Литература премиязы ээлеріне читірілді
26.07.2024
Хабарлар
Сыйыхтас тузында
Культура. Хакасия пазы Валентин Коновалов литература премиязына турысхан кізілерні пӧзік сыйыхтарнаң таныхтады
Пайрамнығ тоғазығ республиканың правительство туразында ирткен. Николай Доможаковтың адынаң Хакасия пазының премиязын саарбахтарға пазылған «Там, за горизонтом» чоохтың авторы Надежда Мисюрова алған. Моисей Баиновтың адынаң Хакасия пазының премиязы Лариса Чебодаеваа читірілген. Ол хакас тілінең пазылған «Пала-пархаҷахтарға» кибелістер чыындызын сығарған.
– Сірернің тоғызыңар Хакасияның паза тиксі Россияның культура ис-пайына улуғ хозым ағылча. Чир-суубыс пӧзік чайаачылығ авторларға пай полчатханына поғдархапчабыс. Сірер тӧстеп салған сағыстар чииттернің чуртас чолларын чарытсыннар. Сірерні турыстығ сыйыхтарыңнаң алғыстапчам! – чоох тутхан республика пазы.
Надежда Мисюрова олған тузынаң сығара кинектер колясказында чӧрче. Ол хайдағ даа аар тустарда позының кӱзін чідірбеске кӱстенче. Позының чайаачы тоғыстарында сидіксіністерні тобырчатхан олаңай кізілернің чуртазынаңар пасча. Мындағ сынағлар полған на кӱнні аарлирға ӱгретчелер.
– Мин уғаа ӧрінчем, пӱӱн часкалығ кӱн! Хакасияның правительствозына паза культура министерствозына авторларға хабасчатхан ӱчӱн улуғ алғызым читірчем! Пӧзік сыйых алғанда, тоғынҷаң, пасчаң, чайаҷаң кӧңнібіс улам кӧдіріл парды, пасха даа чидіглерге читчең сағыстар тӧріпче. Пістің республикада улуғ устарға паза чиит писательлерге хайығ айландырылчатханы уғаа чахсы, – алғызын читіріп, таныхтаан Надежда Мисюрова.
Лариса Чебодаева – филология наукаларының кандидады, Н.Ф.Катановтың адынаң ХГУ-ның хакас филология кафедразының доценті, Россия Федерациязының пӧзік профессиональнай ӱгредиинің Аарластығ тоғынҷызы, Хакасияның саблығ ӱгретчізі. 2016 чылда, олғаннарны хакас тіліне ӱгредіп паза хакас тілі учебниктерін нааҷылап, республикаа улуғ хозым итчеткен ӱчӱн «Чыл кізізі» аарластығ атнаң таныхтатхан.
– Чайаачы тоғызымда чуртастағы, чонымдағы чахсы киректерні кӧзітчем. Хай пірее чоохтарны кічігде искем алай позымның хараамнаң кӧргем. Оларны кинделерімде артызарға кӱстенчем. Аннаң сығара олғаннарны тӧреен чир-сууна хынарға, пай чир-чайаанға паарсирға кӧніктірчем. Мин пілчем, палалар кічігдең сығара чир-сууна хынзалар, олар чахсы, амыр кізі полып ӧзерлер, – теен Лариса Чебодаева.
– Мин прай чӱреемнең авторларны алғыстапчам! Олар кинделері пастыра чиит тӧлні ӱгретчелер, хазых чон тӧстепчелер. Піс прайзыбыс чахсы киректер ӱчӱн тоғынчабыс. Кинде пазары оой нимес, аннаңар сірернің тоғызыңар уғаа аарлығ паалалча! – алғыстаан Хакасияның культура министрі Светлана Окольникова.
Хакасия пазының литература премиязына марығ чыл сай иртірілче. Анда Хакасияда чуртапчатхан Россия писательлері пірігізінің кізілері, чайаачы паза халых организацияларның, ідӧк литература пірігістерінің кізілері, авторлар араласчалар. Моисей Баиновтың адынаң литература премиязы орыс алай хакас тілінең кибелістер пасхан паза тілбестеглер иткен ӱчӱн пирілче, Николай Доможаковтың адынаң сыйых – орыс алай хакас тілінең прозаларны паза публицистика произведениелерін чайаан ӱчӱн.
2014 чылдаң сығара премияны 10 поэт паза 9 прозаик алған. Пӱӱнгі кӱнде Хакас Республиканың чон писательі атха турызар кізее хайди даа Хакасия пазының Литература сыйиин аларға кирек. Республикада пӱӱнгі кӱнге «Хакасияның чон писательі» аттығ 8 кізі пар.
Сом r-19.ru сайттаң
Автор :
Аскар Артамонов
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде