Нимее ол иділче?
05.07.2024
Хабарлар
Василий Шулбаев – Хакасияның Ӧӧркі Чӧп депутады
Пос кӧрізі. Россияның налог салҷаң оңдайына алызығлар кирілчеткенінеңер пос кӧрізінең ӱлесче Хакасияның Ӧӧркі Чӧп депутады Василий Шулбаев
– Ӧсчеткен НДФЛ – ӧӧн алызығ. Аны пір ле он чыл нимес ӱзӱр парирлар оппозияция партияларының – ЛДПР даа, КПРФ таа – кізілері, тӧреміл чӧптернең сых турып. Пӱӱнгі кӱнде чонның сын оңдайларға кирексініс пар. Кӧрілген налог сині – 13,15, 18 паза 22 проценттер. Россия ол оңдайнаң тоғынып пастабысхан, ағаа хоза, ол чуртасха кирілче: пис миллион азыра салковай алчатханнарға сала пӧзік налог сині кӧріл парған. Пӱӱнгі кӱнде 13 процентті айда 200 муң салковайға теере чал ахчазын алчатханнар тӧлепче. Чылда оларның парызы 2 миллион 400 муң салковайны аспинча. Оларның санына тиксі хазнаның тоғынчатхан улустың 96 – 98 проценті кірче полар. Ана оларға налог салҷаң оңдайға кирілчеткен алызығлар теелбес. Иң кӧп налог сині – 22 процент – чылда 50 миллион салковай алчатханнарға салылар. Пілдістіг, пос киреенең айғасчатханнар паза ол син парыстығ чуртағҷылар ол синнең тың на чараспинчатханнар. Олар иң пӧзік синні 20 процентке тӱзірерге кӱстенгеннер.
Нимее ол иділче? Россияның Хазна Думазында даа, правительствозында даа таныхталған, чыылған налог иң пастап социальнай кӧcтеглерге паза конституциядағы наа чарадығларны толдырарына позыдылар: чыл сай пенсияларны паза пасха тӧлеглерні индексация синіне ӧскір турарына паза пасхазына. Хазнаның андағ нандырығ кӧп. Пілдістіг, ол хазна бюджедінең хоза ахча кирексіпче. Азынада сананыстарҷа – чылда 2,5 триллионҷа салковай.
Паза пір алызығ – парысха налогты 20 проценттең 25 процентке теере ӧскірері. Мин Владимир Николаевич Штыгашевтің чооғынаң прай саринаң чарасчам. Піс ирткен сессияда субъекттернің, ол санда Хакасияның, бюджедін толдырарын ӱзӱргебіс. Пӱӱнгі кӱнде парысха налогтың 17 проценті регион бюджедіне кірче, 3 проценті – федеральнай бюджетке. Владимир Николаевич чӧпнең сыххан, чарадылған 25 проценттің 20 проценті регионда хал турзын, халғаны федеральнай бюджетке ызылзын тіп. Минің кӧрізімнең, уғаа кирек паза чахсы пастағ. Алызығлар кӱзіне кірзе, Ӧӧркі Чӧп ол сағысты, закон сығарҷаң пастаға тимнеп, Москвазар ызарға кирек тіп санапчам.
Пӱӱнгі кӱнде республика бюджедіне сидік чухча. Сылтағлар тастындағы киректернең палғалыстығ: алюминийге паза хара тасха тилекей паалары тӱскен сылтаанда пӱӱнгі кӱнде республика «одырыбысхан». 2022 чылда иң чахсы тус полған, хаҷан пістің республика бюджедінің тиксі парыстарының 52 проценті алай 20-ҷе миллиард салковай парысха налогтаң пӱткен. Ирткен чылда кирек алыс парғаннаңар, бюджет парызы 10 миллиард азыра салковай чох халған. Пӱӱл олох сидіксініcтерге урунчабыс. Аннаңар республика бюджедін толдырары тӱзімніг поларға кирек, аннаң, тізең, ідӧк палғалыстығ республиканың ӧӧн пӧгіннерін – социальнай сурығларны – толдырары.
Сом Альбина Чистогашевани
Автор :
Пазып алған Наталья Сюптерекова
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде