Хакасияда Москвадағы камернай оркестр ааллады
Чайаачы иир. 1 чарыста, Музыканың чоннар аразындағы кӱнiнде, В.Г.Чаптыковтың адынаң Хакас филармониязының 36-ӌы чайаачы сезоны азылған
Ол кӱн филармонияның концертiне улуғ частығлар кöп килгеннер. Iди постарына Улуғлар кӱнiнде сыйых иткеннер, неке. Че ол ла сылтағ полбаан полар. Филармония кöрiгӌiлерiне хаӌан даа морсымнығ концерттер тимнеп салча. Ағаа хоза, чайаачы сезонны азарға Москвадаң Хакасиязар пастағызын на Россияның саблығ академическай камернай оркестрi – СССР-да пастағы камернай оркестр килген. Дирижёр – Россияның саблығ артизi Алексей Уткин.
Пу оркестр Москвадағы филармонияның хойнында 1957 чылда тöстелген. Пастап ол Москвадағы камернай оркестр адалған паза Совет Союзында пастағы камернай оркестр полған.
Ыраххы халған чылларда Москвазар Вильгельм Штросстың устаанынаң Мюнхендегi камернай оркестр килген. Ол, Бахтың паза Вивальдинiң кöглерiн толдырып, прайзын чапсытхан. Андада чиит альтист паза скрипач Рудольф Баршай пiр сағыс-кöрiстiг арғыстарынаң хада СССР-да iдöк пос камернай оркестрiн тöстирге чарадыбысхан. Оларға аймах сидiксiнiстерге урунарға килiскен. Устағ-пастағлар Баршайның сағызы килiзер тiп киртiнмееннер. Кöгӌiлер кӱн тооза, хараа тооза музыка чайаӌаңнар. Чайғызын олар дачада кöглер пасчаңнар.
1956 чылда 2 хосхарда öменiң пастағы чайаачы иирi ирткен. Консерваторияның кiчiг залынзар чон тығырама чыылыс парған. Iди пасталған камернай оркестрнiң сабланызы. Соонаң öме Москваның улуғ залларында иирлер иртiрӌең. Артисттер композиторларның хайиин тартханнар. Пöзiк устарын кöзiдiп, кöгӌiлер улам тилiп сыхханнар. Пай репертуарларынаң тиксi Совет Союзынӌа чöргеннер. Iди олар пастағы он чыл аразына СССР-ның 90 городында, хырығ озариндағы 137 городта полғаннар.
Пӱӱнгi кӱнде Россияның академическай камернай оркестрi хазнада ööн камернай оркестрлернiң пiрсi полча. Аның репертуарына иргi ариялар, барокко, ХХ чӱс чылдағы композиторларның кöглерi кiрчелер. Чайаачы öме Хакасияның чуртағӌыларына илбек композиторлар Сергей Прокофьевтiң (Россия), Макс Брухтың (Германия), Нино Ротаның (Италия), Бенджамин Бриттеннiң (Британия), Вольфганг Моцарттың (Австрия) сiлiг кöглерiн сыйлап пирген. Чиит хыс Мария Чепурина флейтанаң, Алексей Уткин гобойнаң ойнааннар. Концерт Россияның культура министерствозының «Тиксi Россиядағы филармониялар сезоннары» программаӌа ирткен.
– Москвадаң академическай камернай оркестр килгенi чапсых. Пiске, республика чуртағӌыларына, ол улуғ сыйых полча. Мин филармонияның концерттерiне удаа чöрчем. Пiстiң симфоническай оркестр маэстро Вячеслав Инкижековтың устаанынаң iдöк морсымнығ ойнапча. Ыраххыдаң аалӌылар пiди кил парыбысчатханы уғаа чахсы. Мындағ оңдайнаң пiс тее культура саринаң öсчебiс, тилiпчебiс. Ағаа хоза, амғы амыр нимес туста культура тоғынӌылары кöңнiбiстi часхарчалар, – кöңнiнең ӱлескен кöрiгӌi Ия Чанкова.
– Улуғлар кӱнiне пархам Анна Шрамова мағаа сыйых ит пирген – Москвадағы академическай камернай оркестрнiң чайаачы иирiне билет ал пирген. Ол позы Новосибирсктегi филармонияда дизайнер полып тоғынча. Билеттернi, онлайн алып, интернет пастыра ыс пирген. Концерт пöзiк синде ирт парған. Филармонияа мындағ иирлер ӱчӱн улуғ алғызым читiрчем, – теен тынағдағы ууӌа Раиса Шрамова.
Сом Любовь Халявинани
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |