Киистiң аймах хоостары
Фестиваль. Хоос киистiң чоннар аразындағы кӱнiнде Хакасияда «Тӱктiг хайхастар» регионнар аразындағы III фестиваль ирткен
Ол кӱнде С.П.Кадышевтiң адынаң чон чайаачызының национальнай кiнiнiң теелбектер залында кииснең тоғынчатхан устар чыылысханнар. Пайрам Россиядағы Сöбiре чылына чарыдылған. Пу фестиваль 2009 чылдаң сығара таныхталча. Аны ООН-да Хоос киистiң чоннар аразындағы кӱнiнде идерге тiп чарлаптырлар.
Хакасияда ол пайрам ӱзiнӌi хати ирттi. Киистең хоос ниме-ноо чайапчатхан устар Хакасиядаң на нимес, iдöк Хызылчар крайынаң килгеннер. Олар кöзiдiге сигедектер, пöрiктер, маймағастар паза даа аймах-пасха нимелер ағылғаннар.
Фестивальда аалӌы полған Хакасияның культура министрi Светлана Окольникова. «Хакасиядағы устар чайап салған ниме-ноо пасха даа хазналарӌа тарап парған. Пеер килген аалӌылар даа киистең иткен сувенирлернi хынып алчалар. Iзенic пар, öбекелердең килген хоос киистең чайир пу кибiрнi аннаң андар тилiт турарлар. Сағам мында наа устар паза наа тоғыстар кöрiнчелер. Пiс оларға полыс пирерге хаӌан даа тимдебic», – теен ол.
Анаң чонға полған на устың ниме-ноозын кöзiткеннер. Иң пастап «Хакасияның чон узы Ефросинья Сагалакованың киистең иткен хакас кип-азаан «Алтыр» мода театрының хыстары кöзiткеннер. Сiлiг сигедектер, хоос пöрiгестер паза иңнiлерiндегi сӱӱмектер сылағай сыннығ абахайларда уғаа килiстiре кöрiнгеннер.
Чоохтирға кирек, Ефросинья Ефимовна апсаанаң хада Аршаннар аалынаң Ағбан пилтiрiндегi Чапаев аалзар кöс килiбiстiр, аннаңар наа тоғыстар идерге маңнанминча. Ағаа хоза олаңай кiзiлердең чахығлар кöп кiрче одыр. Амды хакастарның национальнай кип-азаан кис чöрерi модаа кiрiбiскен нооза.
Анаң постарының ниме-ноозын кöзiткеннер «Войлок Хакасии» чайаачы пiрiгiстiң араласчылары Ирина Мишарова, Ирина Бредюк, Надежда Инютина паза даа пасхазы.
Iдöк Ағбандағы Чайаачы олғаннар кiнiнiң чиит устары араласханнар. Олар кöбiзiн киистең иткен кöклöлернi, аңыӌахтарны паза ойнаӌахтарны чайаптырлар. Соонаң олғаннар кöклö театры оңдайынаң iкi нымах кöзiткеннер.
Килген чон кöрген полар, хайди олаңай хой тӱгiнең ус кiзiлер хоос паза сiлiг кип-азах, пöрiгестер паза маймахтар идiп алчалар. Мындох иң сiлiг мелей чайирына марығ иртiргеннер, лотереялар ойналғаннар. Пiреезi мастер-класстар кöзiткен.
Пу пайрам иирге теере полған.
Сом Олег Ковалевти
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |