Чиңіcнең алғыстапчабыс
12.04.2024
Хабарлар
Наталья Пудова
Спорт. Халғанҷы туста пістің оол-хыстарыбыс, аймах марығларда аралазып, ибзер алтын, кӱмӱс, хола медальлығ айланчалар
Гиря хабары
Хосхар айының 4 – 7 кӱннерінде Казаньдағы «Ах Парыс» спорт ӧргезінде гиря кӧдірерінҷе чоннар аразындағы арға-мӧрій ирткен. «Николай Жеребцовтың мемориалы» марығда 9 хазнадаң килген чӱске чағын алып-кӱлӱк узын сынады.
Гиря кӧдірерінҷе Россияның піріктірілген командазына кірчеткен чир-суғҷыбыс Фёдор Жибинов анда араласхан. Ол 73 кг кӧдірімде чыылысхан алыптарнаң марығласхан. Гиря кӧдірерінде ікі кӧрім полған: чирдең сығара кӧні кӧдірері паза иңнінең сығара ідері. Іди пістің оол чирдең сығара кӧні 242 хати кӧдірібіскен, иңнінең сығара 183 хати ідібіскен. Андағ оңдайнаң чир-суғҷыбыс 304 сан чыып алған, чиңіcчі полыбысхан.
Аның соонда Фёдор Жибинов Россияның алыптарынаң хада командалар аразындағы эстафетада араласхан. 177 сан чыып алып, Россияның алыптары 9 хазна аразында пастағы орында полған. Ол кӧзідімге чир-суғҷыбыс 43 сан хосхан.
Аны Кирилл паза Василий Жибиновтар тимнепчелер. Амды Хакасияның алыбын наа марығлар сағыпчалар. Хосхар айының 11 – 14 кӱннерінде Фёдор Жибинов Уралдағы, Ыраххы Востоктағы паза Сибирьдегі федеральнай округтарының мариинда аралазар. Анзы Россия чемпионадына таллағ полар.
Олаңай кӱрес
Чебоксары городта гражданскай чаа тузында сабланған дивизия командирі Василий Чапаевтің хумартхызына чарыдылған тиксі Россия синіндегі улуғ турнир ирткен. Ол марығ хаҷанох кибірге кір парған. Пӱӱл ол 56-ҷы хати иртірілді.
Анда аралазарға, постарының устарын сынирға чыл сай даа кӧп кӱресчі чыылысча. Ол улуғлар аразында иртірілче. Постарының кӧдірімнерінде пастағы орын алғаннар Россияның спорт узы нормативін толдырыбысханға саналчалар. Аннаңар иреннер дее, ипчілер дее аразында харбазығ хазыр парча. Пӱӱл анда 180 артиинаң кӱресчі араласханы искірілген.
Хакасиядаң парған кӱресчілер санынаң Наталья Пудова махтаға сыххан. Ол, 50 кг кӧдірімде харбазып, прайзын хыра утхан, марығ чиңіcчізі полыбысхан. Хайди ӧрінмес андағ чидіге.
Аны олаңай кӱрес микелеріне кӧніктірче Россияның саблығ тренері, спорт ветераннары аразында тилекей чемпионы полған Марат Кичеев.
Грек-рим кӱрезі
ХГУ-ның студенттері, хайзылары спортнаң айғасчалар, аймах-пасха марығларда удаа араласчалар, чиңіcтерінең университетті тиксі сабландырчалар, пасхазына турыстығ кӧзідім полчалар.
Іди пу наада Новосибирсктең грек-рим кӱрезінең айғасчатхан ооллар айлан килгеннер. Олар анда студенттер аразында иртірілген Сибирьдегі федеральнай округтың первенствозында араласханнар. Арға-мӧрій 24 часха читкелек чииттерге кӧрілген. Марығда Сибирьнің тоғыс регионынаң 134 кӱресчі устарын сынааны таныхталған.
ХГУ-ның естественнай наукалар паза математика институдының студенті Сергей Чочиев, 67 кг кӧдірімде харбазып, ікінҷі орын алған, ибзер кӱмӱс медальлығ айланған. Менеджмент, экономика паза агротехнологиялар институдының студенті Руслан Палтушев 55 кг кӧдірімде ӱзінҷі орында пол парған, хола медальлығ ибзер айланған.
Сергей Чочиев (сол саринаң) паза Руслан Палтушев
– Мин грек-рим кӱрезінең 12 частаң сығара айғасчам. Мында чахсы кӧзідім полғаннар улуғ арғыстарым. Амды Россия первенствозына чахсы тимненіп аларға кирек, – чоохтапча грек-рим кӱрезінің спорт узы Руслан Палтушев.
ХГУ-да «Университет» спорт клубы уғаа тӱзімніг тоғынча. Анда аймах секциялар пар. Хайзын хынчазың, анзын таллап аларға, айғазарға, марыға тимненерге чарир.
Аар атлетика
Ағбандағы В.И.Чарковтың адынаң Олимп резерві училищезінің студенттері, Хызылчарда ирткен арға-мӧрійде аралазып, тиң частығлар аразында сыйыхтығ орыннарға сығып алғаннар. Пу марығ аар атлетикаҷа чоннар аразындағы класстығ спорт узы А.В.Киселевтың сыйии ӱчӱн чыл сай иртірілче.
Іди Харатас городтың командазы ӱчӱн турысхан Матвей Карнаухов 61 кг кӧдірімде, Максим Бучацкий 73 кг кӧдірімде, Дмитрий Пришиц 96 кг кӧдірімде, чиңіcчі полыбызып, ибзер алтын медальлығ айланғаннар. Оларны тренер Павел Арчимаев тимнепче.
Ағбаннаң парған алыптар санынаң Роман Пискунов 67 кг кӧдірімде чиңіc тутхан, Станислав Граубергер 55 кг кӧдірімде, Иван Резаев 49 кг кӧдірімде паза Александр Соколов 41 кг кӧдірімде ікінҷі орында пол парғаннар, Данил Евграфов 61 кг кӧдірімде, Максим Ушаков 55 кг кӧдірімде ӱзінҷі орын алғаннар. Ооллар тренер Игорь Боргояковтың устаанынаң пу спорт кӧрімінең айғасчалар.
Ис аалдаң парғаннар санынаң Татьяна Бастаева 49 кг кӧдірімде, Елена Мамышева 45 кг кӧдірімде, Вячеслав Юшинов 81 кг кӧдірімде, Алина Амзаракова 40 кг кӧдірімде, Алина Бастаева 55 кг кӧдірімде алтын медаль утханнар. Оларның тренері Владимир Еркибеев полча.
Пауэрлифтинг
Хосхар айының 6 – 10 кӱннерінде Тула городта 14 – 18 паза 19 – 23 частығ хыстар-ооллар аразында пауэрлифтингче Россия первенствозы ирткен. Анда штанганы, азах узында турып паза чадып алып, кӧкcінең кӧдірерге кирек полған.
Тулазар хазнабыстың 58 регионындағы 119 городтың 309 кізізі чыылысхан. Пістің республикадағы пірге спорт школазының оол-хыстары 14 – 18 частығлар аразында постарының устарын сынааннар. Чир-суғҷыларыбыс санынаң сыйыхтығ орынға сыхханнары парох.
Іди Вячеслав Фролов, 93 кг кӧдірімде марығлазып, чадып алып, 202,5 кг пасчатхан штанганы кӧксінең чоғар кӧдірібіскен, ікінҷі орында пол парған. Ідӧк кӱмӱс медаль холға кирген Эвелина Самсонова. Ол, чадып алып, 90 кг пасчатхан штанганы кӧкcінең чоғар кӧдірібіскен. Эвелина 57 кг кӧдірімде марығласхан.
Марыға оларны тренер Дмитрий Первухин тимнепче.
Сомнар Хакасияның спорт министерствозының паза Хакас хазна университедінің сайттарынаң
Автор :
Тимнеен Анатолий Султреков
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде