Палалар чайаачызын тилітчелер
25.09.2024
Хабарлар
Анастасия Токоякова ӱгренҷілерінең хада
Культура. 1969 чылда Таштыпта олған музыка школазы азыл парған, пӱӱл хысхызын ол 55 чылын таныхтады
Школаның пастағы ӱгретчiлерi Наталья Александровна Смирнова паза Виктор Иванович Денисов полғаннар, андада олар баян паза фортепиано класстарын апарғаннар. 1977 чылда Ағбандағы музыка училищезiн тоосхан соонаң Роза Назгатовна Колмакова олғаннарны домранаң ойнирға ӱгредiп пастаан, iди школада хыллығ тирiглер пӧлии тӧстелген.
1980 чылларда ӱгретчiлер ӧмезiне баян клазын апарчатхан чиит устар хозылғаннар: Ирина Николаевна Карамашева паза Роберт Алексеевич Ворошилин. 1987 чылда школада национальнай кӧг тирiглері клазы азылған, Хакасияның композиторлар пiрiгiзiнiң кiзiзi, чон узы Олег Афанасьевич Токояков олғаннарны 37 чыл чатханнаң ойнирға ӱгретче, хакас музыказын тилiтче.
1989 чылда аккордеон клазын Алла Борисовна Шовкопляс апар сыххан, 1995 чылда ол директор пол парған. 2014 чылда аның орнына Елена Владимировна Шулбаева тоғын сыххан, 2018 чылдаң аны Владимир Владимирович Шулбаев алыстырыбысхан. Амғы туста, 2023 чылның улуғ хырлас айынаң сығара, школа устағҷызы – чиит ус Анастасия Аркадьевна Токоякова. Тоғазығда ол позынаңар, школа чуртазынаңар ӱлескен.
Сынны чоохтаза, Анастасия Токоякованы Пыдырахтағы школада ӱгренген тузынаң таныпчам, ол миннең iкi-ӱс часха кiчiг. Кӧрҷеңмiн, школада алай аалда иртiрiлчеткен концерттерде сыбыра, сарнап, араласчаң. Музыкаа чайалған хыс, 2016 чылда Ағбанда искусстволар институдын тоозыбысханда, тӧреен чирiнзер айланған – Таштыпта чуртап сыххан. Мында ол «Чылтызах» олған садында палаҷахтарны музыкаа ӱгретчең паза Пыдырахтағы школада музыка уроктарын апарҷаң. Тоғынған аразында ӱсче чыл ибде одырарға килiскен – чиит сӧбiреде соон сӱрiстiре iкi оолах тӧреен.
Таштыптағы олған музыка школазында Анастасия Аркадьевна ӱзiнҷi чылы тоғынча, музыка литературазына ӱгретче.
– Олғаннарны хайдағ оңдайнаң школаа таллапчазар?
– Наа ла кiрчеткен палаларны орғах айында алып пастапчабыс. Музыканы исчеткенi, сағын салчатханы, ритм саринаң кӧрчебiс. Ӧӧнiнде ӱгренерге хынчатхан олғаннар кiрiп алчалар, пӱӱл нинҷе-де кiзее орын читпеен, оларны, пiрее пала чӧрбин сыхса, аның орнына алып алчабыс. Школада ӱс, пис, сигiс чыллығ программалар тоғынчалар. Ӱс чыл – тиксi тилiс программазы, пис, сигiс чыл – предпрофессиональнай тимненiс.
– Амғы туста школада нинҷе пала саналча?
– 88, iдӧк Пыдырахтағы филиалда олғаннар парох. Паза Таштыптағы «Кӱнiҷек» олған садында 46 паланы музыкаа кӧнiктiрчебiс. Прай саназа – 134 олған, аннаң артых ал полбинчабыс, школа тоғызы хоостыра ол син не пала аларға чарадылча.
– Сизiнчем, музыка школазының ӧмезi аймах мероприятиелерде аралазарға кӱстенче.
– Я, Таштып аймаанда иртiрiлчеткен мероприятиелерде сыбыра араласчабыс паза олғаннарны марығларға ал чӧрчебiс. Абазада чыл сай «Дебют» марығ иртче, андар палаларны Роза Назгатовна ал чӧрче, Александр Кенельнiң адынаң тиксi Россия синiнде иртiрiлчеткен марығда араласчабыс. Пылтыр ол марыға Елена Владимировнаның палалары уғаа чахсы пар килгеннер, «Национальнай тирiглер» номинацияда iкiнҷi паза ӱзiнҷi орын алып алғаннар. Ӱгретчiбiс София Горбунова телевидение передачаларында суурынарға маңнанча, Хакасияның чуртағҷылары кӧрген поларлар, хайди ол iкiнҷi каналда апарылчатхан «Привет, Андрей!» сығарыстарда музыка номерлерiнең сыхча.
Пiстiң школадаң 220 азыра выпускник сыххан, оларның аразында Ағбандағы, Томсктағы, Москвадағы, Кемеровтағы паза пасха даа городтардағы музыканаң палғалыстығ институттар тоосханнар: Дмитрий Сафьянов, Изольда Чучумакова, Светлана Костякова, Инга Метревели, Жанна Уксекова паза пасхазы. Амды олар музыканаң палғалыстығ профессияларҷа тоғын парчалар. Пiстiң школада ӱгретчiлернiң ансамбльы паза ӱгренҷiлернiң iкi ансамбльы (хакас национальнай тирiглернең ойнапчатхан паза баянисттер ӧмезi) пар.
– Хайдағ кӧстеглерҷе музыка школазы тоғынча, кем занятиелер апарча?
– Кӧбiзi мында илееде чыл iстен парир. Ирина Николаевна Карамашева баян паза аккордеон клазын апарча, Роза Назгатовна Колмакова – домра паза фортепиано клазын, Олег Афанасьевич Токояков хомыснаң, чатханнаң, баяннаң ойнирға ӱгретче, Елена Владимировна Шулбаева iдӧк национальнай кӧг тирiглері, гитара, фортепиано клазын апарча, Алина Ивановна Тоданова – фортепиано клазын, Екатерина Владимировна Алыпова – баян, аккордеон клазын, София Сергеевна Горбунова – музыка фольклорын. Жанна Викторовна Молокова пiссер Абазадаң чӧрче, ол сольфеджио апарча. Ангелина Сергеевна Яковлева хомыснаң, чатханнаң, баяннаң паза аккордеоннаң ойнирға ӱгретче.
– Устағҷы тоғызында хайдағ сидiксiнiстерге тоғасчазар?
– Музыка школазының директор тоғызы нандырығлығ, сидiксiнiстер андағ ла тың кӧп чоғыл тирге чарир. Делопроизводитель ставказы чохта ла сидiк пiлдiрче, прай пiчiктернең позыма айғазарға килiсче. Амды наа музыка школазы пӱдiриинең сурығ турча, хайди ол пӧгiлер, ахча табылар ба пу тусха, пiлдiзi чоғыл. Хысхызын соохха тоңминчабыс, че пу пӱдiрiг най иргi, ол садығ туразы чiли пӱдiрiлген, совет тустарында садығ апарылҷаң.
Пiди кӧрзе, сынап таа, школаның класстары кiчiг арах, музыка занятиелерiне килiстiре нимес, актовай зал даа алғым нимес. Олғаннарға наа музыка школазын пӱдiрiбiссе, чахсы поларҷых. Чӧрҷең олған читкiҷе, ӱгретчiлер – тоғызына хынчатхан, чайаачы ӧме.
Пӱӱл школа пайрамын таныхтапчатханы аны киречiлепче, пик ӧме чохта, олған музыка школазы даа ӱр тудылбасчых. Тоғызын, ӱгретчеткен палаларын улуғлапчатхан ӱгретчiзер палалар даа тартылчалар. Iзенчем, Анастасия Токоякованың устағҷы кирее iдӧк аннаң андар килiзер, тӱӱлдiрбес. Чайаачы кiзi пiчiктернең кӧп айғасса, майых парча полар.
Сом авторни
Автор :
Тарина Бутонаева
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде