Хакас тілінең энциклопедия – интернетте
03.07.2024
Хабарлар
Рувикинің хакас тілі пӧлиинің редакторы Оксана Кайнакова
Тіл тилізі. Хакас тілін интернетке кирер пӧгінніг проекттернің пірсі РУВИКИ наа интернет-энциклопедия полча
Ноғадаңар ол наа тіп адалча? Тиксі алза, интернетте илееде энциклопедия пар, кӧзідімге, Википедия, Россияның улуғ энциклопедиязы, циклопедия паза аннаң пасхазы. Рувики, тізең, ӱр ниместе азылған, аннаңар аны наа тіп адапчалар. Проекттің устағҷызы Владимир Медейко полча. Наа онлайн энциклопедияның сыныхтағлығ кӧрімі 2023 чылның хандых айынаң тоғынып пастаан. Аннаң тузаланчатханнарға Рувикизер тӱзедіглер кирер оңдай орғах айынаң пирілген. Толдыра кӱзінең ол пӱӱл кӱрген айынаң тоғын сыххан.
Википедияа тӧстене чуртасха кирілчеткен проект аннаң пасхалалыбохча. Иң пастағызын, аны толдырарынаң, волонтёрлардаң пасха, редакторлар айғасча. Ағаа хоза, онлайн-энциклопедия эксперттернең тоғыс апарча. Іди Россияның наукалар академиязынаң, Президент библиотеказынаң, Москвадағы планетарийнең, Москва музейінең хада-пірге тоғынардаңар чӧптезіглер иділген. Оларның специалисттері тоғынчатхан кӧстеглерінҷе энциклопедияа пазылған статьяларны сыныхтапчалар. Паза Рувики, орыс тілінең пасха, 19 тіл пӧлии пар полчатханынаң танығлығ, прай 20 пӧлік. Ол Россиядағы чоннарның тіллері: алтай, башкир, пӱрӱт, вепс, ингуш, калмык, коми, коми-пермяцкай, карел (ливвиктер наречиезі), марий, мокшан, саха, орыс, татар, тува, удмурт, хакас, чечен, чуваш, эрзя.
Рувикинің хакас тілі пӧлиинің редакторы Оксана Кайнакова полча.
– Хайдағ даа наа проект тоғынып пастабысса, аның хайдағ-да читпестері сығыс килче, алҷаастары тӱзеділче. Аннаңар пурун аның сыныхтағлығ кӧрімі тоғынча. Хакас тілі пӧлии ирткен чылның кичкер айынаң тоғынып пастаан. Че ол пасха кізее кӧрінмеен, чон алнына ол пӱӱл хосхар айында ла сығарылған. Ам аны полған на кізі интернетте таап алар, – апарчатхан тоғызынаңар чооғын пастаан Оксана Юрьевна.
Иң пурун редакторға сайттың тастындағы кӧрімін, аны тілбестеп, тимнеп саларға кирек полған. Хайда-да пір сӧс, хайда-да сӧс пірігістері алай чоохтағлар даа полғаннар. Сайтха андағ 4,5 муңҷа ниме тілбестелген. Че, хайди таныхтапча Оксана Кайнакова, пу тоғыстың тӧстегҷізі ол ла полбаан. Сайттың кӧрімін пасха кізі тілбестеп пастаан полтыр, Википедияны хакас тіліне тілбестирге пӧгінген осхас. Пу онлайн-энциклопедия ідӧк волонтёрлар полызиинаң толдырылча нооза. Ол кізі тоғысты позы пастаптыр, аның илееде тілбестеглері сайтта халтыр. Анда пірее чирлерде алҷаастар пар, че сағам система оларны тӱзедерге пирбинче тіп чоохтапча О.Ю.Кайнакова. Че соонаң олар прай иптел парар осхас.
Наа чыл алнында Рувикинің хакас пӧлиинің тастындағы кӧрімі тілбестел партыр.
– Пістің тілбесчілер ӧмезі пар, олар мағаа пу тоғысты апарарға полысханнар. Ол оой ла кирек нимес. Сайтта наа сӧстер пар, орыс тілінең піс оларны чахсы оңарчабыс, че хакас тілінде андағ сӧстер чоғыл, аннаңар сидіксіністер полған. Оларны пос тіліне килістіре, тузазын кӧріп, чағын сӧстер таап, тілбестеебіс. Кӧзідімге, «блокировка», «блокировать» сӧстер. Мин анда «пиктег», «пиктебізерге» сӧстернең тузаланғам. Мағаа аймах-пасха чӧптер пиргеннер, оларны санға алып, прай сӧстерні тілбестирге кӱстенгем. Пірееде пір сӧcтеңер нинҷе-де кӱн сағын чӧрчезің. Пасха тіл пӧліктері сах андағох сидіксіністернең тоғасханнар. Мындағ сурығлар наукадағыларнаң хада пӧгілерге киректер. Наа сӧстерні олаңай ла, пос хынғанни тілге кир салбассың нооза, ит салзаң даа, чон аннаң тузаланмаза, ол тілге кірбес, ундудыл парар. Тілнің законнары андағ, – ӱлесче сағыстарынаң Оксана Кайнакова.
Наа чыл соонаң статьялар пазыл сыхтыр. Рувикинің хакас тілі пӧлиинде 700-че статья пазылых. Мында, орыс тілінең чоохтаза, словниктер пар, оларны О.Кайнакова изерістер тіп пирче. Нимедір ол андағ? Пу проект волонтёрлар полызиинаң чуртасха кирілче, оларнаң хада-пірге тоғысты редакторлар апарчалар. Олар пос кӧңнінең полызарға сағынчатхан кізілерні ӱгретчелер, сурығлар полза, полыс пирчелер. Изеріс волонтёрларға тимнелген. Піреезі Рувикизер хакас тілінең статья пазарға алай редакторға хайдағ-да оңдайнаң полыс пирерге сағыныбысса, ол изеріссер кірерге кирек. Анда статьялар аттары пар. Кізее, теманы таллап, статьяны пазарға алай ба тілбестирге чарир. Орыс тілі пӧлиинде 2 миллион азыра статья пар, прайзын даа хакас тіліне тілбестирге чарир полчаттыр. Пӱӱнгі кӱнде Оксана Юрьевна ӧӧнінде оларны тілбестепче. Кӧзідімге, анда Хакасиядаңар статья пар, аннаңар аны хати пазарға кирек чоғыл, ол тілбестелче паза, кирек полза, хайдағ-да искіріглер хоза кирілче. Чуртас алызып одырча нооза, ол алызығлар санға алыл турарға киректер.
Пӱӱнгі кӱнде cайттың ӧӧн страницазында 10 азыра статья. Cайт наа ла тоғынып пастапчатханда, иң пурун аның ӧӧн страницазын толдыр саларға кирек полған. Кізі сайтсар наа ла кірзе, анда, пасха тіл пӧліктеріндегӧк чіли, пос регионынаңар, тілінеңер, чонынаңар искіріглер пирілче. Ідӧк кӧбізі ӧӧн страницада кибірлердеңер, культурадаңар, чонының саблығ кізілерінеңер, чайаачыларынаңар статьялар cығарча.
– Хосхар айында сайт чонға азылғанда, Хакасияның чон писательі Анатолий Султрековтың пайрамына удур аннаңар статья тимнеп салғам, – чоохтапча Оксана Юрьевна.
Амғы туста ол изерістерні тимнирін тохтат салтыр, сайтта, статьялар санын хозар пӧгіннең, ӧӧнінде тілбестеглер тимнепче. Иң пурун республикабыстың аал-городтарына, муниципальнай пӱдістеріне, аал чӧптеріне чарыдылған статьялар алылған.
– Хайдағ даа энциклопедияны кӧрзе, кізілер пастап андағ искіріглерге хайығ айландырчалар. Оларға, кӧзідімге, регионда хайдағ аймахтар парынаңар, кіннерінеңер піліп аларға хынығ. Рувикині кӧрзе, Хакасияның аал-городтарына чарыдылған ӱс чӱске чағын статья полар. Орыс тілінең олар парлар. Искіріглернең тоғынарға аар нимес, олар улуғ ниместер, оой тілбестелчелер. Пірсін не чахсы тілбестеп салзаң, пасхазы аны хоостыра оой пазыл парыбысча. Аннаңар пу тоғыс табырах апарылча, – таныхтапча О.Ю.Кайнакова.
Ідӧк проекттің хакас пӧлии редакторы Хакасияның чайаачыларынаңар тілбестеглер тимнепче. Че ол изеріс ам даа толдыра нимес. Паза хайығ тартчатхан сурығларның пірсі – ол Хакасияның суғлары. Республикабыста уғаа кӧп суғ тіп чоохтапча Оксана Юрьевна. Мындағ оңдайнаң, ол пір кӱнде пасха-пасха темаларҷа, оларны алыстырып, пірер искіріг тілбестепче. Тілбесчінің чооғынаң, хайдағ даа статьяны пасчатса, кӧп сурығ сығысча. Кӧзідімге, суғның хакас адын орта пас саларға кирек, ол статьяның ады полар нооза. Мында аймах литературанаң, сӧстіктернең тоғынарға кирек, пірее тустарда істезігліг тоғыс таа апарарға килісчеттір.
– Піреезі, арса, мин кирген суғ алай кӧл адынаң чараспас, сайтта хости скобкада пасха адын кир саларға чарир. Чонда пір суғның пасха-пасха аттар полча нооза. Аны кирерге чарир, че прай искіріглер авторитеттіг литератураа, публикацияларға, наука статьяларына тӧстенерге киректер. Аны пос хынғанни ла пазарға чарабас. Ӧӧн правило – полған на искіріг сыныхталарға кирек. «Выверенная статья» термин пар. Анзы, хаҷан піс, редакторлар, ол статьяның орта пазылғанын, хайдаң алылғанын кӧрчеткенібіс. Пірее сайтха ссылка полза, ол пӱӱнгі кӱнде тоғынча ба, чох па тіп сыныхтапчабыс. Тоғынминчатхан сайттарнаң тузаланарға чарадылбинча. Паза «Рецензированная статья» термин пар. Ол статьяларны науканың, чуртастың ол-пу кӧстеглерінде тоғынчатхан, аны чахсы пілчеткен ученайлар, специалисттер сыныхтапчалар, алҷаастарны тӱзетчелер. Кӧзідімге, тархын сурығларынҷа піс историктерзер айланчабыс алай имнег киреенең палғалыстығ статья полза, аннаң имҷізер парарбыс. Аал чӧптерінеңер искірігні тілбестепчетсе, пірее орыс статьяларында иргі устағҷылар кӧзіділген полча. Аны, ідӧк хайыға алып, тӱзедерге кирек полча, – чоохтапча тоғызының пос оңдайларынаңар Оксана Кайнакова.
Тиксі алза, О.Ю.Кайнакова пу проектті тузалығ паза кирек тіп санапча:
– Ноғадаңар? Сағынчам, полған на кізі позы позына нандырығ таап алар. Москвада часхызын наа технологияларнаң палғалыстығ улуғ мероприятие ирткен, анда тілнең айғасчатхан, аны тилідер аймах-пасха оңдайлар тілепчеткен чон чыылысхан. Аның салтарларын кӧрзе, амғы туста проекттернің кӧбізі интернетнең палғалыстығ. Прайзыбыс, улуғлар даа, кічіглер дее, телефон паза компьютер кистінде кӧп тус иртірчебіс, чуртазыбыс интернетнең пик палғалыс парған.
Хакастар пу сайтнаң тузаланарлар ба паза ноға? Кізі позының чирінеңер, чонынаңар, культуразынаңар, ол санда тӧреен тілінең, хығырып аларға сағынчатса алай ол-пу суғның, аалның ады хакас тілінең хайди адалчатханын піліп аларға сағынчатса, Рувикизер кірер. Ағаа хоза, прай искіріглер интернетте халарлар, чылларнаң анда хайраллаларлар, ундудылбастар, чон оларнаң тузаланар. Полған на кізі наа онлайн-энциклопедияда позына хынығ, чапсых искіріг таап алар. Орыс версиязын кӧрзе, анда ОГЭ-ға паза ЕГЭ-ға тимненчеткен олғаннарға полған на предметче уғаа чахсы статьялар пирілче. Уламох олар прайзы сыныхталғаннар. Анзынаң пу проект ідӧк тузалығ полар.
Паза орыс тілінең пос тіліне тілбестепчетсе, тіл пайып одырча. Сӧстерні килістіре тілбестебізер оңдайлар таапчазың. Мында ол саринаң чахсы тоғыс апарылча тіп санапчам. Ағаа хоза, пасха чоннар тіллерін тилідер мындағ оңдайнаң тузаланчатханда, піс олардаң халбасха кирекпіс.
Cағынчабыс, Оксана Юрьевнанаң чаразарға чарир. Че амғы туста сайтты искіріглернең толдырарынаң ол чалғызан айғасча. Че пу тоғысты пір кізі хаҷан даа ит полбас, аннаңар ағаа полысчылар кирек. Сайтты толдырарынаң айғасчатхан кізілерге ахча тӧлелбинчетсе дее, Рувики волонтёрлары аразында ӱлӱкӱннерге, пасха даа танығлығ кӱннерге чарыдылған аймах марығлар иртірче. Оларның араласчыларына уғаа чахсы сыйыхтар пирілчелер, ол санда ахчалығ. Хакас тілінең наа интернет-энциклопедияның тилізіне хозым идерге сағынчатханнарға Оксана Кайнакованаң позынаң алай ба газета редакциязы пастыра палғалызып аларға чарир.
Сом Оксана Кайнакованың архивінең
Автор :
Татьяна Кыштымова
Пн | Вт | Ср | Чт | Пт | Сб | Вс |
29 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде