Чаа тузы опера пастыра
Пресс-конференция. Ӱртӱн айының халғанӌы кӱннерiнде В.Г.Чаптыковтың адынаң Хакас филармониязы Карелиязар «Зори здесь тихие» операны ал чöрген
Пiстiң артисттерiбiстi анда хайди удурлааннарын, чорых тоғызы хайди парғанын хабарӌыларға чоохтааннар филармонияның хоос устағӌызы, старшина Федот Васковты ойнаан артист Артур Марлужоков, Олған филармониязының хоос устағӌызы Марина Штарк, режиссёр-постановщик Юлия Белогурова-Моргачева, «Каданс» хорның ырӌызы, Рита Овсянинаның омазын толдырған артист Наталья Гилёва, «Каданс» хорның ырӌызы, Соня Гурвичтi ойнаан хыс Дарья Белозёрова, Женя Комелькованың рольын кöзiткен артист Мария Сиротенко.
– Россияның паза Хакасияның культура министерстволары, «РОСКОНЦЕРТ» федеральнай хазна бюджет культура учреждениезi, республиканың правительствозы полызиинаң, «Улуғ гастрольлар» регионнар аразындағы программа хоостыра пiс Карелия Республиканың Петрозаводск паза Медвежьегорск городтарынзар пар килгебiс. Чайғызын Петрозаводсктағы нанӌыларыбыс пiссер чапсых балет ағылғаннар. Пiлдiстiг, устағ-пастағларыбыстың улуғ хабазии, хайии чох пiс мындағ чорыхха сых полбасчыхпыс, аннаңар оларға прай чӱреебiснең алғызыбыс читiрчебiс, – асхан пресс-конференцияны Артур Викторович.
Хакас филармониязы алнындағы чылларда «Зори здесь тихие» операны Минсуғ, Хызыл, Санкт-Петербург, Томск, Омск, Луганск, Хызылчар городтарда кöзiткен. Че Карелиязар парчатханда, пiстiң артисттер улам тың чӱрексееннер. Борис Васильевтiң «Зори здесь тихие» повезiнде 1942 чылда чайғызын Карелияда финнердең тоғыр чаалазығдаңар чоохталча. Аннаңар филармонияның артисттерi операны андағы чуртағӌыларға кöзiт пирерге тың сағынғаннар.
– Петрозаводскта спектакльны iкi хати кöзiткебiс. Операны кöрерге кiзi толдыра килген. Ойын тоозыл парғанда, залда палалар одырчатханнарына хахап таа парғам. Ноғадаңар? Олар постарын сым тудынғаннар, пiрдеезi суулабаан, спектакльны ситкiп кöргеннер.
Васильевтiң повезiн прайзы хығырғабыс нооза. Операны тимнепчеткенде, тiзең, улам тирең танысхабыс. Че Карелиязар парып, экскурсиялар тузында пiлiп алғабыс, Петрозаводск немецтерге нимес, финнерге абылаттырған полтыр. Пiс, тiзең, спектакльда «немецтер килчелер!» тiп ойнапчабыс. Тимiр чол паза Легонтово кöл сынында анда чох полтыр. Аннаңар, «Зори здесь тихие» операны кöзiтчеткенде, кöрiгӌiлер пiске киртiнместер тiп iкiнӌiлестер полған, че посты пiр холға алып, спектакльны турыстығ кöзiт пиргебiс, – кöңнiнең ӱлескен филармонияның хоос устағӌызы Артур Марлужоков.
Филармонияның режиссёр-постановщигi Юлия Викторовнаның чооғынаң, операны кöзiдер алнында олар республиканың тархынынаң танызып алғаннар. Карелияның полған на чуртағӌызы тöреен чир-сууна тың хынча, поғдархапча, тархынын öтiре пiлче. Хакасияның артисттерi Петрозаводсктаң сығара Медвежьегорскка теере автобустығ iкi час парғаннар. Автобустың водительi, чол пара, регионның хайхастығ чуртазынаңар iкi час чоохтаан. Пасха даа тоғасхан кiзiлер, кöрiгӌiлер тархыннарынаңар хынып ӱлескеннер. Аннаңар пiстiң артисттер оларның республикада полған хорғыстығ чаа тузын опера пастыра тың чӱрексiп кöзiткеннер. Кöрiгӌiлер спектакльны чӱректерiне чағын алынғаннар, кöзiдiг тузында харах частарын сым-туйуххан чысхлааннар.
– Опера соонаң Культура туразының устағӌызы минзер пастыр килiп теен: «Карел нимес чон кареллернiң чуртазын матлама кöзiт пирдi. Сiрернiң республикада чаа чох полған даа полза, тиксi Совет Союзындағы полған на сöбiрее Илбек Ада чаа улуғ чобағ ағылған, че пiс ол чааны пос хараанаң кöргебiс. Андада прай нименi, сайбап, чирнең тиңнестiрiбiскеннер. Сiрер ол чуртасты пicнең хада ирткен чiли операда чарыт пирдiңер. Пiс чоныбыстың «Калевала» алыптығ нымаан сценада турғызарға Хакас филармониязына пик iзенiснең пирерӌiкпiс». Мындағ чылығ сöстернi артисттерiбiстiң пöзiк устары сылтаанда исчебiс, анзы уғаа поғдархастығ, – таныхтаан Олған филармониязының хоос устағӌызы Марина Штарк.
Iди Хакас чирiнiң 101 артизi, Карелиязар чöрiп, пiстiң республиканың культуразын турыстығ кöзiт пирген.
Сом авторни
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |