Чирібіс сілии паза пайы – туристтер хайиина
05.07.2024
Хабарлар
Сергей Сокол паза Валентин Коновалов «Сибирьдегі чӧптезіг» МАСС чыылииндалар
Тоғыс чорығы. Хакасия пазы Валентин Коновалов паза Ӧӧркі Чӧп кнезі Сергей Сокол от айының пастағы ікі кӱнінде Москвада тоғындылар
МАСС чыылиинда араласханнар
Чорыхтың ӧӧн пӧгіні – «Россия» кӧзідіг-форумның Сибирьдегі регионнарда Туризм кӱнінде аралазары. Ол 2 отта ирткен. Тоғазығ-чыылығларның пірсі – «Сибирьдегі чӧптезіг» ассоциация чӧбінің (МАСС-тың) паза Россия президентінің СФО-дағы полпреді чӧбінің пірге чыылии. Аның тоғызында ідӧк араласханнар Россия правительствозының вице-премьері Дмитрий Патрушев паза энергетика министрі Сергей Цивилёв.
– Чыылығ Сибирьнің 2035 чылға теере тиліс стратегиязының чуртасха кирілчеткеніне чарыдылған, – пасча Валентин Коновалов соцсетьтерде. – Пу улуғ пічікті тимниріне СФО-ның прай регионнары хозылған, салтарында, Сибирьнің инфраструктуразын, энергетиказын, сығарыс промышленнозын, аал хониин паза науказын нааҷылирға 147 мероприятие кирілген. Хакасия аның 55-зінде араласча.
Чыылығда Сибирьдегі регионнар пастары стратегияны толдырарынҷа пастағы салтарларынаңар искіргеннер паза аны чуртасха кирер планны тӱзедерінҷе чӧптернең сыхханнар.Ідӧк чыылығда СФО регионнарының «Россия» кӧзідіг-форумдағы тоғызы салтарлары иділген, МАСС тоғызын тӧстеҷең паза пасха сурығлар ӱзӱрілген.
МАСС чӧбінің наа кнезіне Хызылчар крайының губернаторы Михаил Котюков табылған. Ол пу должностьха алында тоғынған Кемеров облазының губернаторы Сергей Цивилёвтың орнына килген, хайзы 2024 чылның сілкер айынаң пасти Россияның энергетика министріне турғызылған. Сергей Ивановичке, тізең, МАСС чӧбінің аарластығ араласчызы ат пирілген.
– Михаилні Хызылчар крайы правительствозында хада тоғынғаннаң сығара пілчем. Ол Сибирьде тӧреен, улуғ опыттығ паза федеральнай синде Сибирь регионнарының сурығларын кӧдір полар кізі, – таныхтаан позының искіриинде Сергей Сокол.
Туризмге – алғым оңдайлар
Хакасия пазы Валентин Коновалов Москвадағы тоғыс чорығында «Россия» кӧзідіг-форумда «Сибирьдегі федеральнай округ регионнарындағы туризм» пленарнай сессияда республика туризмінің тиліҷең оңдайларынаңар чоох тутхан. Сессия тоғызынаң Россия президентінің СФО-дағы полномочиеліг кізізі Анатолий Серышев устаан.
– Республикабысты тиктең нимес Сибирьдегі Швейцария паза тигір алтындағы азых музей тіп адапчалар. Пістің уғаа сіліг паза пай чир-чайаан, 30 муң азыра археология хумартхызы саналча, оларның ӧӧн чардығы Египеттегі пирамидалардаң даа улуғ. Піс аалҷыларға аймах кӧрімніг тынағны чылның хайдағ даа тузында сӧлирге тимдебіс.
Мин устапчатхан правительство Хакасияны туристтерге чапсых орын идер ӱчӱн матап кӱстенче. Халғанҷы алты чыл аразына піс пу кӧстеге республика бюджедінең ахча позыдарын 15 хати ӧскір салғабыс. Регионда наа гостиницалар паза базалар азылча, аалҷыларны удурлаҷаң кіннер паза глэмпингтер пӱдірілче, чол хыриндағы полызығлар тиліпче.
Піс 2030 чылға теере Хакасияның туризмін тилітчең стратегияны тимнеп салғабыс. Пӱӱнгі кӱнде регионда туризм кӧстеенде 17 миллиард салковайға 12 килкім инвестиция проекті чуртасха кирілче. 2030 чылға теере, тізең, инвесторлар пу кӧстеге 40 миллиард азыра салковай хозарға пӧгінчелер.
Ирткен чылда республиказар 1,5 миллион турист кил парған – ол тиксі тархында иң пӧзік кӧзідіг. Че мыннаң даа кӧп санға чидерге чарир! – таныхтаан искіриинде Валентин Коновалов.
Хакасия пазы Валентин Коновалов «Россия» кӧзідіг-форум араласчыларын Хакасиязар – Пис кӱс чирінзер – ааллап килерге, аның сіліг чир-чайаанынаң, пай тархынынаң паза культуразынаң чағын танызарға, республиканың аалҷыларны удурлапчатханын кӧріп аларға хығырған. Ол аалҷыларның хайиин тартчатхан иң чапсых орыннарнаң таныстырған. Олар культуранаң, хазых пиктирінең, чир-чайаанны хайраллирынаң паза саналығ чыларынаң палғалыстығлар.
Мыннаң мындар, туризмні тилідіп, республика ӱлгӱлері аның регион сығарызына хозымын 5 %-ке теере ӧскірерге, чыл сай чирібіснең танызарға кил парчатхан туристтер санын, тізең, 2,5 миллионға читірерге пӧгінче.
«Россия» кӧзідіг-форумның Туризм кӱнінде Сибирьдегі турист чоллары, чир-чайаанның, культураның паза промышленностьтың чапсых орыннарынаңар чоохтааннар паза кӧзіткеннер, регионнарның таңмаларынаң сыйыхтығ лотереялар паза ойыннар иртіргеннер.
Сом Хакасия пазының паза Хакасия Правительствозының пресс-службазыни
Автор :
Тимнеен Наталья Сюптерекова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде