Арығларны сыныхтирына – наа техника
15.03.2024
Хабарлар
Пирікчулдағы лесничество пӧлиинің водительі Виктор Лемайкин паза устағҷызы Владимир Алексеев
Ағас хонии. Кӧрік айының 13-ҷі кӱнінде Хакасияның ағас хонии министерствозы лесничестволарға арығларны сыныхтаҷаң техника читірген
Абазадағы, Пирікчулдағы, Копьёвтағы паза Саяногорсктағы лесничестволарға пірер наа снегоход пирілген. Оларны садызарына федеральнай бюджеттең 4 миллион азыра салковай позыдылған.
Пылтыр улуғ хырлас айында пастағы тӧрт снегоход Таштыптағы, Пӱӱр пилтіріндегі, Сыралығ Ӱӱстегі паза Палыхтығ суғдағы лесничестволарға пирілген. Хысхыда пу техника арығларны сыныхтирында уғаа тузалығ полған.
Снегоходтарны читірерінде Хакасия пазының орынҷызы Юрий Курлаев паза республиканың ағас хонии министрі Олег Матвиенко араласханнар.
– Россия президенті Владимир Путин Федеральнай чыылығзар айланызында ағас хониинда тоғынчатхан специалисттерге чал ахчазын ӧскірерге пӧгін турғыс салған. Амды сірер наа техниканаң тоғынарзар, турыстығ чал ахчазын аларзар, ағас хонии тоғынҷызының тоғызын сабландырарзар.
Пу техника инспекторларға уғаа кирек. Машина прай ла орыннарда ирт полбинча. Снегоходтар кӧп чирҷе чӧр полчалар паза сайбағҷыларны тудып аларға полысчалар. 2023 чыл салтарларынҷа, сыныхтағлар иртірілгені хоостыра пістің чахсы кӧзідіглер, – таныхтаан Юрий Курлаев.
Пирікчулдағы лесничество пӧлиинің устағҷызы Владимир Алексеев паза водитель Виктор Лемайкин наа техника соонҷа килгеннер.
– Пӱӱнгі кӱнге теере пістің лесничествода снегоход чох полған. Мин аны чахыбаам. Алындағы кӱн піске наа техника пирілердеңер искірілгенде, матап ӧрінгебіс. Пирчеткеннерінде, хайди даа аларға кирек нооза.
Пӱӱл піске ідӧк квадроцикл пирерге молҷааннар. Ол уламох кирек. Снегоходнаң хысхыда ла тузаланарбыс. Ол наа чылға сыбы ағастарны чарадығ чох узурчатхан кізілерні тударға туза полар.
Квадроцикл арығларны ӧрттердең арачылирға паза сайбағҷыларны тударға полызар.
Пӱӱл хысхызын сыбы ағастарны узурчатхан сайбағҷыларны снегоход чолларынҷа тутхабыс. Хайдағ орында нинҷе ағас узурылғанын пазарға кирек. Снегоход чохтаңар, чазағ чӧрерге киліскен. Сайбағҷыны таап алғабыс. Пирікчул чуртағҷызы 15 сыбы узурыбысхан. Ӱрег 13 муңҷа салковайға тиңнелген. Чарғы ирт парған. Ағаа пис муң салковай штраф салылған. Ол 13 муң салковай тӧлебіскен.
Одың пилетепчеткен кізілер ағасты кизібіскен соонда салааларын чыы тартпинчалар, аннаңар оларға санитарнай сайбағ ӱчӱн 500 салковай штраф салчабыс.
Пістің тоғынҷыларның кӧбізі – ипчілер. Олар пічіктернең не айғасчалар. Иреннер чидіспинче, – теен Владимир Алексеев.
Часхызын ағас хонии министерствозы 14 квадроцикл аларға пӧгінче. Пу техника ағастарны чарадығ чох узурчатхан сайбағҷыларны тударға паза ӧрттер сығыспазын тіп сыныхтирға полызар. Пӱӱл министерство федеральнай бюджеттең пирілген 29 миллион азыра салковайға арығларны сыныхтаҷаң 20 техника садызар.
Сом Дмитрий Сунчугашевти
Автор :
Оксана Челтыгмашева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде