Пастағы хакас режиссёр-ипчiнi чылығ сöстернең сағысха кирiп
Тоғазығ. 4 чарыста, Эльза Кокованың пайрамнығ тöреен кӱнiнде, Н.Г.Доможаковтың адынаң республиканың ööн библиотеказында «Определившая судьбу...» тоғазығ ирткен
Эльза Михайловна – пастағы хакас режиссёр-ипчi, А.М.Топановтың адынаң Хакас драма театрының хоос устағӌызы, Хакасия искусствозының саблығ деятельi. Пӱӱл ағаа 85 час толарӌых. Аны чылығ сöстернең сағысха кирерге хада тоғынған нанӌы-ööрелерi, туған-чағыннары паза студенттер килгеннер.
– Эльза Михайловнаның адынаң театрның öңненiзi палғалыстығ. Мин аны чахсы таныпчам. 1998 чылдаң сығара «Нымах» кöклö театрының устағӌызы полғам. Пiс Эльза Михайловнанаң хада андада Ағбандағы Крыловтың орамазында орныхчатхан культура министерствозынзар чыылығларға чазағ чöрӌеңмiс. Пiстi министр полған Владимир Герасимович Чаптыков чығӌаң. Ноға-да автобустығ парбаӌаңмыс. Машинабыс ол туста чох полӌаң. Iди Эльза Михайловнанаң чоох-чаахнаң чазағ парӌаңмыс. Аннаң хада Хакасиядаңар, культурадаңар кöп чоохтасчаңмыс. Улуғ ачырғасха, ол ирте ах чарыхтаң парыбысхан. Эльза Кокованың республиканың культуразын кöдiрӌең, театрны öңнендiрӌең сағыс кöп полған. Илбек кiзiлернi, пiди чыылызып, сағысха кирчеткенi – орта тоғыс, – тоғазығны асхан Хакасияның культура министрi Светлана Окольникова.
Эльза Михайловнаның оолғы Карим Чарков Финляндияда чуртапча. Наа технологиялар парда, тилекейнiң хайдағ даа пулиинда кирек кiзiнi таап аларға чарир. Библиотеканың тоғынӌылары Карим Владимировичнең чоохтазарға Финляндиязар интернетче палғалысха сыхханнар. Видео пастыра Эльза Кокованың оолғы iӌезiнеңер чоохтаан.
– Iӌемнiң пайрамнығ тöреен кӱнiне чарыдылған тоғазыға килген кiзiлерге улуғ алғызым читiрчем. Пiс кiчiг полғанда, iӌем тiӌең, аның чӱреенде пастағы орында Хакасия турча, iкiнӌi орында – театр, ӱзiнӌi орында – cöбiре. Мин улуғ öс парғанда, iӌем чуртасха позының кöрiзiн алыстырыбысхан тiп чоохтаан. Че аның чӱреенде пастағы орында iдöк Хакасия халған, сöбiре iкiнӌi орынға сығып алған, театр ӱзiнӌi орында пол парған. Хайдағ-да оңдайнаң пiс театрны «ас парыбысхабыс». Олған тузымда iӌемнi ибде кöрбеӌеңмiн дее. Ол театрда, репетицияларда, хайдағ-да чыылығларда, гастрольларда полӌаң. Пiс аның андағ чуртазына кöнiк парғабыс. Ол политикаа тартылӌаң, халых чонның чуртазына сағыссыраӌаң, – теен амыр чоохтығ ирен.
Э.М.Кокова – писатель, драматург Михаил Коковтың хызы. Кiзее талант кiчiгдöк пирiлче. Эльзаӌах олған тустаң сығара театрдаңар кинделер хығырарға хынӌаң, кибелiстернi öтiг хығырӌаң, улуғ нимес ойыннар кöзiтчең. Хакасия искусствозының саблығ тоғынӌызы, республиканың чон артизi, композитор Татьяна Шалгинова пиӌезi Эльза Михайловнаны мындағ сöстернең сағысха кирген:
– Эльза миннең 15 часха улуғ полған. Аның пабазы Михаил Семёнович Коков Шира аймаандағы Чабак аалдағы школада ӱгренген. Олох школада Эльза Михайловнаның iӌезi Олимпиада Николаевна Спирина, минiң iӌем, ӱгренген. Михаилге 15 час полған, iӌеме – 13 час, оларның аразында кööленiс оды тамыл килген. Соонаң ол Томсксар ӱгренерге парыбысхан. Михаил Коковха 19, iӌеме 17 час полғанда, чииттер сöбiре тöстееннер. Олар Ағбанзар кöзiбiскеннер. Михаил «Хызыл аал» газетаның редакциязынзар тоғысха кiрiбiскен. Олар Ленин проспектiндегi iкi хадыллығ ағас тураларда чуртааннар. Тун ооллары Лев тöреен, че ол пiр чазына даа читпеен. Iкiнӌi оолахтары iдöк тудылбаан. Iӌем 1937 чыл иң аар полған тiӌең, пабазы репрессияа хабылған, аны Минсуғдағы харибде ат салғаннар, Михаилны Ыраххы Востоксар армияа апарыбысханнар, iкiнӌi оолахтары чарыхтаң парыбысхан, позын тоғыстаң сығарыбысханнар. Ол чарғыӌының хачызы полып тоғынған.
Iӌем театр институдынзар ӱгренерге кiрерге тың хынған, че ол тойлығ пол парған полтыр. 1939 чылда Эльза хызы тöреен. Палазы тöреен соонаң, iкi-ӱc ай пазынаң, Михаилны финнердең тоғыр чаалазарға апарыбысханнар. Чуртас хынығ салыл парча. Михаил Семёнович финнердең тоғыр чааласхан, амды аның пархазы Финляндияда чуртапча.
Михаил Коков тың ағырыбысхан, пьесаны чадап пазып алған, репетицияларға ағырсынып чöрӌең. Тун ойын соонаң, пiр ай пазынаң, Михаил Семёнович сын чирзер наныбысхан. Ағаа 27 ле час полған.
1946 чылда iӌем пабамнаң, танызып алып, сöбiре тöстееннер. Пабам чаадаң килген. Аның кöксiне толдыра орден чылтырасхан. Ол хоныхта Николай харындазым паза мин тöреем.
Эльза пиӌем, национальнай школаны тоозыбызып, Томсктағы университеттiң филология факультедiнде пiр чыл ӱгренген. Анда аның кöңнiне ниме-де кiрбеен. Аннаңар Хызылчардағы А.С.Пушкиннiң адынаң театрның хойнындағы студиязар ӱгренерге кiрiбiскен. Анда ӱс чыл ӱгренген.
Мағаа 4-5 час полғанда, кӱн осхас пиӌем парын чахсы оңарғам. Пiрсiнде ол ööрезiнең хада дискотекаа парарға тимненiбiскенде, мин тың ылғаам. Минi тохтатчаң оңдай чох полғанда, Эльза позының хызамдых öңнiг, нымзах пладын пирген. Мин аннаң сағамох орааныбысхам, анаң амырап парғам.
Театр студиязында Эльзаның режиссёр полӌаң оңдайларын сизiн салғаннар. Ол уғаа кöп хығырӌаң, драматургияа тартылӌаң. Iди пиӌем Ленинградтағы театр институдынзар ӱгренерге кiрiп алған. Ол, улуғ городтаң килзе, мағаа хаӌан даа сыйыхтар ағылӌаң: öңнiг карандаштар, аймах открыткалар паза пасха даа нимелер. Чайғызын пiс Шира аймаандағы Палты кöл аалзар туған-чағыннарзар ааллап чöрӌеңмiс.
Соонаң ол тренер Владимир Ильич Чарковха тоғас парған. Олар Хызылчарда хакас чииттернiң иирiнде танызып алғаннар, пиӌеме 20 час полған, Владимир Ильичке – 22 час.
Эльза Михайловнанаң Владимир Ильич культураа паза физическай культураа улуғ хозым иткеннер паза кöбiзiне чуртас чолын ас пиргеннер. Оларның квартиразында спортсменнер ӱзiлбеӌеңнер. Пiреезi институтсар ӱгренерге кiрерге, хайзы сборларға килзе, оларда ла тохтаӌаңнар. Культура тоғынӌылары даа, актёрлар, хоосчылар, кибелiсчiлер, кöгӌiлер iзiк тудазын соотпаӌаңнар.
Минiң чолымны iдöк пиӌем ас пирген. Аның кӱстенiзiнең, Ағбандағы музыка училищезiн тоосхан соонаң, Ленинградтағы Н.А.Римский-Корсаковтың адынаң хазна консерваториязынзар ӱгренерге кiрiп алғам. Пу тоғазығның ады «Определившая судьбу...» тiп орта адал парған. Эльза Михайловнадаңар кöп чылығ сöс чоохтирға чарир, аннаңар мин пиӌемнеңер кинде пас саларбын, ол минiң öдiзiм.
Библиотекадағы тоғазығда Эльза Михайловнанаң хада тоғынған артисттер iдöк постарының кöңнi-сағыстарын читiргеннер. Аның кӱстенгенiнең А.М.Топановтың адынаң Хакас драма театрының кöп артизi пӱӱнгi кӱнде Россияның саблығ артизi паза Хакасияның чон артизi полча нооза.
– Мин 1977 чылда театрзар тоғынарға килгем. Эльза Михайловна минi Хызылчарзар ӱгренерге ысхан. 1984 чылда дипломнығ ойын турғысхабыс. Эльза Михайловна аны кöрерге öнетiн килген. Аның ӱчӱн мин ағаа улуғ алғызым читiрчем.
Театрзар артист полып тоғынарға килгенiмде, Эльза Михайловна хырғыс паза совет писательi Чингиз Айтматовтың «И дольше века длится день» романын турғысхан. Анда мин Вершительнi ойнаам. Ол минiң пастағы улуғ рольым полған. Хайди мин матырның омазын чарытхам, чахсы алай хомай ба, анзын пiлбинчем, че спектакль килiс парған тiп сағынчам. Автор Чингиз Айтматов алғыстастығ пiчиин ысхан.
Оңнапчам, пiрсiнде ол Чингисханнаңар пьеса ағыл килген. Мин тiпчем: «Эльза Михайловна, ноға? Ол хомай кiзi полған нооза». Анаң Эльза Михайловна, мағаа кöп кинде пирiп, теен: «Гена, хығыр». Книгаларны хығырып, Чингисхан уғаа чахсы кiзi полғанын пiлiп алғам. «Хаӌан даа кӱстiг кiзее тыыдынарға кирек», – теен Эльза Михайловна.
Хонғаным Светлана Семёновнанаң чуртха iдöк Эльза Михайловнаның полызиинаң чидiнгебiс. Ол устағ-пастағларнаң чоохтазыбысханда, пiске тöрт комнаталығ улуғ квартира пиргеннер. Анда 45 чыл азыра чуртап парирбыс. Мындағ ырах кöрiстiг полған Эльза Михайловна Кокова, – теен Россияның саблығ артизi, Хакасияның чон артизi Геннадий Чаптыков.
Iдöк илбек режиссёрны чылығ сöстернең сағысха кирген Хакасияның саблығ артизi Максим Султреков:
– Мин олған тузымда, öс парзам, милицияда тоғынарбын тiп сағынғам. Право хайраллаӌаңнарның кип-азаа кöңнiме тың кiрӌең. Че спортнаң айғазып, мин пиртiн парғам, аннаңар хазиим хоостыра хынған сағызымны толдырарға оңдай чох пол парған. Анаң мин армияа парарға сағыныбысхам. Службада контракт пазып, чааӌаа ӱгренiбiзiп, тöреен чирiмзер нандыра айланып, пазох милициязар кiрербiн тiп пöгiн турғысхам. Iӌем, аны ис салып, сағыссырап сыххан. Андада Чечнядағы тартыстар чахсы амыраалах полғаннар. Iӌем телевизорда чарлағ кöр салған, Хакас театрның студиязынзар оол-хыстарны ӱгренерге алчалар. Анда пiстiң туған Кирилл Георгиевич Султреков тоғынча. Iӌем ағаа сығдырадыбысхан. Ол кибелiс, басня ӱгрен килзiн теен. Мин ӱгрен сыххам. Сыныхтағлар иртчең кӱн читкенде, Эльза Михайловнаны пастағызын на кöргем. Чалахай кӱлiмзiрестiг ипчi пiстi чылығ удурлаан. «Нименең айғасчазың?» – сурған ол. «Аалдағы хойларны хадарчам», – нандырғам мин. «Хайди хадарчазың?» – пазох сурған Эльза Михайловна. «Сарнапчам, плесет салчам, уйғум килiбiссе, кӱрген тöзiнде узирға чадыбысчам», – теем мин.
Iди театр студиязынзар ӱгренерге кiрiп алғам. Эльза Михайловна пiстi пiр ай ӱгреткен, анаң, улуғ ачырғасха, сын чирзер наныбысхан. Ол пирген пiлiстер минiң кöксiмде ам даа «кöйчелер». Хайди теен аның оолғы Карим Чарков, iӌезiнiң чӱреенде пастағы орында Хакасия полған, iкiнӌi орында – театр, ӱзiнӌi орында – cöбiре. Пӱӱнгi кӱнде пiс, театр тоғынӌылары, андағох сағыс-кöрicтiг чуртапчабыс. Эльза Михайловна пiсте «ӱрен сал салған», аның ӱчӱн ағаа улуғ алғызыбыс читiрчебiс.
Сом Дмитрий Сунчугашевти
Сомда: Татьяна Шалгинова пиӌезi Эльза Коковадаңар чоохтапча
Пн | Вт | Ср | Чт | Пт | Сб | Вс |
24 | 25 | 26 | 27 | 28 | 29 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |