Ізестіг чарытхы сетьтері – хорғыс чох хысхы
26.07.2024
Хабарлар
Павел Акилин, Валентин Коновалов паза Николай Шульгинов «Ташеба-Сельская» подстанцияда
Тоғыс чорығы. Хакасия правительствозының делегациязы «Ташеба-Сельская» подстанцияда пол килді
Хакасия правительствозының делегациязы республика пазы Валентин Коноваловтың устаанынаң тоғыс чорығынаң Ағбан город тастындағы чарытхы читірчеткен подстанцияларның (ПС) пірcінде пол килген. Тоғыс чорығында араласханнар республика пазының орынҷызы Юрий Курлаев, «Россети» ПАО-ның ӧӧн директор чӧпчізі Николай Шульгинов, «Россети Сибирь» ПАО-ның ӧӧн директоры Павел Акилин паза пасхазы.
1980 чылда тоғынып пастабысхан «Ташеба-Сельская» подстанцияның 2916 тузаланҷызы саналча: 85 юридическай лицо паза 2831 олаңай чуртағҷы. Олар Ағбан городтың 10-ҷы микрорайонында (чарытхы «Ағбандағы чарытхы сетьтерінің» 10 киловольттығ линиязынҷа читірілче) паза Сапогов, Чапаев аалларда, «Изумруд» СНТ-да («Хакасэнергоның» линиязынҷа) орныхчалар. «Россети Сибирь» – «Хакасэнерго» ПАО искіриинең, Ағбан городха чарытхы 110 кВ кӱстіг читі подстанцияҷа читірілче, оларның тӧртінде чарытхы кӧрілген синінең пӧзік тузаланылча. Хысхызын иртірілген сыныхтағ кӧзіткен: «Ташеба-Сельская» ПС-та – 202 %-ке, Юго-Западная ПС-та – 162%-ке, «Южная» ПС-та – 160 %-ке паза «Элеваторная» ПС-та – 132 %-ке.
Ирткен чылда чарытхы тузаланызы «Ташеба-Сельская» ПС-та кинетін ӧс парған: пір чыл аразына 60 %-ке. Ӧӧн сылтағ – чуртағҷылар пос алынҷа тураны чарытхынаң чылыдарына кирчелер, істезіг кӧзіткен, кӧбізі 10-ҷы чурт микрорайонынаң. Андағ алызығларны кӧріп, устағ-пастағ аны пӱӱл пастағылар санында алыстырарға чаратхан. Пу тыхтағ тоғыстары чох подстанцияда саай сығызарға айабас, андада прай пу орыннарға чарытхы читірері тохтадылар. Ирткен хысхызын, тізең, Ағбан город паза Ағбан пилтірі поселоктар аразындағы ааллар андағ хорғысха урунғаннар. Пӱӱнгі кӱнде чарытхы сетьтерін хайығда тутчатхан компания «Ташеба-Сельская» подстанцияның кӱзін алғыдарына 100 миллионҷа салковай позытхан.
– Піс ундутпаабыс, ирткен хысхызын чарытхы чидіспинчеткен сылтаанда хайдағ сидіксініcтерге урунғабыс. Пӱӱл Хакасия правительствозы «Россетинең» хада улуғ тоғыс апарча, алынҷа алза, майнерлернең паза кӧрілген синнең артых тузаланғанынаң. Пілдістіг, піс сетьтерні тиксі нааҷылирын кӧрчебіс. Республика тиліпче, чурт пӱдірілче, ағаа хоза пістің арығ киинең сидіксіністер пар, аны санға алып, чуртағҷылар ідӧк тураларын чарытхынаң чылыдарына кирчелер. Ідӧк піс экономика тилізінеңер сағыссырапчабыс, че чарытхы кӱзі чох піс аны сағынчатхан синге сығар полбаспыс, – таныхтаан Валентин Олегович.
Пу чағында Хакасия правительствозы паза «Россети Сибирь» ПАО чӧптезігде хол саларға тимненче, хайда алынҷа пӱдіріглерні нааҷылиры кӧрілер. Чӧптезіг хайызығларны он чыл хайығда тударға полызар. Уcтағҷыларның чооғынаң, чуртағҷыларға кӧрілген чарытхы паалары тың алыспас, ортын паза пӧзік чарытхы кӱзінең тузаланчатхан предприятиелерге, тізең, паалар сағам тӱзірілче. Ӱлгӱдегілер дее, сеть компаниязындағылар даа оңарчалар: пос киреене прай хорадығларны арт полбассың. Аннаңар олох туста федеральнай ахча тартарынҷа тоғыс парча.
Валерий Сунцовтың устаанынаң бригада трансформаторны алыстырча
– Пір подстанцияны нааҷылирына ахча позыдары чарадыл парған. Чоох парча Кӧк хайадағы подстанциядаңар. Ол килчеткен чылдаң сығара чуртасха киріліп пастир, «Республиканың алынҷа тилізі» программаа кирілген, – хоза чарытхан республика пазы. – Аннаң пасха, Россияның энергетика министерствозының программаларына кірҷең оңдай пар. Тиксі алза, Хакасияның чарытхы хониин нааҷылирына 13-че миллиард салковай киректелче. Ол уғаа килкім ахча, республика пос кӱзінең аны таап полбас. Аннаңар піске хоза федеральнай хабазығ кирек.
Николай Шульгинов, чарытхы сурығларын ӧтіре пілчеткен кізі, республикаа амох таа хабазарға тимде. Нааҷылағ-тыхтағ тоғыстарын чарытхы паазына прай кир полбассың, хоза хазна хабазии киректелче. Ағаа хоза хабазығның чардығы килчеткен чылның федеральнай бюджедінде кӧріл парарға кирек, аның ӱчӱн республика ӱлгӱзіне, регионның алнын федеральнай синде алар кізее, ол санда Хазна Думазының депутадына паза чарытхы сетьтер компаниязына ӧменең, хада-пірге тоғыныбызарға кирек.
Сағам пу тоғыстаң пасха, «Россети Сибирь» – «Хакасэнерго» ПАО хысхызына тимнен парча. Аның ӱчӱн ӧнетін тоғыстар толдырыл парған. Ӧӧн пӧгіннернің пірcі иң хорғыстығ орыннарны иптеп саларға, иң «чуға» орыннарны чох идерге.
Республика правительствозының делегациязы хабарҷыларнаң чоох алысчатхан туста, тізең, Валерий Сунцовтың устаанынаң бригада иргі трансформаторны сала кӱстіг трансформаторға алыстырарынҷа тоғыстарны толдырчатхан. Григорий Стельмах ӧӧн тоғыстарны толдырча, ағаа полысчалар Дмитрий Федотов, Арбай Тохтобин, Михаил Антонов паза Юрий Маловинский.
2026 чылға теере пу подстанциядаң тузаланылар чарытхы сині 252 % теере ӧс парары кӧрілче. Аның ӱчӱн пір трансформаторы сыдаспасха айабас. Аннаңар мыннаң мындар подстанцияның кӱзін ӧскірерінҷе тоғыстарны толдырарға кирек: 2*10МВА кӱстіг трансформатор 2*16 МВА кӱстіге алыстырылар. Ол тоғыстарның паазы 833 миллион салковайға тиңнелче. Нааҷылағ тоғыстары 2025 – 2029 чылларға республиканың ізестіг тоғызын кӧдірерінҷе программазына киріл парғаннар.
Сомнар Дмитрий Сунчугашевти
Автор :
Наталья Сюптерекова
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде