«Час ханат» чайаачы олған студиязына – 30 чыл
18.04.2024
Хабарлар
Чайаачы «чылтызахтар»
Пайрам. Пу чыл «Час ханат» олған студиязына, Россияның чон чайаачызының саблығ ӧмезіне уғаа танығлығ
Россия культуразының саблығ тоғынҷызы, Хакасия искусствозының саблығ деятельі, «Час ханат» ӧменің тӧcтегҷізі паза аның алыспас-парбас устағҷызы Игорь Боргояков піске пу улуғ тоғыстаңар пасталғанынаң сығара чарыт пирген.
– 1994 чылда, пір позырахта, телевизорҷа «Утренняя звезда» олғаннар передачазын кӧрчеткенімде, хонғаным Наталья Васильевна теен: «Син андағ ниме тӧстеп поларзың ма?» Ол сӧcтерні истіп, позым алынҷа сағын салғам, сынап таа чи, чайаачы ӧме тӧстеп аларҷых. Андада улуғларға сарыннар пасчаңмын. Анаң олғаннарға ідӧк ыр-кӧглер пазарға кирек тіп сағын салғам. Н.Ф.Катановтың адынаң Хакас гимназияның устағҷызы Егор Иванович Окуневнең тоғазарға парғам. Аннаң сурғам: «Сірернің чайаачы ӱгренҷілеріңнең хада, эстрада сарыннарын наа оңдайнаң сарнап, сценаа сығарға чарир ба?» Егор Иванович, мині истіп, нандырған: «Ит кӧріңер, мин чаратчам». Гимназияда музыка школазы полған. Класстарҷа чӧріп, палалар таллап алғабыс, – сағысха кирче Игорь Фёдорович.
«Час ханат» чайаачы олған студиязының
устағҷызы Игорь Боргояков
Игорь Фёдорович хакас тілінең табырах, кӧгліг сарналчатхан наа ырлар пас салған, аранжировка идібіскен. Ағаа хонғаны Наталья Васильевна чахсы полысхан. Ол гимназия хойнындағы музыка школазында палаларны домранаң ойнирға ӱгретчең. Чайаачы ирепчі ӧмені «Час ханат» студия адап cалған.
Олох чылда сілкер айында «Нымах» кӧклӧ театрында пастағы фестиваль иртіргеннер. Андар пастыхтарны, интеллигенцияны, туған-чағыннарны, нанҷыларны, таныстарны хығырғанда, чон залға чадап сыып парған. Чыылысхан кізілерге концерт кӧңнілеріне кірген, чӱректерін тибіреткен. Палаҷахтар пос тілінең наа сарыннар толдырғаннар, ачыныстығ теелбектенгеннер. Кӧрігҷілер пір дее андағ сарыннар испеен полғабыс тіп тың хайхааннар, пӧзік паалааннар, культурада мындағ кӧстегні пастааны орта тіп таныхтааннар. Саблығ режиссёр Эльза Михайловна Кокова сценадаң «Час ханат» студияны чылығ сӧcтернең чахсы алғаан. «Пу палаҷахтардаң сығара тілібіс, сарыннарыбыс, культурабыс мыннаң мындар ӧссін», – теен ол.
– Пастағы состав гимназиядаң полған. Че минің тун хызым Таня гимназияда ӱгренмеен, ол Ағбандағы 12№ школаа чӧрген, «Час ханатсар» 8 частығда килген, теелбектенген паза сарнаан. Аның соонаң, ікі чыл пазынаң, Андрей оолғым студиязар теелбектенерге чӧр сыххан.
Ідӧк пастағы составта полғаннар Оксана Тютюбеева, Карина Танбаева, Лилия Толмачева, Елена Кильчичакова, Елена Кокова, Анна Уязнова, Аима Кайлачакова. Ікінҷі чылында теелбек ӧмезі тӧстел парған. Анда пуох сарнаан палалар араласханнар паза хоза олғаннар килглееннер. Іҷе-пабалар, кӧріп, хайхап, палаларын піссер ӧткін чӧргіскеннер. Ол туста «Час ханатсар» чӱсче пала чӧр сыххан. Амғы даа туста анҷох олған чӧрче, – чоохтапча саблығ олған студиязының устағҷызы.
«Нымах» театрдағы концерт соонаң, пазағы 1995 чылда, Игорь Боргояков, Хакасияның аалларынҷа чӧріп, чайаачы палаларны чыып, республика синінде «Час ханат» пастағы марығ иртірген. Аның соонаң ол марығны кӧп хати иртір парир.
– 1996 чылда Республиканың культура туразының устағҷызы Николай Леонидович Печёнкин пісті, «Час ханат» олған студиязын, позынзар хығырған. Іди піске ставка пиргеннер, ахча тӧлеп сыхханнар.
Олох чылда піске Светлана Михайловна Аткнина хозылған, «Час ханатта» вокал пӧлиинің устағҷызы полыбысхан. Алында «Кӱн чахайағы» ансамбльда хорда сарнаҷаң. Светлана Михайловна пылтырғы чылға теере тоғынған. Ол олған студиязына улуғ хозым иткен.
1997 чылда піс олғаннарның фольклор ӧмезін тӧстеебіс. Аның устағҷызы Мария Сергеевна Сартыкова полған. Пір-ікі чыл тоғынғанда, олар, Свердловсксар парып, улуғ орыннар алғаннар. Ставка табылбаанда, фольклор группазы тарас парған. Мин пастыхтарзар чӧргемӧк, че олар полыс полбааннар, – чарытча устағҷы.
Соонаң «Час ханат» студиязар хореографтар Анна Ивановна Тинникова, Алена Сергеевна Тимофеева, Анжелика Юрьевна Топоева килгеннер. «Чылтызахтарны» вокалға кӧніктіріп, ынағ ӧменең хада ікінҷі чылы Хакас филармониязының ӧӧн вокалының специализі, кӱстіг ӱгретчі Татьяна Алексеевна Маслова тоғын парча. Ол сарынҷыларға пӧзік синге сығарға полысча. Игорь Фёдорович аннаң хада филармония тӧстелгеннең сығара, 35 чыл, чахсы ынағласча. Алында студияда чахсы сарнапчатхан олғаннарны Татьяна Маслованаң хада таныстыр сал турҷаң. Іди «Час ханаттың» араласчызы Ольга Васильева амды филармонияны сабландырча, Хакасияның саблығ артизі полча.
– Андағы кӱнге турыстыра теелбекчілер паза сарынҷылар программаларын тимнеп, Россияҷа, пасха хан чирінҷе ӧткін чӧр сыххабыс. 6-7 хати Турциязар читкебіс. Хай пірее ырҷы палалар Италияда полғаннар. «Час ханат» ансамбльнаң ікілер хати Франциязар, Польшазар, Болгариязар чӧргебіс. Нинҷе-де хати Моол чирінде полғабыс. Тайваньзар читкебізӧк. Илееде чӧрерге киліскен. Хакас кӧг тиріглеріне тӧстеніп, морсымнығ теелбектер тимнеп, чахсы костюмнар тіктіріп алып, фестивальларда, марығларда пос культуразын турыстығ кӧзіткебіс.
«Пингвин палаҷахтары» теелбек
«Утренняя звезда» телепередачада ікі хати араласхабыс. «Детское Евровидение» марығның Россиядағы финалына сығып алғабыс. Пу чыллар аразына «Час ханаттың» теелбекчілері паза сарынҷылары онар азыра Гран-при сыйыхты холға киргеннер.
Иң улуғ чидіг читі чыл мының алнында полған. Піс хазна синінде иң артых ӧмелернің аразына кір парғабыс. Іди «Час ханат» чайаачы олған студиязына «Россияның чон чайаачызының саблығ ӧмезі» пӧзік ат пис чылға пирілген. Ол тус ирт парғанда, пазох наа программа идіп, видеоға суурып, пічіктер, тимнеп, Москвазар ызыбысхабыс. Піcке пазох Россия синінде пӧзік ат пиргеннер, – чахсы чидіглерінең ӱлесче Игорь Фёдорович.
1998 чылда С.П.Кадышевтің адынаң культура кінінің улуғ залында «Час ханат» студияның концерті полған. Анда ол туста Хакасия устағҷызы полған Алексей Иванович Лебедь, Ӧӧркі Чӧп кнезі полған Владимир Николаевич Штыгашев одырғаннар. Олар концертке тың морсынтырлар. Анаң ікі кӱн пазынаң Асхыс аймаандағы Паза чазызында Тун пайрам полғанда, Владимир Штыгашев Игорь Фёдоровичке «Хакасия искусствозының саблығ деятельі» пӧзік ат пирген.
– Мин хахап таа парғам. Пятница кӱнде концерт турғысхабыс, позырахта удостоверение пирчелер. Хаҷан пічіктерні тимнирге маңнанған полҷаңнар? Тың хайхаам, мыннаң мындар улам чахсы тоғынарбыс тіп сӧс пиргем. Мындағ хайығ кізі кӧңнін улам кӧдіре алча, – тіпче И.Ф.Боргояков.
«Час ханат» студия хазна синінде тӧреміл истілчеткеннеңер, сабға сыхчатханнаңар, ағаа хоза, Игорь Фёдорович ӧменең илееде чыллар устапчатханнаңар паза культурада 1975 чылдаң тоғынчатханнаңар, холында Россия президенті Владимир Путиннің Аарластығ пічии полғаннаңар, ағаа – Игорь Фёдорович Боргояковха – ікі чыл мының алнында «Россия культуразының саблығ тоғынҷызы» пӧзік атты оой пиргеннер.
Игорь Фёдорович Боргояков Алтай аймаандағы Аршаннар аалында ӱгретчілер сӧбірезінде тӧреен. Пабазы Фёдор Егорович Асхыс аймаандағы Лырсы пилтірінең сыххан. Ол, институт тоозыбызып, Ӱc чулда тархын урогын апарған. Іҷезі Зинаида Тимофеевна Боргоякова (хыс фамилиязы Спирина) орыс тілі паза литература ӱгретчізі полған.
Игорь Боргояков музыкаа Ӱc чулда ӱбӱрҷең оркестрдең сығара тартылып пастаан. Оолах 6 класс тоосханда, пабазын агитация паза пропаганда специализі полып тоғынарға Асхыссар хығырып алғаннар. Ол, совхозтарҷа чӧріп, хакас тілінең политикадаңар лекциялар хығырҷаң. Пабазы райкомда тынаға теере істенген, анаң Ағбанзар кӧcкеннер.
– Асхыста 7-8 класстарда ӱгренчеткенімде, музыка школазынзар баяннаң ойнирға чӧрҷеңмін. 1973 чылда Ағбандағы музыка училищезінзер кірібіскенімде, «Кӱн чахайағы» ансамбльның оркестрінде баянистке одырт салғаннар. Пастағы баян Любовь Иосифовна Аёшинани полҷаң, мини – ікінҷізі. Піс хада илееде чыллар тоғынғабыс.
Музыка училищезін тоосханда, 1977 чылда армияа хабылғам. 1979 чылда службаны иртібізіп, хатабох «Кӱн чахайағынзар» айланғам. Андада ансамбльда орыс кӧг тиріглері полҷаң: балалайка, домра, контрабас, баян. «Кӱн чахайағы» ансамбль прай Совет Союзынҷа чӧрҷең. Бельгиязар, Финляндиязар, Люксембургсар, Ташкентсер, Казах паза Моол чирлерінзер, Москвазар читкен.
1982 чылда пӧзік ӱгредіг аларға Кемеровтағы культура институдынзар кірібіскем. Аны 1986 чылда тоосхам.
Анаң Ағбандағы А.А.Кенельнің адынаң музыка школазының директоры Анатолий Александрович Спирин мині тоғысха алып алған. Анда орыс кӧг тиріглері оркестрінең устаам паза баяннаң ойнаам. Іди тӱзімніг істенчеткенімде, 1992 чылда Евдокия Михайловна Кильчичакова радиозар тоғынарға хығырып алған. Анда олғаннар паза чииттер пӧлиинде істенгем.
1998 чылда Хакасияның культура министрі полған Владимир Герасимович Чаптыков наука-методика кінінең устирға чӧптеп алған. Анда істенгем.
2000 чыллар пасталчатханда, Асхыстағы телевидениеде хакас тілінең кӧні эфирлер, ток-шоулар иртірҷеңмін. 2014 чылда нандыра Ағбанзар килібіскем, – чуртас чолынаңар чарыт пирген Россия культуразының саблығ тоғынҷызы.
Игорь Фёдоровичтің тӧстелгеннең сығара студиязар сарнирға, теелбектенерге чӧрген тун хызы Татьяна Игоревна пабазының чайаачы чолынҷа парча. Ол, «Час ханатсар» чӧріп, узын таптап, Ағбандағы музыка колледжінзер хореографияа ӱгренерге кірібіскен. Ӱзінҷі курста ӱгренчеткенде, пабазы аны Москвадағы колледжсер ӱгренерге кир салған. Анда Татьяна хореография пӧлиин хызыл дипломға тоосхан. Анаң хазнаның ӧӧн городындох Россияның театр искусствозының институдынзар пӧзік ӱгредіг аларға кірген. Татьяна Игоревна «Час ханатта» морсымнығ илееде теелбек турғыс салған. Пӱӱнгі кӱнде ол Москвада С.П.Дягилевтің адынаң олған искусство школазында істен парча.
Игорь Фёдоровичтің ідӧк «Час ханатсар» чӧрген Андрей оолғы Москвадағы Патрис Лумумбаның адынаң Чоннар ынархазы университедін тоосхан. 15 чылҷа Аршан разрезінде істен парча, хара тасты пасха чирлерзер садып, коммерция устағҷызы полча.
– Отыс чыл аразына чайаачы тоғыс чахсы синде парған, улуғ читпестер тоғаспаан, хай пірее устағҷылар алысханнар, – таныхтапча И.Ф.Боргояков. – Культурада материальнай сурығ саринаң ам даа сидік. Студияда иргі аппаратураларнаң тузаланчабыс, нааҷылаҷаң оңдай чоғыл. Сурыныснаң удаа айланчабыс, че полыс полбинчалар. Улуғ залда ӧӧн аппаратура чахсы. Улуғ концерттер, Тун пайрам, Чыл пазы иртірерге аппаратура прай пар.
Пӱӱнгі кӱнде «Час ханат» студияның иң кічіг группазын Анжелика Юрьевна Топоева теелбекке кӧніктірче, ортымах паза улуғ частығ олғаннарны – Анна Ивановна Тинникова, Татьяна Алексеевна Маслова сарнирға ӱгретче. Игорь Фёдорович позы ідӧк олғаннарны сарнирға ӱгретче. Хоос устағҷы полып, ол ӧӧн программаларны, постановкаларны тимнепче.
Хосхар айының 19-ҷы кӱнінде 18.30 часта С.П.Кадышевтің адынаң чон чайаачызы кінінде «Час ханат» олған студиязының пайрамнығ 30 чылына чарыдылған чайаачы иир иртер. Анда «чылтызахтарның» устарын кӧріп алҷаң оңдай полар. Наа теелбектер, чонның кӧңніне кірчеткен, чапсых, кӧгліг сарыннар кӧп полар. Чайаачы палалар илееде: кічіг, ортын, улуғ частығлар.
«Час ханат» студияны тоосхан чииттер концертте ідӧк аралазарлар. А.М.Топановтың адынаң Хакас драма театрының артизі, «Иренек Хан» этно-рок ӧменің ырҷызы Юлия Тиникова-Чепашева сарнир. Ырҷы Игорь Толмашовты Хакасияда прайзы пілче, чайаачы иирде поларох. Ольга Аткнина пайрамнығ иирде аралазарға ӧнетін Москвадаң учух килер. Ырҷы Андрей Чаптыков ГИТИС-ты тоосхан, Москвадағы театрда тоғынған. Пӱӱнгі кӱнде Ханты-Мансийскте чуртапча, культура киреенде тоғынча. Ол килерге сағынған, че тоғыс оңдайлары хоостыра Хакасиязар чит полбас.
– Пайрамнығ чайаачы иирде иң артыхтары сценаа сығарлар, аннаңар концерт кӧрігҷілернің кӧңніне кірер, чахсы иир полар. Мин, аалларҷа чӧріп, чайаачы палаҷахтарнаң танызып, оларны «Час ханаттың» концерттерінде аралазарға хығырып алчам. Оларға фонограмманаң, сарыннаң полысчам, анаң чон алнынзар сығарчам. Пайрамнығ иирде Асхыс аймаандағы Пилтір аалдаң Катя Чебодаева узын кӧзіт пирер, – прайзын пайрамнығ концертке хығырча Игорь Боргояков.
Сомнар Игорь Боргояковтың архивінең
Автор :
Татьяна Тютюбеева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде