Сӧс пыласчатханнарның артыхтары
21.06.2024
Хабарлар
Тахпахчылар Зинаида Киштеева паза Людмила Ачитаева
Айтыс-2024. С.П.Кадышевтің адынаң чон чайаачызының национальнай кінінің алнындағы ачыхта республикадағы тахпахчыларның теестегі марии полған
Пӱӱл ол 34-ҷі хати ирткен. Аның тӧстегҷілері Хакасияның культура министерствозы, С.П.Кадышевтің адынаң чон чайаачызының национальнай кіні полчалар. Пӱӱл марығ Россиядағы Сӧбіре чылына чарыдылған.
Марығның ӧӧн пӧгіні – тахпах толдырар кибірні хакас сӧбірелерінде хайраллап халары. Тахпахчылар 7 – 17, 18 паза аннаң улуғ частығларға чарылғаннар. Ідӧк тахпахчылар олаңай паза кӧг тирии хоостыра сарнирға кирек полғаннар, анаң иң соонзар улуғ частығлар «Сӧс пыласханы» номинацияда араласханнар. Пӱӱл ідӧк «Тӧлдең тӧлге» наа номинация киріл парған, хайда сӧбірелернең марығлазарға кирек.
Паза «Сӧс пыласханында» азах меетке сыххан ікі иң кӱстіг тахпахчы Тун пайрамда Гран-при сыйых алар ӱчӱн ӧӧн сценаа сыххан.
Тахпахчылар мариина ӧӧнінде тӧреміл араласчатханнар чыылысханнар. Кӧбізі ипчі чон, иреннердең, тізең, улуғларны алза, «РТС» телевидениенің хабарҷызы Юрий Челтыгмашев ле полған. Анзы хомзыныстығ. Че кічіг тахпахчылар санында оолағастар полғаннар. Анзы чахсы. Соонаң олар айтыстарда аралас турарлар, арса.
«Айтыс» марығны иптіг ле апарған Хакасияның саблығ артизі Инна Майнагашева. Ол чыылған аалҷыларны араласчыларнаң таныстырған. Чарғыҷылар кнезі полған Россия Федерациязы ӱгредиинің саблығ тоғынҷызы, Хакасия науказының саблығ тоғынҷызы, педагогика наукаларының кандидады Мария Арчимаева паза ағаа полысханнар ХакНИИЯЛИ-ның фольклор пӧлиинің наука тоғынҷызы Юлия Чаптыкова, Россияның Писательлер, хабарҷылар паза театр тоғынҷылары пірігістерінің араласчызы, Хакасия культуразының саблығ тоғынҷызы Илья Топоев.
Анаң чыылыс парған тахпахчылар сарназарға тимнен салғаннар, хакас кип-азаана чазанғаннар. «Кӧг тирии чох тахпах» номинацияны асханнар 7 – 17 частығ араласчылар. Пастағҷызы полыбысхан Таштып аймаандағы Пыдырах аалдаң килген 8 частығ хызыҷах Вероника Сагалакова. Ол позының устағҷызы Аграфена Кунучакованың тахпахтарын толдырған. Кӧрінген, хызыҷах мындағ марығда пастағызын на араласча – кізілер аразында туртуххан. Соонаң, арса, марығларда удаа аралазып, ӧткін арах тудынар.
Аның соонаң сценазар сыххан 12 частығ Тимур Арыштаев позын тідімніг тудынған. Ол пылтыр айтыста араласхан нооза. Шира аймаанаң килген оолах Мария Зелееваның тахпахтарын ӧтіг ӱнінең толдырған. Ідӧк Зелееваның тахпахтарын ырлаан Марчылғас аалдаң килген 17 частығ хыс Мария Байдошева. Уғаа морсымнығ сарнаан Зинаида Киштееваның тахпахтарын 16 частығ Артемий Котожеков. Ол позы Аршаннар аалдаң. Хакас национальнай гимназия-интернатта ӱгренче. Мындағ марығларда удаа араласча. Уғаа чахсы, хаҷан мындағ ӧткін ооллар парда.
Ідӧк пастағызын на араласхан поларлар Асхыс аймаандағы Индіркі Пазадаң килген «Порчоҷах» ӧменің хызыҷахтары Тарина Ивандаева, Вероника Косточакова, Маиза Чертыкова паза Алиса Косточакова. Чуртаста хайдағ-да киректі пастабызарға ла кирек, анаң, кӧнік парыбысса, ол уғаа оой пар сығар.
Анаң кӧг тириинең ойнапчатхан тахпахчы хыстар сценазар сыхханнар. Диана Асочакова, Саяна Чепчигашева паза Яна Чебодаева, чатханнаң ойнап, Анна Курбижекованың тахпахтарын сарнааннар. Прайзы Хакас национальнай гимназия-интернатта ӱгренче. Хызыҷахтарның устары прайзының тиң полған тирге чарир.
Чиит тахпахчылар соонаң кӧг тирии чох улуғ частығ тахпахчылар постарының устарынаң сынасханнар. Оларның аразында республика синіндегі марығда хаҷаннаңох араласчатхан тахпахчылар Ефросинья Сагалакова, Зинаида Киштеева, Людмила Ачитаева, Алефтина Карамашева, Галина Торбостаева полғаннар. Прайзы теес хоостыра сценазар сых турған. Піреезінің тахпағында полған на сӧсті маңат истіп алчазың, че хайзылары халғанҷы сӧстерін «чібісчеткеннер» алай пулбураныбысчатханнар. Піреезі холда тутхан чаҷыннарынзар кӧрібісчеткен, сӧстерін ундут салзалар.
Оларның соонда кӧг тириинең ойнапчатхан тахпахчылар сыхханнар. Пу номинацияда Ағбан городтаң Юрий Челтыгмашев паза Асхыс аймаандағы Пуланнығ кӧл аалдаң Валентина Чебодаева полғаннар. Юрий Петрович, хомыснаң ойнап, тахпахтаан, Валентина Ильинична, тізең, чатхан хағып. Итсе-де, хынығ ла сарнапчатханда, аның чатхан хыллары сайбалған, че чатханнар итчеткен ус Сергей Чарков, кӧрігҷілер аразынаң сых киліп, чатхан хылларын иптеглеп пиріп, Валентина Чебодаеваа сарынын тоосханҷа хах турған.
«Тӧлдең тӧлге» номинацияда пір ле сӧбіре араласхан. Вера Арыштаева Тимур, Фёдор паза Кирилл пархаларынаң хада, чон алнынзар сығып, постарының Азах Сӧӧт аалынаңар тахпахтар салғаннар. Пу номинацияны киргені уғаа чахсы. Ууҷалар пархаларын тахпахтирға ӱгретчелер нооза. Вера Александровна позы даа мындағ марығларда паза ойыннарда тӧреміл аралазадыр.
Анаң парған «Сӧс пыласханы». Пу номинацияда кӱстіглернің кӱcтіглері, артыхтарның артыхтары араласханнар. Андағларның санына Ефросинья Сагалакова, Зинаида Киштеева, Людмила Ачитаева, Алефтина Карамашева, Галина Торбостаева кіргеннер. Иң пастап чітіг сӧстерінең тартызарға Зинаида Киштеева паза Алефтина Карамашева сыхханнар. Олар пірер куплет ле сарнасханнар, че чарғыҷылар оларны сизіндіргеннер – ікілер куплетнең тахпахтирға кирек. Анзы сидік арах полған.
Оларның соонаң Ефросинья Сагалакованаң Людмила Ачитаева артых сӧстерінең тартыcханнар. Чоохтирға кирек, олар прайзы даа мындағ айтыстарда хаҷаннаңох араласчалар. Аннаңар удур-тӧдір чахсы пілісчелер, пірсі пірсіне маң пирбинче. Ағаа хоза, сӧстернең тартызарға он минутаҷа ла пирілген. Іди пола-пола ікі иң кӱстіг тахпахчы табыл парған. Айтыстың азах меедіне Зинаида Киштеева паза Людмила Ачитаева читкеннер. Ана олар Тун пайрамда постарының устарын кӧзіткеннер.
Че пасхаларын, пастағы орыннар алған олғаннарны паза улуғларны, дипломнарнаң паза ахчалығ сертификаттарнаң таныхтааннар. Іди 7 – 17 частығ олғаннарның аразында пастағы орынны Артемий Котожеков алған, Мария Байдошева ікінҷі орында пол парған паза «Порчоҷах» ӧменің олғаннары Тарина Ивандаева, Вероника Косточакова, Маиза Чертыкова паза Алиса Косточакова ӱзінҷі орынны алып алғаннар.
Кӧг тирии хоостыра тахпахтар салған чииттернің аразында пастағы орынны алған Яна Чебодаева, ікінҷі орынға сыххан Диана Асочакова паза ӱзінҷі орында пол парған Саяна Чепчигашева.
Улуғ частығларның аразында кӧг тирии чох тахпахтааннардаң пастағы орынны алып алған Зинаида Киштеева, ікінҷі орынға сыххан Людмила Ачитаева паза ӱзінҷі орында пол парған Галина Торбостаева. Кӧг тирии хоостыра тахпахтар салған улуғларның аразында пастағы орында Юрий Челтыгмашев паза ікінҷі орында Валентина Чебодаева пол парғаннар.
Марығ чарғыҷылары айтысха килген чонны алғыстааннар паза килер чылда пазох аралазарға хығырғаннар.
15 хандыхта Асхыс аймаандағы Сағай чазызында азах меетке сыххан тахпахчылар марииның халғанҷы «Сӧс пыласханы» чардығы ирткен. Ол кӱн уғаа ізіг полғаннаңар, таң, оларға тартызарға 10 минута ла пиргеннер. Іди Зинаида Киштееванаң Людмила Ачитаева хынығ ла тахпахтас париғаннарында, тус тоозыл парған. Чарғыҷылар, ідӧк табырах ӱзӱрібізіп, «Гран-при» сыйыхты Зинаида Киштееваа пирібіскеннер. Аның сыйии 50 муң салковайға тиңнелген. Ікінҷі орында пол парған Людмила Ачитаеваа 40 муң салковайға сертификат киліскен.
Айтыс тоозылған. Амды ізенчезің, анда араласхан тахпахчылар пазағы марыға уламох чахсы тимнен саларлар паза наа чиңісчілер табыларлар.
Сом Альбина Чистогашевани
Автор :
Илья Топоев
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде