаментiнiң устағҷызы Гульнара Керимованың сӧстерінең, малларға имнерні ікінҷізін турғызыбысса, олар узелковай дерматиттi 21 кӱн пазынаң хаптырбиныбысчалар. Анализтер пастыра мал ағырығны хаптырып алғанын алай вакцина турғыстырғанын піліп аларға чарир. Ағырығ уғаа чуғынҷахтаңар, пір ле мал ағырыбысса, прай хоныхты чох идерге киректелче. Кӧзідімге, Алтай аймаанда пір хоныхта 20 інек полған. Пастағы кӱнде пір ле мал ағырыбысхан, ӱзінҷі кӱнінде узелковай дерматит 17 інекте сығысхан. Пастағы вакцина турғыстырған інекті пір ай пазынаң соғымға пирерге чарир. Че ағырған малның идін чирге чарабас.
Хакасияның аал хонии министрi Сергей Труфановтың таниинаң, Россия ВТО-зар кірчеткеннеңер, хазна парыстарының ӧӧннерiнiң пірсі АПК полча. Аал хонии сығарчатхан товарны Россия хырығ озаринзар читірче. Аннаңар, ағырығ республикаа читкенҷе, вакцинация иртірерге чарабас полған. Хакасияда кӧп кресен-фермер хонии мал идін экспортха ысча. Ол сылтағнаң пір саңай прай малға вакцина турғызылбаан.
Мал ағыриин имнирге чарадылбинча. Узелковай дерматиттең имнелген мал ағырығны таратчаох. Аннаң пасха, маллар оттапчатхан орыннар ідӧк хорғыс ағылчалар. Аннаңар чуртағҷылар малларын нандырығлығ ӧскірерге киректер. Че пірее хоныхтарда мал азии читкіҷе ниместеңер, Асхыс аймааның устағ-пастаа отты хорғыс чох орыннардаң садызып аларға чарадығ алған.
Сом Асхыс аймаа администрациязы пресс-службазыни
Автор :
Антон Чертыков
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде