Анымҷох, школа!
03.07.2024
Хабарлар
Чииттер – Чир-суубыстың таңдағызы
Чииттер пайрамы. Тиксі республиканың аал-городтарында 11 класс тоосчатханнарның пайрамнары ирт парды. Ағбандағы оол-хыстар хандых айының 28-ҷі кӱнінде школаларынаң анымҷохтасханнар
Кибірли школа тоосчатхан чииттер, Хакасияның драма театрлары туразының алнында чыылызып, «Саяны» стадионзар чазағ парғаннар. Олар иртер тусха Щетинкиннің, Чертыгашевтің паза Вяткиннің орамаларын чардыхти чабысханнар. Чииттернің алнында Хакасия культуразының саблығ тоғынҷызы Андрей Штарктың устаанынаң Ағбандағы оркестр ойнап парған. Пӱӱл пайрам «Піс ӧӧрлепчебіс» тіп адал парған. Ирткен чылда ол Ағбанның Уставына ӧӧн кибірлерінің пірсі чіли киріл парған.
Тиксі Ағбандағы школаларны 1052 оол-хыс тоосча. Оларның санынаң 975 кізі городтың тиксі ӱгредігліг школаларын тоосча, 61 кізі – Хакас национальнай гимназиязын, 11 олған – харахтары паза хулахтары уйан олғаннар школаларын, 5-і – православнай гимназияны. Прайзы олар пірге хазна сыныхтағларын турыстығ иртібіскеннер. Н.Г.Булакиннің адынаң лицейнің, 1, 25№№ школаларның, Хакас гимназиязының 6 ӱгренҷізі ЕГЭ-ны 100 баллға тудыбысхан.
Пӱӱл школа тоосчатханнарның санында Россияның ӱгренҷілер олимпиадазының аймах синнерінде чиңіс тутхан паза сыйыхтығ орынға турысхан 300 азыра олған саналча, 270 азыра оол-хыс наука-практикалығ конференцияларда, спорт марығларында пӧзік чидіглерге читкен. 150 олған «Пастағылар чӧрімінің» паза «Юнармияның» ӧткін араласчызы полча. 179 кізі алтын паза кӱмӱс медальлар алған, 46 – «Хакасияның алтын ізенізі» медальны.
Ағбандағы 1№ школаның «Хакасияның алтын ізенізі» медальны алған чииттер
«Саяныда» чииттерні улуғ концерт программазы сахтаан. Аны городтың ӱгредіг устанызы паза олған чайаачызының кіні тимнееннер. Школа тоосчатханнарны чайаачы сыйыхтарынаң В.Г.Чаптыковтың адынаң Хакас филармониязының артисттері паза ӧмелері ӧріндіргеннер. Полған на чыл концертке хайдағ-да наа нимелер кирілче, че чыл сай кибірли іҷе-пабаларның сарыны толдырылча, чииттер вальс теелбектенчелер.
Стадионда чыылысхан чииттерні Ағбан пазы Алексей Лёмин удурлаан.
– Пӱӱн наа чолға сыхчазар. Анда сірерні кӧп наа ниме сағыпча. Мыннаң мындар нандырығлығ чарадығлар аларға, алҷаастар идерге, оларны тӱзедерге хорыхпаңар. Сидіксіністерні тобырып ла, пӧзік чидіглерге чидерге чарир, – таныхтаан ол.
Концерт соонаң оол-хыстар школаларынҷа тарасхлааннар. Олар аттестаттарын алғаннар, иң артыхтары матлама ӱгреністері ӱчӱн таныхтатханнар.
Ағбанның иң иргі школаларының пірсі 1 № школа полча. Пӱӱл аны 90 азыра оол-хыс тоосча. Оларны пайрамнаң Хакасия пазы Валентин Коновалов паза республиканың ӱгредіг паза наука министрі Анатолий Бутенко алғыстааннар. Валентин Олегович иң артых ӱгренҷілерге «Хакасияның алтын ізенізі» медальны читірген, аннаң пу школаны тоосчатхан 9 оол-хыс таныхтатхан. 23 кізі ӱгреністе матлама чидіглері ӱчӱн алтын паза кӱмӱс медаль алған.
Сом Альбина Чистогашевани
Автор :
Татьяна Кыштымова
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде