Хайдағ кирі мархалар
26.07.2024
Хабарлар
Пу чазыттығ нимелерні хум алтынаң хазып аларға кирек
Хоос кӧріс. Республиканың олған библиотеказында полып, анда кӧрген хынығ ойыннардаңар, хазыр марығлардаңар танығлар, чоохтазығлар узарадылча
Илееде чалбах арах, пӧзік тее харачах хайдағ-да сала иргі чардылардаң тимнелген полтыр. Андар хырынаң кӧмес ле тиң нимес иде ап-арығ хум урылтыр. Иргі чардылардаң иділген харачах оодыл парбазын тіп, аны тимір хурчағнаң тыыт салтырлар. Орта сағыс. Че олған библиотеказында хумнығ харачах кемге алай нимее кирек пол парды ни?
Палалар ойнаҷаң орын тіп санирға сағынчатса, ол илееде пӧзік турғызылых. Пазымны паза даа ағыртпасха тіп cағыныбысхам, библиотека тоғынҷызын кӧрглепчем. Позым ол харачахтаң оортах парбинчам. Арса, кічіг частығ хығырығҷыларның піреезі мында тохтабызарына тыңох ізенчем позым алынҷа. Андада улам киліcтіре поларҷых, мағаа библиотека тоғынҷызын тілеп чӧрерге киліспесчік.
Сағып алдым. Ікі хызыҷах чағдап одыр. Ам даа олған садынзар чӧрчеткен ӧӧрелер тіп сизін салдым. Оңнығ ла сууласпинчалар, постарының группаларындағы оолағастар хайди тың хайнасчатханнаңар, воспитательлернің cӧзін пір дее испинчеткеннеңер чоохтасчалар. Пірсі пірсіне матап харығ полча. Пірее хати ӱр нимес тохтабысчалар даа, хайди тудысханнарын кӧзідіп, удур-тӧдір іде сасхлазып пастабысчалар.
Минің хомзынызыма, постарын ӧткін тудынчатхан хызыҷахтар, хумнығ харачах хыринда тохтабин, хайдар-да ирте халдылар. Хайдар парчалар – пілбес. Мин анда ам на пас чӧргем, хайығ айландырҷаң пір дее ниме орта полбаан.
Э, мына ізік азылчатханы, анаң чабылғаны истілді. Анда хайдағ-да комната пар осхас. Аны хайди сизінмин халған поларбын? Ізік стенее тӧп-тӧӧй сырнаң сырлалған полар. Аннаңар хайығ айландырбаам, неке. Хызыҷағастарны сӱріс кӧрҷең ме тіп сағын турчатханымда, пазох ӱннер истіле тӱсті.
Ӱc хызыҷағас хумнығ харачах хыринда тохтабысты. Пу орын оларға маңат таныс одыр. Сала даа чубанмин, столның ол саринда харбалап-хасхланып, хайдағ-да ойнаҷахтар сығара тартхлап алдылар. Амды оларны ӱлестірчелер. Пірее хати ӱр нимеске талаза даа халчалар. Пірдеезі тӧдір пазынарға хынминчатханға тӧӧй. Мына пірсі, матап таласхан соонда, ойнаҷаң кӱрҷек паза тырбос чох халды. Устайыбызып, ӧӧрелерінең хыйа чӧрібісті, ізік кистінде чіде халды.
– Маринанаң ойнирға хынығ нимес. Ол ла малхат чӧрче, чахсы ойнаҷахтарны позына алып аларға харасча, я? – амыр ла чоохтанып одырча кӱрең сырайлығ хызыҷах.
– Тігі хати піс мында ойнаанда, кӱрҷек анда полған. Тарынып, сырайыма хум тастаан, – ӱндесче орыс омалығ ӧӧрезі.
– Андағ хынығ нимені хайди кӧрбин-испин халғам? Анаң чи син аны хайди? – ӧрінгеніне, сала сегірбинче пірсі.
– Мин аның састарын пу тырбоснаң «тырбап» пиргем. Кем пол партыр мағаа аахтап чӧрчедерге? – тарынча ӧӧрезі.
– Мына нимее ол библиотекаа толдыра сайланған. Іди кирек ағаа. Чиркеелен не чӧрче, – кӱлімзірепче Аима Доржу.
Ікі ӧӧре мыннаң мындар хайди поларын кӧр сыхтым. Ойнаҷахтар даа полза, хайдағ-да тиріглерні тиктең не сығарбадылар нооза. Позым, тізең, одырҷаң орын таап алып, анда чуғаҷах киндеҷекті кӧрглеп сыхтым. Хандыра ситкіп хығырчатхан кізі полыбыстым. Сынында хызыҷағастарны харах одынаң позытпинчам, ниме полчатханын чахсы кӧрчем.
– Аима, тігі хати чир хасчатханда, ойынны мин пастаам. Амды син хас кӧр, – чоохтанча Кира Гребенщикова.
Кӱрең сырайлығ, хара састығ ӧӧрезі, аннаң чаразып, пазын икіпче. Аның холында пластмассадаң иділген кічиҷегес кӱрҷек. Олғаннарның ойнаҷағы. Хумны харачахтың хыринаң хазып пастапча, аны сыныхтапча. Ойын ма, марығ ба пасталыбысхан осхас. Харачах хыринда чалбах фанера чатча. Хызыҷағас хумны андар чайа салча. Пазох ла кӧрглепче. Кира, тізең, ӧӧрезінең хада ла хайынча, оортах парарға сағынминча.
Ол туста миннең тоғыр библиотека тоғынҷызы одырыбысхан. Таныс кізі. Чазырбин чоохтаза, туғаным. Наталья Ивановна Куюкова, республиканың олған библиотеказының пӧлік устағҷызы полча. Минің іҷем Куюковтар хызы, аннаңар, сала оортах таа полза, Наталья мағаа туған.
– Постары килгеннер бе? Алай хығырып алғазар ба? Чалахай изеннескен соонда сурча библиотека тоғынҷызы.
– Постары килгеннер. Уғаа хынығ хызыҷахтар. Ниме ойнапчатханнарын на чахсы піл полбинчам, – ӱндесчем ағаа.
– Пу ойын археологтар адалча. Палаларның кӧңніне тың кірче. Мында таап алған нимелерні олғаннар ибзер алып алчалар. Орнына іҷе-пабалары ибдең пірее чапсых нимелер ағыл пирчелер. О, мині хығырчалар. Парарға кирек. Сірер чағын парып алыңар, – одырчатхан орнынаң тур килді туғаным.
Сынап таа, хайдағ-да ипчі, піссер кӧріп, Наталья Ивановнаа холын пулахтатча. Оолағасты чидін салтыр. Палазын олған библиотеказынзар чӧрдірерге сағынча полар. Амды чайғы тус, кізілер тынанарға сыххлапчалар. Аннаңар даа пӧлік устағҷызына даа олаңай тоғыснаң айғазарға килісче.
Ойын пастабысхан хызыҷағастар кӧргеннер нооза, хайди піс Наталья Ивановнанаң чоох-чаахнаң одырғаныбысты. Ағаа хоза, пастых кізі кічіг частығ хығырығҷыларын сизіндір салған, пу аалҷы олар хайди хынығ ойнапчатханнарын чағыннаң кӧріп аларға най тың сағынча теен. Аннаңар мин чағын пастыр килгенімде, ӧӧрелер пір дее пасхаланмааннар, хайди ойнааннар, ідӧк ойнап сыхханнар. Аима ла пластмассадаң иділген ойнаҷахтарға хоза сала чалбах арах кисточка сығар килген. Олған тузым хаҷанох ирт парғаннаңар, ойнаҷахтарны хайди тузаланчатханын ундут таа салтырбын. Палалардаң сурастырғлирға арыстығ пілдірген.
Піс Наталья Ивановнанаң хада чоох-чаахнаң одырчатхан аразында, ікі ӧӧре харачахтағы хумны илееде синдіре хохчырат салтыр. Полғанының на алнында хайдағ-да ооғазах нимелер чатхлапчалар. «Піс оларны чир алтынаң хасхлап алғабыс. Мин ибзер пірдеезін апарбаспын. Іҷем хырысча, тураны ла кірлепчезің тіпче», – позының сағыстарынаң ӱлесче сала ӧткін арах хылыхтығ орыс хызыҷах.
Нимее іди най тың ӧрін парды Аимаҷах? Піс Киранаң хада археологтар Хакасияда хайдағ чапсыстығ нимелер таап алчатханнаңар хынығ чоохтазығ апарчатхан туста, аның ӧӧрезі тілег тоғызын тохтатпинчатхан. Іди аның кӱрҷегінде хайдағ-да пасхаҷыл ниме палыңни тӱстір. Аны кӧр салып, хызыҷағас ӧрчіліг хысхыра тӱсті. Сах андох ӧӧрезін позына полызарға хығырча. Холында пайаағы кисточканы тудын салтыр.
Мағаа даа чапсых пілдір парды оларзар кӧр турчадарға. Кира ойнаҷаң тырбоснаң хумны аар-пеер ітклепче. Аима, тізең, хол салаазынаң хайда тырбирға-ітклирге киректелчеткенін кӧзітче. Позы, ӧрінгеніне, пір орында сым тур полбиныбысты. Плесет тее салыбызарға тимде осхас. Сынап таа, хайдағ часкалығ ӱлӱс тӱсті ағаа мында – пу сіліг кӧрімніг чазанҷыхты чиркеен хыстар ла састарына хаптыр салғаннарын кӧрерге килісче. Библиотекадағы ойын-марығлар оңдайы хоостыра кем ниме хазып-таап алған, аны ибзер апарча.
– Ой, Кираҷах, мин аны хайди даа ибзер алып аларбын... Чох, чох, саңайға нимес. Пірее хати сағаа даа кис чӧрерге пирербін, – ӧӧрезінің сырайы алысчатханын кӧріп, аны ӧріндірче Аима.
– Мында хайдағ-да таңмалар, саннар. Син нинҷе чылда тӧреезің? 2018 чылда тее! Мин дее ол чылда. Пілчезің ме, пу сіліг кӧрімніг чазанҷых 2001 чылда сығарылған тіп пазылтыр. Най тың чылтырапча. Кӱмӱстең иділген полар, – чоохтанча Кира.
– Нинҷе чылда сығарылтыр?.. Кӧзіттек, – сурча Аима.
– Мына, хайда кӧп-кӧп саннар, – салаанаң улапча ӧӧрезі.
– У-у, хайдағ кирі чазанҷых таап алдыбыс, йа? Піс андада тӧреелек тее полғабыс. Сын археологтар ла чир алтынаң андағ аарлығ алтын-кӱмӱстер хазып алчалар. Кӧр кӧрдек, мағаа килісче бе? – чазанҷыхнаң састарын хаптыр салтыр Аима.
– Уғаа чахсы. Сіліг дее пол партырзың. Амды мин синеп кӧрим. Сағынчам, мағаа даа килізерге кирек, – ӧрінізін чазырбинча Кира.
Сом республиканың олған библиотеказының архивінең
Автор :
Анатолий Султреков
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде