Боградта наа имнег туразы полар
28.06.2024
Хабарлар
Валентина Матвиенко паза Валентин Коновалов
Тоғыс чорығы. Хакасия пазы Валентин Коновалов, тоғызы хоостыра Москвада полып, федеральнай ӱлгӱдегі кізілернең тоғасхан
Иң пастап тоғазығ Россияның Федерация Чӧбінің кнезі Валентина Матвиенконаң полған. Олар анда республиканың экономиказын тилідер сурығларны ӱзӱргеннер. Ідӧк пістің гражданнарның социальнай гарантияларынаңар, бюджетке ахча кірердеңер, республикада аныпчатхан ниме-нооны пасха хазналарзар садарынаңар паза пасха даа сурығларға теелгеннер. Алынҷа чоох парған Боград аймааның ӧӧн имнег туразын пӱдірердеңер.
Валентина Ивановна республикада кічіг паза ортын бизнес предприятиелеріне пар чох саринаң полыс турарға чӧп пирген.
Анаң Хакасия пазы Валентин Коновалов Россияның хазых хайраллаҷаң министрі Михаил Мурашконаң паза Россияның Федерация Чӧбінің кнес орынҷызы Инна Святенконаң тоғасхан. Мында ӧӧнінде чоох парған республикада хазых хайраллир оңдайларны тилідердеңер. Амғы туста улуғ хайығ айландырарға кирек ааллардағы кічіг имнег тураларына паза оларның тоғынҷыларына. Хай пірее сурығларны федеральнай кіннің полызии чох пӧк полбас. Анзы Боградтағы ӧӧн имнег туразынаңар чоох полған. Сағамғы тура 2012 чылдох иңзеріл парардаң хорғыс полған. Соонаң ол тураны тиксі дее тыхтирға киліспес тіп чарадығ алғаннар.
Сағам ол имнег туразын пӱдірер чир табылған паза проект-смета пічіктері тимнел парған. Ахчанаң на полызығ киректелче. Россияның хазых хайраллаҷаң министрі паза Россия Федерациязы Чӧбінің кнес орынҷызы полыс пирерге молҷааннар. Ол оңдайнаң Боград аалда амғы оборудованиеліг наа улуғ ӧӧн имнег туразын пӱдірібізеріне ізеніс пар. Хакасия пазы Валентин Коновалов оларны пу сурыға улуғ хайығ салчатханнары ӱчӱн алғыстаан.
Хакасия правительствозы республикада хазых хайраллир кирекче улуғ тоғыс апарча. Пис чыл аразына имнег учреждениелеріне ахча позытханы ӱс хати ӧс парған. Ол тус аразына 30 азыра имнег туразы пӱдірілген. 150-ҷе учреждениеде тиксі тыхтағ тоғыстарын иртіргеннер. Чыл сай аарлығ имнег оборудованиезі, транспорт паза мобильнай комплекстер алылчалар. Имҷілерге аймах-пасха полызығлар пирілчеткенде, пасха чирлерзер парчатханнарның саны хызырылча.
Сом В.Коноваловтың телеграм-каналынаң
Автор :
Хакасия пазының паза правительствозының хабарлар пӧлии
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде