Чайаачызында – сӧбіре кибірлері
05.06.2024
Статья
Чайаачы ус Лариса Чебодаева
Іcтезігліг тоғыс
Лариса Ильинична Чебодаева – хакас тілінің саблығ ӱгретчізі паза істезігҷізі. Ол ідӧк олғаннарға паза улуғларға хакас тілінең кибелістер, чоохтар, нымахтар пасча.
Прайзына пілдістіг, олған литературазы ӱгредігде чахсы полысча. Олған литературазының чайаачы тоғыстары пӧзік ӱгредігліг синде поларға киректер. Андағ чоохтарны паза кибелістерні пас полар ӱчӱн, автор ибіркі чайаанға олған хараанаң хоос оңдайнаң кӧрерге кирек. Андағ писательлер аразында Лариса Ильиничнаны таныхтирға чарир.
Олғаннарға чарыдылған хоос произведениелер асхынах полчатханнаңар, Лариса Ильинична позы чоохтар пас сыххан полар, неке. Аның ол чайаачы тоғыстары пӧзік ӱгредігліг сағыстығлар, хоос оңдайлығлар паза учебниктерге кірер синге прай килістіре пазылғаннар.
Л.И.Чебодаеваның пастағы произведениелері «Хакас чирі» газетада, «Тигір хуры», «Кӱніҷек» олған журналларында чарых кӧргеннер.
2009 чылда аның пастағы «Уклинча ууҷаның чоохтары» чыындызы сыххан, 2017 чылда – «Ӧбекелер чолларынҷа. Уклинча ууҷаның чоохтары», 2018 чылда – «Ӧбекелер чолларынҷа. Айолка оолахтың чарых тӱстері», 2019 чылда – «Ӧбекелер чолларынҷа. Аң-хустарның ойыны», 2021 чылда – «Пала-пархаҷахтарға». Аның баснялары паза чоохтары школа программазына кирілгеннер.
Мына аның чайаачы тоғыстарында сӧбіренең палғалыстығ кибірлернің кӧзідімнері.
Сӧбіреде тудынҷаң кибірлер
«Сӧбіре – прай нименің ӧӧні. Анзын пілініп чуртаза, уғаа чахсы. Чонның хылынызын сӧбіреде тілирге кирек. Сӧбіре пик, кӱстіг паза кибірліг полза, тиксі чон андағох полча, нізе. Палаа кӱс, сағыс-кӧгіс іҷе-паба пирче. Ол полбаза, пала нимее чарабинча: парча ол чуртастың ағынынзар, анда патча, прайзы чіли поларға кӱстенче. Толка чох пол парча. Іҷе-пабаның, тізең, тоғызы – паланы чуртас салғағында посты чідірбин чӧрерге, посты пілінерге, постың орнын табарға ӱгрет салары. Олғанның ӧзені cӧбіреде пиктелче. Іди полбаза, палаа сидік, чонға сидік...»
«Сӧбіредегі хыныс – ол чуртас тооза парчатхан, чуртас тооза пиктелчеткен ниме. Ол хынысты, хан пірігіп, тӧреен тӧл пиктепче. Сӧбіредегі хыныстың ӧӧні – пала. Нинҷе кӧп пала, олох син пик сӧбіре, олох син пик хыныс поларға кирек. Прай нимені кибірли тудынза, ирепчі кізілернің аразындағы хыныс палаларзар парча. Хакас сӧбіреде прайзы удур-тӧдір хынызарға кирек, хыныс чох сӧбіреде палаларның хылыхтары сайбалча».
Аалҷыдаңар кибірлер
«Итсе, хайдағ даа аалҷы – ол аалҷы. Аалҷыны аарлирға кирек тіп ӱгретчеңнер пісті улуғлар. Аалҷынаң хада чуртха аарлас, талаан кірче тіҷеңнер улуғлар... Аалҷыда сым полҷаң, палам. Ээзінің хоостыра поларға кирек. Пістің чиизібіс – кӱстіг чиис, аны тастабин чӧрзе, тӧл хаҷан даа кӱстіг полар. Сизіндің ме, палам?»
Ир кізінең палғалыстығ кибірлер
«Иб аразы – ол уғаа кибірліг ниме. Мында ипчі кізінің пызығ холы, тіспені, аның аллығ чӱрее кирек. А ир кізі, тізең, ол олох ла пала, нізе. Ағаа тӧреміл хайығ кирек. Хыйға, сағыс-кӧгістіг ипчілер ирлерінзер улуғ оолларына чіли хайчалар. Ир кізее ипчі кізінің чылии, пызығ ас-тамаа кирек. Ипчі кізі, ир кізінің хыринда амыр, пілдіртпин чӧріп, аннаң устап одырча, ағаа прай саринаң чӧлег полып, полызып одырча. Кирек чирде ол аны тығырыбызар, кирек полза, чӧп пирер. Хайдағ даа чуртха чонның улуғлазы ир кізі пастыра кірче. Ир кізіні улуғлааны – ол улуғ ниме. Ир кізі сӧбіреде род пазы полча, ол чирінің арачылағҷызы. Чирі чох чон чоғыл, роды чох кізі чоғыл. Сӧбіре тӧcтебеен кізінің тузазы чоғыл. Сӧбіре – ол тӧл, нізе, палам».
«Ир кізі прай чуртаста кічіг ле пала осхас, нізе. Ир кізее ипчі саринаң полған на сай чылығ сӧс, чылығ кӧріс кирек. Ир кізінің худы уғаа ағыраңмай, аннаңар аны час паланы чіли хайраллирға кирек ипчі кізее. Полған на чуртта прай ниме ипчі кізіні ибіре айланча. Ипчі кізі чурттың чылии, аның хадағҷызы, ирінің паза палаларының прай саринаң имҷізі полча, нізе, палам...»
«Ир кізіні кӧдірзе, аның худы кӱстіг полар, аның худы хаҷан даа ӧӧрлир. Андада аның иң чахсы кӧңні ипчее, палаларына, сӧбірее, чонына читче, нізе, палам. Син, хызым, ундуба: хаңаа аттың алнында ойлабинча, ипчі кізі ир кізінің алнында полбасха кирек. Хаҷан ипчі, ир кізіні нимее салбин, прай нимені посха алынчатса, ир кізінің сӱрні пазылча, аның кӱзі чітче, худы майыхча. Пола-пола аның прай нимее холы тӱс парча. Ир кізі – ол олох ла час пала, хызым. Ол тилем чоохтанмас, прай ниме аның істінде. Пірееде ол прай нимені поста пазынарға сыдаспин даа парча...»
«Ир кізінің хуйағын хур пиктепче, ағаа кӱс пирче. Аннаңар хурын сағынып идерге кирек. Алында чібектең ӱрҷеңнер хурны. Чібектең ӱрген хур пик полҷаң, ідӧк тӧлдең тӧлге парҷаң».
Паланы ӧскірер кибірлер
«Паланың чуртазы іҷенің істінде пасталча. Пу тусты иртір салча ипчі кізі, пілінмин халып. Іҷенің кӧңні, сағызы, аның прай итчеткен нимезі, аның хылығы позында пар палаа теелче. Аннаңар тойлығ ипчее кибірліг поларға кирек, артых-пузух нимедең хыйа чӧріп. Пу туста ипчі прай чуртазын палаа чарытса, соонаң чахсы ӱрен полар аны аннаң андар ӧскірерге». Амғы туста хай пірее ипчілер пу кибірге тудынминчалар.
«Хынзаң, чылығ сӧстер чоохтап, сыйбап салып одыр, хынзаң, чоохтас салып одыр, ибіркі нимедеңер палаңа піліс пиріп; хынзаң, сурыныснаң айлан Ӧӧркі чайаанзар, хынзаң, кӧглеп одыр кибірліг сарыннарны... Пала іҷедең алча прай нимені, аннаң пір тыныстығ нізе ол іҷенің істінде. Хомай ла ниме итпе, тарыхпа, хомай хылынма».
«Пала тӧреен соонда алты айлығдаң чахсы-хомайны оңнапча тіҷеңнер улуғлар. Піс, тізең, аны ниме оңнабинча тіп, ойнаҷах чіли тудынчабыс, аның алығын алып. Пу тустаң сығара аның аймах-пасха хынии чох хылынызын чабыра пазарға кирек, чахсыны ӧскіріп. Пис часха читіре олғанны чахсы кибірлерге ӱгрет саларға кирек. Пала чахсы-хомайны пасхалап пілзін».
Родты оол пала апарарға кирек
«Пала – ол улуғ ниме, пала чонның тамырын апарча, чон ӱзілбезін тіп. Паланың ӱчӱн ағырарға кирек, паланың ӱчӱн сурынарға кирек. Сӧбіре толдыра полза, іҷе-паба пірлезіп сурынарға кирек паланың ӱчӱн. Родты оол пала апарча. Кізінің харындазы – ол аарлығ ниме, кӱс харындаста полча. Паба кізі, іҷе кізі аны кічігдең олғанға читірерге кирек...»
«Паланы посха палғирға чарабас тіҷеңнер улуғлар. Андағ паланың чолы азылбинча... Паланың позының чуртазы, ӱлӱзі».
Прай ниме ипчідең пасталча
«Чонның хуйағы, сӧбіренің хуйағы, родтың хуйағы прай ипчідең пасталған. Ипчі – чурттың чылии, ипчі – ир кізее нанҷы. Ипчі паланың кінін апарча, ипчі паланың кінін тутча, ипчі родты піріктірче, ипчі харындастарны палғалыстырча.
Прай ниме ипчідең парча. Ипчі кізі хайди полза, ир чон іди полча».
Сом авторның архивінең
Валерия Капсаргина, Н.Ф.Катановтын адынаң Хакас гимназиязының 9 класс ӱгренҷізі
СӦС СОО: Лариса Ильиничнаның чайаачызын тиксі ӱзӱргенде, мындағ салтарларға килгебіс. Аның «Ӧбекелернің чолларынҷа» чоохтар паза «Чуртас танығлары» очерктер чыындыларында хакас чонның кибірлері паза чуртас оңдайлары пазыл парған. Ӧӧн оңнығ матыр Уклинча ууҷа полча. Аның хыйғазын, амырын прай аал пілче паза аннаң чоохтазарға хынчалар. Уклинча ууҷа кибірліг кізі, аннаңар ол тик ле чирдең чӧптер пирбинче.
«Ӧбекелернің чолларынҷа» чоохтар паза «Чуртас танығлары» очерктер чыындыларында сын кибірлер кӧзіділче. Піс сағынчабыс, пістің хакас олғаннарға Л.И.Чебодаеваның пу чоохтары паза очерктері ортымах школаның программазына кирерге паза «Хакас чонның кибірлері» тема хоостыра класста нимес хығырығ иртірерге чарир.
Ідӧк хакас литературазы урогында кибірлерні ӱзӱреріне улуғ хайығ идерге кирек.
Пістің пу тоғызыбыста саблығ ӱгретчінің, хакас тілі науказының, пӧзік ӱгредігнің улуғ чуртас паза чайаачы чоллары чарыдыл парғаннар. Аның олғаннарға паза улуғларға чарыдылған чоохтарында ӱгредігліг, чир-чайаанның хоос омазы ілезінең сығарыл парған.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде